អ្នកលក់ដូរនៅអាងទឹកត្រពាំងថ្ម ត្អូញត្អែរពីចំណូលធ្លាក់ចុះពាក់កណ្ដាល ខណៈភ្ញៀវទៅលេងច្រើន

2017-10-24 05:24:30
ចំនួនមតិ 0 | ចំនួនចែករំលែក 0

ចន្លោះមិនឃើញ

រមណីយដ្ឋានអាងទឹកត្រពាំងថ្ម ស្ថិតនៅក្នុងភូមិត្រពាំងថ្ម ឃុំប៉ោយចារ ស្រុកភ្នំស្រុក ខេត្តបន្ទាយមានជ័យ កំពុងទាក់ទាញភ្ញៀវទេសចរណ៍ខ្លាំង ប៉ុន្តែ អ្នកលក់ដូរ ត្អូញត្អែរអំពីការរកប្រាក់ចំណូលទៅវិញ។ តើមានមូលហេតុអ្វី?

ថ្វីត្បិតតែភ្ញៀវទេសចរទៅលេងច្រើន ប៉ុន្ដែ ចំនួនអ្នកលក់ដូរ កាន់តែច្រើនឡើងដែរ ដោយធ្វើឲ្យអ្នកលក់ដូរបាត់បង់ចំណូល។ នេះជាមូលហេតុមួយក្នុងចំណោមមូលហេតុជាច្រើនទៀត ដែលអ្នកស្រី មិញ សុភា អ្នកលក់ដូរនៅរមណីយដ្ឋានត្រពាំងថ្ម ប្រាប់ Sabay កាលពីពេលថ្មីៗនេះ។

អ្នកស្រី មិញ សុភា

«សព្វថ្ងៃខ្ញុំអាចរកចំណូលបានចន្លោះពី ៤០ម៉ឺន ទៅ ៥០ម៉ឺនរៀល ក្នុង១ថ្ងៃ ក្នុងថ្ងៃធម្មតា ប៉ុន្ដែចំណូលនេះធ្លាក់ចុះជាងមុនពាក់កណ្ដាល»។ ស្ត្រីវ័យប្រមាណជា ៤០ ឆ្នាំ និយាយ។

ទាក់ទងនឹងការធ្លាក់ចុះប្រាក់ចំណូលនេះ អ្នកស្រី សុភា បានពន្យល់ថា កាលពីអំឡុងឆ្នាំ ២០០០ ពេលមកលក់ដូរដំបូងនៅរមណីយដ្ឋាននេះ មិនសូវមានអ្នកលក់ដូរនោះទេ មានតែ ២ ឬ ៣ តូប ប៉ុណ្ណោះ ដូច្នេះ ក្នុង១ថ្ងៃ អាចលក់មាន់មិនក្រោម ៤០ក្បាលទេ ក្នុង១ថ្ងៃ ប៉ុន្តែ ឥឡូវធ្លាក់ចុះ ព្រោះតែមានអ្នកលក់ដូរកាន់តែច្រើនឡើងជាងមុន។

ទោះយ៉ាងណាក៏ដោយ អាជីវករ លក់ម្ហូបអាហារនៅរមណីយដ្ឋានត្រពាំងថ្ម ជិត ២០ឆ្នាំ រូបនេះ បានអំពាវនាវឲ្យភ្ញៀវទៅលេងតំបន់នេះឲ្យកាន់តែច្រើន ដើម្បីជួយជីវភាពអ្នកភូមិ ហើយថា តម្លៃម្ហូបអាហារ លក់សមរម្យទេ។

មានអាំង ២៥ ០០០-៣០ ០០០ រៀល
ត្រីអាំង ១០ ០០០-១៥ ០០០ រៀល
សម្លកុម្ម៉ង់ ដូចជា មាន់ស្ងោរ ២០ ០០០ – ៣០ ០០០ រៀល

រមណីយដ្ឋានអាងទឹកត្រពាំងថ្ម មានចម្ងាយប្រមាណជា ៥៦គីឡូម៉ែត្រ ពីខេត្តបន្ទាយមានជ័យ និង ៤១៦ គីឡូម៉ែត្រ ពីរាជធានីភ្នំពេញ។ លក្ខណៈពិសេសនេះរមណីយដ្ឋាននេះ គឺមានអាងទឹកធំ ខ្យល់អាកាសបរិសុទ្ធ សម្បូរម្ហូបអាហារ និង ភ្ញៀវអាចជួលទូកជិះ គយគន់ផ្ទៃទឹកផង និង ទស្សនាសត្វស្លាប ជាច្រើន នៅទីនោះ៕

ព័ត៌មានពាក់ព័ន្ធផ្សេងទៀត៖