Griezmann៖" Atletico គ្មានគ្រាប់បញ្ចូលទីគឺជាកំហុសរបស់ខ្ញុំ"

2017-10-19 02:21:47
ចំនួនមតិ 0 | ចំនួនចែករំលែក 0

ចន្លោះមិនឃើញ

Atletico Madrid បានត្រឹមស្មើគ្នា ០ទល់នឹង ០ប៉ុណ្ណោះជាមួយក្រុមបាតតារាង Qarabag FK ក្នុងការប្រកួត Champions League ពូល C។

ការខកខានឱកាសដណ្ដើម៣ពិន្ទុធ្វើឲ្យក្រុមខ្លាំងមកពីអេស្ប៉ាញបច្ចុប្បន្នឈរលេខ៣តាមពីក្រោយលេខពីរ Roma ចំនួន៣ពិន្ទុ និងតាមលេខមួយ Chelsea ចំនួន៥ពិន្ទុ។ ការប្រកួតនៅទឹកដីអាហ្សេបៃហ្សង់យប់មិញ Atletico មានឱកាសស៊ុតចំគោលដៅ៥លើក និងខុសគោលដៅ៥លើកប៉ុន្តែគ្មានគ្រាប់បាល់ណាចូលទីបានឡើយ។

ទាក់ទងនឹងភាពកម្សោយក្នុងការស៊ុតបញ្ចូលទី តារាឆ្នើមសញ្ជាតិបារាំងបានបន្ទោសខ្លួនឯង និងប្រព័ន្ធប្រយុទ្ធទាំងមូលរបស់ក្រុម ដោយមិនបន្ទោសកីឡាករដែលលេងនៅតំបន់ផ្សេងនោះទេ។

“Qarabag គឺជាក្រុមល្អមួយ បើមិនអាចស៊ុត ពួកយើងត្រូវតែប្រឹងហ្វឹកហាត់ជាងមុន។ ក្នុងនាមជាខ្សែប្រយុទ្ធយើងត្រូវបំពេញតួនាទីឲ្យបានល្អ។ ក្រុមទាំងមូលមានខ្សែការពាររឹងមាំហើយ ប៉ុន្តែបើមិនអាចស៊ុតបញ្ចូលទីវាជាកំហុសរបស់ខ្សែប្រយុទ្ធ"។ កីឡាករវ័យ២៥ឆ្នាំលើកឡើងដូច្នេះ៕