ឯម រៀម និយាយពីការលក់គំនូរ កាលបើកវិចិត្រសាលដំបូង និងបច្ចុប្បន្ន ខុសគ្នាមេឃដី
- 2017-10-24 23:15:00
- ចំនួនមតិ 0 | ចំនួនចែករំលែក 0
ឯម រៀម និយាយពីការលក់គំនូរ កាលបើកវិចិត្រសាលដំបូង និងបច្ចុប្បន្ន ខុសគ្នាមេឃដី
ចន្លោះមិនឃើញ
វិចិត្រករដែលមានពហុជំនាញ លោក ឯម រៀម ត្រូវបានគេដាក់រហស្សនាមថាជាបណ្ឌិតច្នៃម៉ូដ បានរម្លឹកពីការលក់គំនូររបស់ខ្លួនកាលពីបើកវិចិត្រសាលដំបូងប្រៀបនឹងបច្ចុប្បន្នថា ខុសគ្នាដូចមេឃ និងដី។
នៅពេលក្រុមការងារ Sabay សាកសួរពីការលក់គំនូរ ក្នុងមួយថ្ងៃបានប៉ុន្មានផ្ទាំង បណ្ឌិតច្នៃម៉ូដ ឯម រៀម បាននិយាយថា បច្ចុប្បន្ននេះមិនសូវដាច់ទេ បើប្រៀបធៀបកាលពីបើកវិចិត្រសាលដំបូង។ លោករម្លឹកថា ក្រោយពីបញ្ចប់ការសិក្សាពីប្រទេសបារាំងសិក្សាផ្នែកគំនូរក្នុងអំឡុងឆ្នាំ ២០០៧ លោកក៏បានត្រឡប់មកកម្ពុជាវិញ ហើយបានបើកវិចិត្រសាលផ្ទាល់ខ្លួន នៅទីក្រុងភ្នំពេញ។ លោកថា កាលណោះសេដ្ឋកិច្ចពិភពលោកក៏ដូចជាសេដ្ឋកិច្ចកម្ពុជាមិនទាន់ធ្លាក់ គំនូររបស់លោក លក់ដាច់ដូចលក់នំប៉័ងអីចឹង លោកគូសឹងមិនទាន់ ប៉ុន្តែក្រោយពីមានវិបត្តិសេដ្ឋកិច្ចការលក់ក៏ធ្លាក់ចុះជាលំដាប់មកទល់នឹងសព្វថ្ងៃ។
“កាលពីបើកវិចិត្រសាលដំបូង លក់ដាច់ណាស់ ទាំងគំនូររូបិយនិងអរូបិយ ដូចរូបគំនូរខ្មែរក្រហមអីហ្នឹង មិនដែលចេះសល់ទេ ដាក់ប៉ុន្មានអស់ប៉ុណ្ណឹង ភ្ញៀវទិញអស់ៗ តែបើប្រៀបមកឥឡូវវិញមិនបាច់និយាយទេ ខុសគ្នាដូចមេឃហើយនឹងដីអីចឹង កុំថាឡើយទិញសូម្បីតែចូលមើលក៏មិនសូវមានផង”។
សិល្បកររូបនេះបានទទួលអាហារូបករណ៍ទៅសិក្សានៅប្រទេសបារាំងក្នុងឆ្នាំ២០០០ សិក្សា៧ឆ្នាំ ផ្នែកគំនូរទំនើប គំនូររូបិយ គំនូរអរូបិយ និងគំនូរបែបច្នៃប្រឌិត។ ក្រោយពីបញ្ចប់ការសិក្សានៅទីនោះ លោកក៏បានមកបើកវិចិត្រសាលផ្ទាល់ខ្លួនក្នុងប្រទេសកម្ពុជា សម្រាប់លក់និងដាក់តាំងស្នាដៃរបស់ខ្លួន រហូតដល់សព្វថ្ងៃ។ ចំពោះស្នាដៃរបស់លោកដែលដាក់តាំងក្នុងវិចិត្រសាលនោះ ភាគច្រើនភ្ញៀវទេសចរណ៍បរទេសទិញ ហើយមានមួយចំនួនតូចជាជនជាតិខ្មែរ។