វិភាគ ជឿទេ វឌ្ឍនាកា លេងឲ្យ Fujieda ៧នាទីម្សិលមិញជាសញ្ញាល្អ?

2017-10-23 06:04:13
ចំនួនមតិ 0 | ចំនួនចែករំលែក 0

ចន្លោះមិនឃើញ

ចាន់ វឌ្ឍនាកា បានបង្ហាញខ្លួនលើកដំបូងឲ្យក្រុម Fujieda MYFC ក្នុងក្របខណ្ឌលីគបាល់ទាត់ជប៉ុនលំដាប់ទី៣កាលពីម្សិលមិញ បន្ទាប់ពីទៅប្រកបអាជីពនៅទីនោះបានរយៈពេលជិតមួយរដូវកាលហើយ។

ចាន់ វឌ្ឍនាកា

ចាប់តាំងពីខ្ចីជើងទៅទឹកដីជប៉ុនកាលថ្ងៃទី១៣ ខែមករា ឆ្នាំ២០១៧កន្លងមក តារាឆ្នើមជម្រើសជាតិកម្ពុជាមិនបានបង្ហាញខ្លួនផ្លូវការឲ្យក្លឹប Fujieda MYFC ឡើយ។ ពេលខ្លះរូបគេជាប់ឈ្មោះក្នុងបញ្ជីបម្រុង ប៉ុន្តែពេលខ្លះក៏គ្មានឈ្មោះបម្រុងផង។

ថ្វីបើរូបគេមិនបានលេងឲ្យក្លឹបនៅជប៉ុន ប៉ុន្តែកីឡាកររូបនេះហាក់មានសមត្ថភាព បច្ចេកទេស និងកម្លាំងខ្លាំងជាងពេលដែលរូបគេនៅកម្ពុជា។ រាល់ពេលដែលរូបគេមកជួយក្រុមជម្រើសជាតិកម្ពុជាម្តងៗ ស្ទើរគ្រប់ការប្រកួតរូបគេបានជាប់ជម្រើស១១នាក់ដំបូង និងលេងពេញម៉ោងថែមទៀតផងដែលខុសពីរូបគេនៅកម្ពុជាដែលភាគច្រើនលើកវគ្គទី១ ឬប្តូរចូលវគ្គទី២។

យ៉ាងណា ទីបំផុត សមាជិកជម្រើសជាតិកម្ពុជារូបនេះបានបង្ហាញខ្លួនផ្លូវការឲ្យក្លឹបFujieda MYFC កាលពីថ្ងៃទី២២ ខែតុលា ឆ្នាំ២០១៧។ ចាន់ វឌ្ឍនាកាត្រូវបានប្តូរចូលឲ្យលេងត្រឹមនាទី៨៦ និងបន្ថែមម៉ោង៣នាទីទៀត ដូច្នេះរូបគេបង្ហាញខ្លួនលើទីលានបាន៨នាទី។ រយៈពេល៨នាទីនេះ អ្នកគាំទ្របាល់ទាត់កម្ពុជា ក៏ដូចជាអ្នកជាប់ពាក់ព័ន្ធនឹងកីឡាបាល់ទាត់ចាប់អារម្មណ៍យ៉ាងខ្លាំង។ ក្រោយដូរចូលភ្លាម វឌ្ឍនាកាទទួលបានរ៉ាប់រងទាត់បាល់ចេញពីជ្រុង និងគ្រប់គ្រងបាល់នៅពីមុនតំបន់គ្រោះថ្នាក់បានយ៉ាងល្អ ព្រមទាំងចែកបាល់ឲ្យទៅតំបន់ខាងឆ្វែង។ រយៈពេលនៃការគ្រប់គ្រងបាល់នេះ ដៃគូប្រកួតដណ្តើមបាល់ពីរូបគេមិនបានឡើយ។

