ក្នុងជីវិតជាផលិតករ ពាន់ ភួងបុប្ផា ជួបបញ្ហាស្មានមិនដល់៣រឿងធំៗ

2017-10-18 23:10:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្នុងជីវិតប្រឡូកក្នុងវិស័យការងារទោះការងារតូចឬធំ តែងតែជួបបញ្ហាជានិច្ច គ្រាន់តែថាបញ្ហានោះធ្ងន់ធ្ងរឬស្រាល់តែប៉ុណ្ណោះ តែចំពោះអ្នកស្រី ពាន់ ភួងបុប្ផា ជួបបញ្ហាដែលខ្លួនស្មានមិនដល់៣រឿងធុំៗ ដែលធ្វើឱ្យអ្នកស្រីចាំមិនភ្លេច។

ផលិតកររឿង"ទឹកចិត្តម្ដាយសម័យថ្មី"រូបនេះបានប្រាប់ Sabay ថា ក្នុងជីវិតប្រឡូកក្នុងវិស័យការងារអ្នកស្រីជួបរឿងដែលស្មានមិនដល់និងជាឧបសគ្គជាច្រើន តែរឿងដែលធ្វើឱ្យអ្នកស្រីចាំមិនភ្លេចនោះ មាន៣បញ្ហាធំៗ មានទាំងរឿងដែលអាចដោះស្រាយបាន និងរឿងដែលធ្វើឱ្យអ្នកស្រីពិបាកចិត្តស្ទើរតែទ្រាំមិនបាន។

បញ្ហាទាំង៣រឿងធំៗក្នុងជីវិតជាផលិតករ ដែលធ្វើឱ្យអ្នកស្រី ពាន់ ភួងបុប្ផា ចាំមិនភ្លេច៖

បញ្ហាទី១ កើតឡើងក្នុងរឿង "កម្លាំងនិងវាស្នា" (ប៉ះពាល់ខាងមូស្លីម) ធ្វើឱ្យរឿងមួយនេះត្រូវបិទមិនអាចបញ្ចាំងបាន។ កំឡុងពេលប្រហាក់ប្រហែលគ្នានោះដែរឡានអ្នកស្រីក៏បានផ្ទុះដែរ។

បញ្ហាទី២ កើតឡើងក្នុងរឿង "គូព្រេងចម្លែក” (មានការចេញថ្លៃស្រីគ្រប់លក្ខណ៍ត្រូវបានរដ្ឋាភិបាលផ្អាករឿងនេះ តែក្រោយមកឱ្យបញ្ចាំងឡើងវិញ)។

បញ្ហាទី៣ កើតឡើងក្នុងរឿង "រៃមាស” (ក្នុងពេលកំពុងថតរឿងនេះមានរន្ទះបាញ់ក្រុមការងារម្នាក់ស្លាប់)។

ផលិតកររឿង"កុមារី២៥ឆ្នាំ" រូបនេះបញ្ជាក់ថា បញ្ហាទាំង៣នេះ រឿងដែលធ្វើឱ្យអ្នកស្រីពិបាកចិត្តខ្លាំងបំផុតគឺរឿងរន្ទះបាញ់ ព្រោះរឿងនេះមិនមែនជាការធ្វេសប្រហែសនោះឡើយគឺជារឿងបាតុភូតធម្មជាតិ តែមានការដាក់កំហុសទាំងស្រុងមកលើលោកស្រី។

“និយាយពីផ្លូវចិត្តពិបាកហើយតស៊ូស្ទើរទ្រាំមិនបានគឺពេលធ្វើរឿង"រៃមាស” ហ្នឹងហើយ ជួបសម្ពាធផ្លូវចិត្តធ្ងន់ធ្ងរ នៅពេលដែលរន្ទះបាញ់ ៗក្រុមការងារហ្នឹង គេដាក់កំហុសទាំងស្រុងមកលើយើង ហើយនេះជាលើកទី១ក្នុងជីវិតរបស់ខ្ញុំ ដែលជួបរឿងបែបនេះ ដែលយើងអាយុចាស់ប៉ុណ្ណេះហើយ។ ខ្ញុំមិនបានខឹងខ្លួនឯងឬខឹងធម្មជាតិទេ ព្រោះយើងអត់បានដឹងមុនទេ បើយើងដឹងមុនយើងក៏មិនបន្តថតដែរ ហើយពេលនោះអត់មានភ្លៀងទេ”។

ក្រោយពីជួបហេតុការជាច្រើនក្នុងអាជីពជាអ្នកនិពន្ធនិងដឹកនាំរឿង អ្នកស្រី ពាន់ ភួងបុប្ផា បានបញ្ជាក់ប្រាប់ Sabay ថា អ្នកស្រីមិនបានបាក់ទឹកចិត្ត និងចុះចាញ់ឡើង តែផ្ទុយទៅវិញអ្នកស្រីរឹតតែខំប្រឹងប្រែងសម្រិតសម្រាំងរឿងរបស់ខ្លួនឱ្យកាន់តែមានគុណភាព និងព្យាយាមធ្វើការឱ្យល្អបំផុត។

អត្ថបទ៖ ប៉ូ សាគុន