Conte ថា "គ្រូបង្វឹកទាំងអស់គួរគិតពីក្រុមខ្លួនឯងបានហើយ កុំគិតក្រុមគេ"
- 2017-10-20 14:20:15
- ចំនួនមតិ 0 | ចំនួនចែករំលែក 0
Conte ថា "គ្រូបង្វឹកទាំងអស់គួរគិតពីក្រុមខ្លួនឯងបានហើយ កុំគិតក្រុមគេ"
ចន្លោះមិនឃើញ
អម្បាញ់មិញនេះ អ្នកចាត់ការក្លឹបតោខៀវ Chelsea លោក Antonio Conte បាននិយាយថាគ្រូបង្វឹកទាំងអស់គួរតែចាប់អារម្មណ៍រឿងក្រុមខ្លួនឯងបានហើយ។ នេះជាការឆ្លើយតបរបស់លោក Conte ជាថ្មីមួយទៀតទៅលើលោក Jose Mourinho ដែលកាលពីពេលថ្មីនេះនិយាយថា អ្នកចាត់ការខ្លះតែងតែត្អូញហើយត្អូញទៀតរឿងកីឡាកររបួស។
កាលពីពាក់កណ្ដាលសប្ដាហ៍នេះ លោក Conte បាននិយាយឆ្លើយតបបែបប្រតិកម្មម្ដងរួចហើយទៅលើពាក្យសម្ដីរបស់លោក Mourinho ទាក់ទងនឹងកីឡាកររបួសហ្នឹង ដោយលោកថា លោក Mourinho គួរតែគិតតែលើក្រុមខ្លួនឯងហើយ កុំគិតលើ Chelsea ដែលជាក្រុមរបស់លោកទៀត។
ដោយឡែកក្នុងថ្ងៃនេះ ពេលសួរថាតើលោកស្ដាយក្រោយទេដែលនិយាយបែបនេះទៅលើ Mourinho អ៊ីចឹង លោក Conte ឆ្លើយថា៖ "ស្ដាយក្រោយ? ម៉េចក៏គ្រូបង្វឹកជាច្រើនអាចគិតតែអំពីក្រុមខ្លួនឯងបាន ហើយម៉េចបានគ្រូបង្វឹកខ្លះទៀតធ្វើមិនបាន។ ចម្លើយរបស់ខ្ញុំនៅដដែល គ្រូបង្វឹកទាំងអស់គួរតែយកចិត្តដាក់លើក្រុមខ្លួនឯងបានហើយ។ នេះជាវិធីដ៏ល្អបំផុត"។ ពេលអ្នកសារព័ត៌មានសួរបន្ថែមថា តើលោកធុញទ្រាន់នឹងលោក Mourinho ទេ អ្នកចាត់ការអ៊ីតាលីរូបនេះតបថា៖ "ខ្ញុំគិតថានេះជាសំណួរឆ្កួតបំផុត។ វាជារឿងគួរឲ្យអស់សំណើចដែលអ្នកឯងចាប់អារម្មណ៍រឿងហ្នឹង"។
គួរបញ្ជាក់ផងដែរថា Chelsea កំពុងជួបវិបត្តិរបួសយ៉ាងខ្លាំងបន្ទាប់ពីកីឡាករឆ្នើមៗដូចជា N'Golo Kante, Danny Drinkwater, Victor Moses, David Luiz ជាដើម សុទ្ធតែនឹងមិនអាចជួយក្រុមបានទេក្នុងការប្រកួតខាងមុខ ដោយសាររបួស៕
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