អ្នកគាំទ្រកម្ពុជាភាគច្រើនបានបញ្ចេញមតិលើបណ្តាញសង្គម Facebook ថា វឌ្ឍនាកា ធ្វើបានល្អ ថ្វីបើរយៈពេលខ្លីក៏ដោយ។ អាចនិយាយបានថា កីឡាករកម្ពុជារូបនេះក្រឡុកខ្លាំងនៅតំបន់គ្រោះថ្នាក់ ឬអាចរកគ្រាប់បាល់បាន ប្រសិនបើរូបគេមានពេលច្រើន។ ខ្លះថែមទាំងលើកឡើងទៀតថា ចាន់ វឌ្ឍនាកា អាចល្អជាងខ្សែប្រយុទ្ធរបស់ Fujieda MYFC ទៀតផងដោយសារខ្សែប្រយុទ្ធទាំងនោះហាក់មិនសូវពូកែក្រឡុកឡើយ។

ជុំវិញករណីនេះដែរ លោក បែ មករា អ្នកចាត់ការរបស់បឹងកេតដែលជាអ្នកយល់ចិត្ត ចាន់ វឌ្ឍនាកាខ្លាំងបានលើកឡើងថា ៖«បានប្តូរចូលលេងរយៈពេលខ្លីមែន ប៉ុន្តែបានបង្ហាញទម្រង់លេងដ៏ល្អ ពួកយើងមានមោទនភាពដែលប្អូនជាខ្មែរទីមួយដែលបានបង្ហាញខ្លួននៅលីគជប៉ុន សោកស្តាយប្រសិនបើបានលេងច្រើនជាងនេះប្រហែលល្អជាងនេះ។ សង្ឃឹមថា លោកគ្រូបង្វឹកមើលឃើញន និងជ្រើសរើសគាត់សម្រាប់ការប្រកួតក្រោយៗទៀត»។

លោកគ្រូ ប្រាក់ សុវណ្ណារ៉ា

ចំណែក លោក ប្រាក់ សុវណ្ណារ៉ា អ្នកជំនាញបាល់ទាត់ម្នាក់បានឲ្យដឹងថា ការលេងបានត្រឹម៨នាទីជាសញ្ញាមួយដ៏ល្អមែនទែន។ កន្លងមក វឌ្ឍនាកា បានត្រឹមបម្រុងអត់បានលេង ហើយពេលខ្លះគ្មានឈ្មោះបម្រុងផង ប៉ុន្តែពេលនេះមានឈ្មោះហើយបានលេងថែមទៀតគឺជាសញ្ញាវិជ្ជមាន។ «ខ្ញុំបានតាមដានមតិមួយចំនួនតាមបណ្តាញសង្គម Facebook ដូចជាលើកឡើងថា មើលស្រាលអាយដលពេកហើយឲ្យលេងត្រឹម៨នាទី តែបើយើងគិតវិជ្ជមានគឺជាឱកាសដ៏ល្អបំផុតដែលគាត់បានបង្ហាញខ្លួន។ សង្ឃឹមថា ក្លឹបនឹងមើលឃើញគាត់ ហើយផ្តល់ឱកាសឲ្យគាត់លើកក្រោយៗទៀត។

ប្រសិនបើលោកគ្រូក្លឹប Fujieda MYFC ពិតជាបានឃើញសមត្ថភាពដ៏ល្អរបស់ ចាន់ វឌ្ឍនាកាកាលពីម្សិលមិញនោះ កីឡាករកម្ពុជារូបនេះនឹងទទួលបានឱកាសកាន់តែច្រើនសម្រាប់ការបង្ហាញខ្លួនប្រកួតបន្តបន្ទាប់ទៀត។ ទោះបីជាពេលខ្ចីជើងនៅសល់មិនច្រើនទៀត ប៉ុន្តែបើ វឌ្ឍនាកាបានបង្ហាញខ្លួនកាន់តែច្រើនសម្រាប់ពេលវេលាសេសសល់ នោះក្លឹបដទៃនឹងកាន់តែមើលឃើញ និងចាប់អារម្មណ៍កាន់តែច្រើនសម្រាប់អនាគតរបស់គេ៕