លីគកំពូលកម្ពុជា សប្ដាហ៍នេះនឹងកាន់តែជក់ចិត្តបន្ថែមទៀត

2017-10-19 02:03:46
ចំនួនមតិ 0 | ចំនួនចែករំលែក 0

ចន្លោះមិនឃើញ

ការប្រកួតលីគកំពូលកម្ពុជានៅចុងសប្ដាហ៍នេះ នឹងកាន់តែល្អមើលថែមទៀត ត្បិតអីក្រុមខ្លាំងៗបន្ដប៉ះគ្នា ដូចជា ព្រះខ័នរាជស្វាយរៀង តតាំងជាមួយណាហ្គាវើល និងភ្នំពេញក្រោនប៉ះក្រសួងការពារជាតិជាដើម។

នេះជាសប្ដាហ៍ទី១៨ហើយសម្រាប់លីគកំពូលកម្ពុជា ខណៈដែលព្រះខ័នរាជស្វាយរៀងនៅតែបន្ដឈរកំពូលតារាងដដែល។ ក្លឹបដែលដឹកនាំដោយលោក សំ វ៉ាន់ដេត នឹងបន្ដប៉ះក្រុមណាហ្គាវើល នៅទីលានស្ដាតចុងសប្ដាហ៍នេះ វេលាម៉ោង ៣:៣០នាទីរសៀល។ ការប្រកួតនេះក្រុមទាំងពីរសុទ្ធតែត្រូវការពិន្ទុដូចគ្នា តួយ៉ាងស្វាយរៀងត្រូវការ៣ពិន្ទុបន្ថែមដើម្បីបន្ដកំពូលតារាង ស្របពេលណាហ្គាវើលក៏ត្រូវការ៣ពិន្ទុដើម្បីរក្សាតំណែងក្នុងតំបន់ Top4 របស់ខ្លួន។

ដោយឡែកសម្រាប់ទ័ពនិងភ្នំពេញក្រោនវិញ ក្រុមទាំងពីរនេះកំពុងប្រដេញគ្នាខ្លាំង ព្រោះក្រោននៅលេខ៤មាន៣២ពិន្ទុនិងក្រសួងការពារជាតិមាន៣០ពិន្ទុឈរនៅលេខ៥។ ប្រសិនបើក្រសួងការពារជាតិអាចយកឈ្នះប្រកួតនេះបាន នោះពួកគេនឹងឈានចូលក្នុងតំបន់ Top4 បានវិញហើយ។

អីចឹង មានតែចាំទស្សនាការប្រកួតនៅចុងសប្ដាហ៍នេះទេ ទើបដឹងថាក្រុមណានឹងទទួលបានប៉ុន្មានពិន្ទុ ហើយឈរនៅចំណាត់ថ្នាក់ទីប៉ុន្មានក្នុងតារាងលីគកំពូលកម្ពុជាសប្ដាហ៍ទី១៨៕

អត្ថបទ៖ មុន្នីរម្យ