របរធ្វើកាំបិត ពូថៅ ផ្គាក់ រកចំណូលមិនក្រោម ១០ ម៉ឺនរៀលក្នុង១ថ្ងៃ ជាមុខរបរ ជីតាចែកឲ្យ
- 2017-10-19 04:12:51
- ចំនួនមតិ 0 | ចំនួនចែករំលែក 0
របរធ្វើកាំបិត ពូថៅ ផ្គាក់ រកចំណូលមិនក្រោម ១០ ម៉ឺនរៀលក្នុង១ថ្ងៃ ជាមុខរបរ ជីតាចែកឲ្យ
ចន្លោះមិនឃើញ
ស្មាអែល បានចំណាយពេលជិត ២០ឆ្នាំ ប្រកបរបរធ្វើកាំបិត ផ្គាក់ ប៉ែល ពូថៅ ចប និងរបស់របរប្រើប្រាស់ផ្នែកកសិកម្មមួយចំនួនទៀត ដែលអាចរកចំណូលបាន ១០ម៉ឺនរៀល ក្នុង១ថ្ងៃ ដោយមិនចាំបាច់ធ្វើការចំណាកស្រុក។
របរនេះ ស្មាអែលបានចេះពីជីតា ហើយក៏ជាមុខរបរដែលស្រឡាញ់តាំងពីតូចមក ដូច្នេះហើយ ស្មាអែល បានលើកឡើងថា ចេះជំនាញខ្លួនឯងមិនបារម្ភពីរឿងប្រាក់ចំណូល ហើយគិតថា ប្រសើរជាងធ្វើការឲ្យគេ។
បុរសវ័យ ៣៨ឆ្នាំ រស់នៅភូមិស្នាពីមុខ ឃុំព្រែកខ្ពប ស្រុកឯកភ្នំ ខេត្តបាត់ដំបង បាននិយាយថា ថ្វីត្បិតថា ជាងដំដែកហត់នឿយបន្តិច ព្រោះត្រូវងើបតាំងពីម៉ោង ៤ភ្លឺ រហូតដល់ម៉ោង ១១ ព្រឹកទើបឈប់ និងត្រូវកម្ដៅភ្លើងរៀងរាល់ថ្ងៃ និង ស្លៀកពាក់មិនសូវស្អាត ប៉ុន្ដែ អាជីពនេះអាចរកប្រាក់ចំណូលបានរៀងរាល់ថ្ងៃ។
ស្មាអែល បានរៀបការក្នុងអំឡុងឆ្នាំ ២០០៥ រហូតមកទល់នឹងពេលនេះ មានកូនពីរនាក់ បានប្រាប់ Sabay ថា ១សប្ដាហ៍ទៅ ២សប្ដាហ៍ គឺមានគេដឹកចន្ទាសឡាន-ម៉ូតូកង់បីចាស់ៗ មកផ្ទះរបស់លោក ដោយយ៉ាងតិច ១-២ តោន ហើយថ្លឹងជាគីឡូ ១គីឡូក្រាម តម្លៃ ១ ០០០ ទៅ ២ ០០០ រៀល។ ដែកចន្ទាសទាំងនេះយ៉ាងច្រើន ១-២សប្ដាហ៍លក់អស់ហើយ។
«ដែកចន្ទាសរឹងល្អ យកមកធ្វើកាំបិត ពូថៅ ប៉ែល ចប ឬរបស់របរអ្វីផ្សេងៗហ្នឹងល្អ ហើយតម្លៃធូរថ្លៃទៀត។ ណាមួយរបស់ទាំងហ្នឹងសុទ្ធសឹងតែគេលែងប្រើហើយ យើងយកមកច្នៃជារបស់ប្រើប្រាស់វិញ។ មែនទែនទៅ ខ្ញុំមិនអាចពន្យល់លំអិតអំពីប្រាក់ចំណេញបានទេ គ្រាន់តែដឹងថា លក់នៅផ្ទះហ្នឹងមិនក្រោម ៤-១០ម៉ឺនរៀលទេ នេះមិនរាប់ការបោះដុំទៅកាន់ទីផ្សារផ្សេងផង ហើយចំណូលចំណាយយើងចាយរាល់ថ្ងៃ ឲ្យកូនទៅរៀនផង និងជីវភាពប្រចាំថ្ងៃផង»។
ស្ថិតក្នុងសំលៀកបំពាក់ប្រឡាក់កន្ទេចធ្យូង ដោយកំពុងកាន់ដែកចន្ទាសយកទៅដុតក្នុងភ្លើង លោក ស្មាអែល បាននិយាយបណ្ដើរ និងដុតចន្ទាសបណ្ដើរ ហើយទាញយកមកដុំដែកបណ្ដើរ ថា ឧបករណ៍ដែលលោកផលិតបាន គឺមានគេមកទិញដល់កន្លែងបោះដុំទៅដល់ផ្សារធំៗ ក្នុងខេត្តបាត់ដំបង និង បណ្ដាខេត្តផ្សេងៗ។ «យើងមិនបារម្ភអំពីការលក់មិនដាច់ទេ ព្រោះពួកខ្ញុំលក់រៀងរាល់ថ្ងៃហ្នឹង គេមកទិញជាហូរហែ វាជួយជីវភាពប្រចាំថ្ងៃ ដែលខ្ញុំចាប់អាជីពនេះ ជិត២០ឆ្នាំហើយ»៕
សូមទស្សនាវីដេអូ