Shell បើកស្ថានីយសាកថ្មរថយន្តអគ្គិសនីដំបូងបំផុតនៅចក្រភពអង់គ្លេស
- 2017-10-19 12:27:50
- ចំនួនមតិ 0 | ចំនួនចែករំលែក 0
Shell បើកស្ថានីយសាកថ្មរថយន្តអគ្គិសនីដំបូងបំផុតនៅចក្រភពអង់គ្លេស
ចន្លោះមិនឃើញ
ក្រុមហ៊ុនឧស្ម័ននិងប្រេងឥន្ធនៈរបស់ហូឡង់ Shell បានបើកដំណើរការសេវាកម្មបញ្ចូលថ្មលឿនបំផុតសម្រាប់រថយន្តអគ្គិសនី (Electronic Vehicle)នៅក្បែរក្រុងឡុងដុងនិងក្នុងតំបន់អង់គ្លេសភាគខាងជើង ។ នេះបើយោងតាមការប្រកាសរបស់ក្រុមហ៊ុន ។
សេវាកម្មសាកថ្មរថយន្តអគ្គិសនីនេះអាចផ្ដល់ថាមពលលឿនបំផុតពី ០% ទៅ ៨០% ក្នុងរយៈពេលកន្លះម៉ោង ហើយវាជាជំហានដំបូងរបស់ក្រុមហ៊ុនក្នុងការហក់ចូលក្នុងវិស័យរថយន្តអគ្គិសនីដែលការប្រើប្រាស់សេវាកម្មនេះដើម្បីបំពេញតម្រូវការរបស់អតិថិជនសម្រាប់រថយន្តស្អាតគ្មានជាតិពុល ។ ក្រុមហ៊ុន Shell នឹងពង្រីកសេវាកម្មនេះបន្ថែមក្នុងអង់គ្លេស ហូឡង់ និងប្រទេសហ្វីលីពីន ។ ការបើកដំណើរការនេះកើតឡើងក្រោយពេលក្រុមហ៊ុនអាយុជាង ១០០ ឆ្នាំនេះបានទិញ NewMotion ដែលជាប្រព័ន្ធសាកថ្មរថយន្តអគ្គិសនីធំជាងគេមួយក្នុងចំណោមប្រព័ន្ធផ្សេងទៀតរបស់អឺរ៉ុប ។
លោក Jane Linsay-Green អ្នកគ្រប់គ្រងឥន្ធនៈអនាគតប្រចាំ Shell នៅអង់គ្លេសប្រាប់អ្នកកាសែតថា៖ “ក្រុមហ៊ុន Shellជឿជាក់ថា រថយន្តអគ្គិសនីនឹងក្លាយជាផ្នែកមួយដ៏សំខាន់នៃការបោះជំហានឆ្ពោះទៅមុខហើយនៅឆ្នាំ ២០១៨ យើងនឹងពង្រីកអាជីវកម្ម ផ្អែកលើអ្វីដែលអតិថិជនរបស់យើងត្រូវការ” ។ ក្រុមហ៊ុនព្យាករណ៍ថា១ភាគ៤នៃចំនួនរថយន្តទូទាំងពិភពលោកនឹងប្រែរូបរាងទៅជាអគ្គិសនីពេញលេញនៅឆ្នាំ ២០៤០ ជាក់ជាមិនខានខណៈបច្ចុប្បន្នមានរថយន្តអគ្គិសនីមិនតិចជាង ១០០ ០០០ គ្រឿងកំពុងចរាចរណ៍លើដងផ្លូវ ។ ទន្ទឹមគ្នានេះដែរក្រុមហ៊ុនសេវាកម្មហិរញ្ញវត្ថុ Morgan Stanley បានប៉ាន់ប្រមាណថាស្ថានីយ៍សាកថ្មអាចនឹងមានពី ១ លានទៅ ៣ លានកន្លែងក្នុងតំបន់អឺរ៉ុបខាងលិចនៅឆ្នាំ ២០៣០ ដើម្បីបំពេញតម្រូវការដែលកើនឡើងជាបន្តបន្ទាប់ ។
យ៉ាងណាមិញអតិថិជនដែលប្រើសេវាកម្ម Shell Recharge ត្រូវបង់ ០,៦៥ដុល្លារ ក្នុង១គីឡូវ៉ាត់ម៉ោងបន្តាប់ពីបញ្ចប់ការផ្សព្វផ្សាយលក់ជាពិសេស (Promotion) ០,៣៣ ដុល្លារក្នុងគីឡូវ៉ាត់ម៉ោងផ្ដល់ជូនរហូតដល់ដំណាច់ខែមិថុនាឆ្នាំ ២០១៨ ។ ពួកគេបង់តាមរយៈកម្មវិធី (app) មានក្នុងទូរសព្ទ ។ សេវាកម្មនេះនឹងមាននៅឯទីតាំងក្នុងប្រទេសអង់គ្លេស១០កន្លែងនៅចុងឆ្នាំ ២០១៧ ។ គួរបញ្ជាក់ថា ក្រុមហ៊ុន Shell ធ្លាប់បានផ្តល់សាកថ្មរថយន្តអគ្គិសនីជាមួយដៃគូក្នុងប្រទេសន័រវែស ហើយនៅដើមឆ្នាំ ២០១៧ នេះខ្លួនបានបើកស្ថានីយ៍ចាក់ប្រេងអីដ្រូសែនក្នុងអង់គ្លេសផងដែរ ៕
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
