បុគ្គលិករោងចក្រដំឡើង iPhone នៅចិននាំគ្នាតវ៉ារឿងមិនផ្ដល់ប្រាក់រង្វាន់
- 2017-10-20 13:05:16
- ចំនួនមតិ 0 | ចំនួនចែករំលែក 0
បុគ្គលិករោងចក្រដំឡើង iPhone នៅចិននាំគ្នាតវ៉ារឿងមិនផ្ដល់ប្រាក់រង្វាន់
ចន្លោះមិនឃើញ
ក្រុមឃ្លាំមើលពលកម្មការងារចិន China Labor Watch មានមូលដ្ឋាននៅក្រុងញីវយ៉កឱ្យដឹងកាលពីថ្ងៃព្រហស្បតិ៍ម្សិលមិញថា បុគ្គលិករាប់រយនាក់បាននាំគ្នាតវ៉ាលើដងផ្លូវដោយបិទច្រកចូលរោងចក្រដំឡើង iPhone របស់ក្រុមហ៊ុន Apple នៅភាគខាងកើតប្រទេសចិនលើករណីមិនបើកប្រាក់រង្វាន់ឱ្យបុគ្គលិក។
ប្រហែលបុគ្គលិក ៦០០ នាក់នាំគ្នាតវ៉ាក្រោយពួកគេមិនទទួលបានប្រាក់រង្វាន់តាមដែលក្រុមហ៊ុនសន្យា ។ បុគ្គលិកម្នាក់ក្នុងចំណោមបុគ្គលិកជួបបញ្ហានេះត្រកូល Zhang និយាយថា រូបលោកត្រូវបានរោងចក្រសន្យាផ្តល់ឱ្យនូវប្រាក់រង្វាន់រហូតដល់ ១ ០៥៦ ដុល្លារបើសិនជាបន្តធ្វើការក្នុងរយៈពេល ៤៥ ថ្ងៃហើយជាង ៣ ខែមកហើយលោកមិនទាន់ទទួលបានប្រាក់រង្វាន់ទេ។ ដោយឡែកលោក Tu Changli សន្តិសុខប្រចាំក្រុមហ៊ុន Jabil និយាយថាសហជីពការងារសន្យាឱ្យគាត់ ៣០២ ដុល្លារបើសិនគាត់បន្តយាមរយៈពេលពីរខែប៉ុន្តែលោកមិនទទួលបានប្រាក់។
ការតវ៉ានេះកើតឡើងកាលពីរាត្រីថ្ងៃពុធនៅឯរោងចក្រ Green Point របស់ក្រុមហ៊ុន Jabil Inc. ស្ថិតក្នុងក្រុង Wuxi បានញ៉ាំងឱ្យក្រុមហ៊ុន Apple បើកការស៊ើបអង្កេតនិងដោះស្រាយបញ្ហាទូទាត់ខុសគ្នា ។ ក្រុមហ៊ុន Apple និយាយក្នុងសារអេឡិចត្រូនិកទៅកាន់ China Labor Watch ថា យើងកំពុងស្នើឱ្យក្រុមហ៊ុន Jabil បញ្ជូនក្រុមស្ទង់មតិជាក់លាក់មួយដើម្បីបញ្ជាក់ពីចំណុចដែលមានគម្លាតក្នុងការទូទាត់ហើយពួកគេត្រូវតែបង្កើតផែនការសកម្មភាពដោយធានាថា បុគ្គលិកទាំងអស់ត្រូវបានផ្ដល់ជូនប្រាក់រង្វាន់ដែលក្រុមហ៊ុនសន្យាផ្ដល់ឱ្យពួកគេ ។ ពាក់ព័ន្ធនឹងករណីនេះក្រុមហ៊ុន Jabil និយាយក្នុងសេចក្ដីថ្លែងការណ៍នៅល្ងាចថ្ងៃព្រហស្បតិ៍ថា ខ្លួនធានាឱ្យបានថាគ្រប់បុគ្គលិកគ្រប់គ្នាត្រូវបានផ្តល់ប្រាក់រង្វាន់ដោយយុត្តិធម៌និងទាន់ពេលវេលា៕