នំប៉័ងទួគី នៅក្រោយវ៉ាន់ដា ទាក់ចិត្តយុវវ័យខ្មែរមិនស្ទើរ
- 2017-10-18 08:49:38
- ចំនួនមតិ 0 | ចំនួនចែករំលែក 0
នំប៉័ងទួគី នៅក្រោយវ៉ាន់ដា ទាក់ចិត្តយុវវ័យខ្មែរមិនស្ទើរ
ចន្លោះមិនឃើញ
ក្រោមឥទ្ធិពលនៃសាកលភាវូបនីយកម្ម ធ្វើអោយបែបបទជីវិតប្រជាជនខ្មែរ មានការផ្លាស់ប្ដូរ ហើយមុខរបរប្លែកៗនាំមកពីបរទេសក៏ចូលមកច្រើន។ ជាក់ស្ដែងនំប៉័ងទួគី បានវាយលុកទីផ្សារ និងទាក់ចិត្តប្រជាពលរដ្ឋខ្មែរច្រើន ជាពិសេសយុវវ័យ។
និយាយដោយពីកន្លែងលក់នំប៉័ងទួគី នៅក្រោយវិទ្យាស្ថានវ៉ាន់ដា ហាងនំប៉័ងទួគីយីហោ សុខ ឆេង បានទាក់ចិត្តអតិថិជនភាគច្រើនជាយុវវ័យរាប់រយនាក់ និងរកចំណូលចូលរាប់រយដុល្លារក្នុង១ថ្ងៃៗ។ នេះបើតាមការអះអាងរបស់ម្ចាស់អាជីវកម្ម។
សុខចិត្តបោះបង់អាជីពបុគ្គលិកក្រុមហ៊ុនឯកជន បានប្រាក់ខែជាង២០០ដុល្លារ អាជីវករឈ្មោះ សុខ ឆេង ប្រាប់ថា ខ្លួនបានប្រកបរបរនេះ ៤ឆ្នាំហើយ។ មួយឆ្នាំ ពីរឆ្នាំដំបូង អ្នកស្រីប្រាប់ថា ការលក់របស់អ្នកស្រី មិនជាប្រសើរទេ ប៉ុន្តែឆ្នាំបន្ទាប់ រហូតបច្ចុប្បន្ន អ្នកស្រីថាគឺល្អប្រសើរខ្លាំង។
នំប៉័ងទួគីមួយតម្លៃ ៣៥០០រៀល ហើយក្នុងមួយថ្ងៃ អ្នកស្រីលក់បាន ៤០០-៥០០នំ។ ចំពោះរូបមន្តនៃការធ្វើនំ គឺអ្នកស្រីបានទៅសិក្សានៅប្រទេសថៃ រយៈពេល១សប្ដាហ៍ និងចំណាយដើមទុន ៣០០០ដុល្លារអាមេរិក។ ខ្ទង់ចំណាយនេះ អ្នកស្រីថាទទួលបានមកវិញនូវទូរម៉ាស៊ីនអាំងសាច់មួយ និងរូបមន្តធ្វើនំ។
នៅខាងក្រោយវិទ្យាស្ថានវ៉ាន់ដា មិនមែនមានតែកន្លែងលក់នំប៉័ងទួគីអ្នកស្រី សុខ ឆេង មួយនោះទេ គឺនៅមានកន្លែងផ្សេងទៀត ប៉ុន្តែកន្លែងរបស់អ្នកស្រី ហាក់លក់ដាច់ជាងអ្នកដទៃ។ បញ្ហានេះ សាមីខ្លួនអះអាងថា មកពីអ្នកស្រីបានបន្ថែមរូបមន្តផ្ទាល់ខ្លួន ដែលចេះពីការបណ្ដុះបណ្ដាលមកពីបរទេស៕
ចុចអាន៖