KMH Champions League ចែកពូលរួចរាល់ នឹងប្រកួតនៅថ្ងៃទី២៨ខាងមុខតទៅ

2017-10-22 02:30:21
ចំនួនមតិ 0 | ចំនួនចែករំលែក 0

ចន្លោះមិនឃើញ

ព្រឹត្តិការណ៍បាល់ទាត់ពាក់កណ្តាលអាជីពធំជាងគេបង្អស់នៅកម្ពុជា KMH Champions League រដូវកាលទី៣ នឹងដំណើរការចាប់ពីថ្ងៃទី២៨ ខែតុលា ឆ្នាំ២០១៧ នេះតទៅហើយ។ នេះបើយោងតាមលោក កាំង សេន នាយកគណៈកម្មាធិការបាល់ទាត់ ខេ អឹម អេច ក្នុងកម្មវិធីចាប់ពូលកាលពីម្សិលមិញ។

លោក កាំង សេន

លោក កាំង សេន បាននិយាយថាការប្រកួត KMH Champions League រដូវកាលទី៣នេះ មានការចូលរួមពីក្រុមបាល់ទាត់ល្អៗ និងធំៗ មកពីទូទាំងរាជធានីភ្នំពេញ សរុប ៣២ ក្រុម ។ ការប្រកួតបាល់ទាត់ដណ្តើមពាន KMH Champions League រដូវកាលនេះ នឹងត្រូវបែងចែកចេញជា ៤ពូល ដែលក្នុងមួយពូលៗមាន ៨ក្រុម ហើយនឹងធ្វើឡើងពេញមួយរដូវកាល។ ការប្រកួតមានលក្ខណៈប្រហាក់ប្រហែលនឹងពានបាល់ទាត់អឺរ៉ុប គឺប្រកួតលក្ខណៈក្នុងនិងក្រៅទឹកដី (Home & Away)។

ព្រឹត្តិការណ៍នេះផងដែរ នឹងអនុញ្ញាតឲ្យកីឡាករអាជីពចូលរួមមួយក្រុម២រូប កីឡាករបរទេស៤រូបប៉ុន្តែអាចលេងលើទីលានត្រឹមតែ២រូបប៉ុណ្ណោះ ។ KMH Champions League រដូវកាលទី៣នេះ នឹងកាន់តែមានសភាពអស្ចារ្យជាងឆ្នាំមុន ព្រោះមានទាំងការផ្សាយបន្តផ្ទាល់លើទំព័របណ្តាញទំនាក់ទំនងសង្គមហ្វេកប៊ុក ព្រមជាមួយនឹងរង្វាន់យ៉ាងច្រើនអស្ចារ្យ សរុបជាង ១០០លានរៀល។

KMH Champions League ត្រូវបានបង្កើតឡើងក្នុងឆ្នាំ២០១៥ ដោយច្របាច់បញ្ចូលគ្នា រវាងក្រុមបាល់ទាត់ល្អៗ និងធំៗ មកពីទូទាំងរាជធានីភ្នំពេញ ។ KMH Champions League បង្កើតឡើងក្នុងបំណងចូលរួមលើកកម្ពស់ និងអភិវឌ្ឍវិស័យបាល់ទាត់នៅកម្ពុជាផ្តល់ឪកាសដល់យុវជនកម្ពុជាក្នុងការអភិវឌ្ឍទេពកោសល្យ ក៏ដូចជាបង្ហាញសមត្ថភាពរបស់ខ្លួន និងប្រមូលលុយសប្បុរសធម៌ដើម្បីជួយដល់សង្គម។ ជាក់ស្តែង តាមរយៈ KMH Champions League និង KMH Cup រដូវកាលកន្លងមកនេះ ធ្លាប់ប្រមូលប្រាក់ជូនមន្ទីរពេទ្យគន្ធបុប្ផាជាដើម។

សូមបញ្ជាក់ថាចំពោះប្រាក់រង្វាន់សម្រាប់ពានរង្វាន់ KMH Champions League ខាងលើ ក្រុមលេខ១បាន៤៨លានរៀល ក្រុមលេខ២បាន២៤លានរៀល ក្រុមលេខ៣បាន១២លានរៀល ក្រុមលេខ៤បាន៦លានរៀល។ ពាននេះដែរ សម្រាប់ក្រុមណាដែលធ្លាក់ត្រឹមវគ្គ១៦ក្រុម នឹងទទួលបានរង្វាន់លើកទឹកចិត្ត ១លាន២សែនរៀល ធ្លាក់ត្រឹមវគ្គ៨ក្រុមបាន ២លាន ៤សែនរៀល៕

អត្ថបទ៖ មុន្នីរម្យ