ហាងកាហ្វេមួយដាក់តាំងបក្សីកម្រ សម្រាប់សាធារណជនបានស្គាល់

2017-10-25 06:49:24
ចំនួនមតិ 0 | ចំនួនចែករំលែក 0

ចន្លោះមិនឃើញ

ដើម្បីប្រកួតប្រជែងទីផ្សារ ខណៈដែលហាងកាហ្វេបានបើកអាជីវកម្មជាហូរហែរ ម្ចាស់ហាងកាហ្វេមួយបានរៀបចំតុបតែងហាងរបស់ខ្លួនប្រៀបបីដូចជាសួនសត្វមួយអ៊ីចឹងដែរ ដោយមានចិញ្ចឹមទាំងសត្វស្លាប និងសត្វល្មួន ដោយអះអាងថាជាប្រភេទសត្វដែលពួកគាត់ទិញពីបរទេស និងបង្កាត់ពូជបន្ថែម។

ម្ចាស់ហាងកាហ្វេ Nature Café លោក គ្រុយ សុខលីម លើកឡើងថាលោកចូលចិត្តទេសភាពបែបធម្មជាតិព្រៃភ្នំ ទើបលោកតុបតែងហាងរបស់លោកឲ្យមានទាំងដើមឈើ និងសត្វល្មូន និងបក្សីកម្រមួយចំនួន។ លោកឲ្យដឹងថាសត្វទាំងនោះ មានស្ទាំង ឥន្ទ្រី សេក ពស់ បង្គួយ និងអណ្ដើកជាដើម។

(សត្វសេកទំលើតុកាហ្វេនៅហាងNature Café)

ការតុបតែងហាងបែបនេះក៏បាន ទាក់ចិត្តអ្នកស្រឡាញ់សត្វបក្សីមិនតិចនាក់ផងដែរ។ លោក ស្រូយ ចំរើន ប្រធានក្រុមអ្នកស្រលាញ់សត្វបក្សីដែលមានសមាជិក៦០០នាក់មានប្រសាសន៍ដែរថាសត្វដែលក្រុមលោកចិញ្ចឹមភាគច្រើន ទិញចូលពីបរទេស ហើយជាប្រភេទបក្សីកម្រ មិនងាយជួបប្រទះ ហើយលោកក៏រីករាយ និងមានឆន្ទៈ ក្នុងការបង្ហាញសត្វបក្សីអស់ទាំងនេះឲ្យសាធារណជនទូទៅបានឃើញ និងស្គាល់តាមរយៈហាងការហ្វេមួយនេះ។

ទោះបីជាយ៉ាងនេះក្តី ទាំងម្ចាស់ហាង និងប្រធានក្រុមអ្នកស្រលាញ់សត្វបក្សី បានស្នើដល់មន្ត្រីជំនាញពាក់ព័ន្ធ មេត្តាផ្ដល់បរិយាយកាសទូលាយ ដល់អ្នកស្រលាញ់សត្វបក្សីកម្រៗ ដូចជារូបលោក ដ្បិតសត្វទាំងអស់នេះ មិនមែនជាសត្វ ដែលចាប់យកមកពីព្រៃ ឬធ្វើការជួញដូរខុសច្បាប់នោះឡើយ។ សត្វមួយចំនួនអ្នកទាំងពីរថាត្រូវបានបង្កាត់ និងផ្សាំង ឲ្យក្លាយទៅជាសត្វចិញ្ចឹមសម្រាប់លម្អ ហើយមួយចំនួនទៀត ត្រូវបាននាំចូលពីបរទេស ដែលធ្វើឲ្យប្រភេទសត្វក្នុងស្រុក កាន់តែសម្បូរបែប៕

អត្ថបទដោយ៖ ឈិន ធារ៉ាត់

ប្រភព៖ ៣០ដេលី