របរផលិតកន្ត្រកពីធាងត្នោតរបស់អ្នកខេត្តតាកែវ ប្រឈមនឹងការបាត់បង់

2017-10-26 02:27:22
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកផលិតកន្រ្តកលើកឡើងថារបរធ្វើកន្រ្តកពីធាងត្នោតកំពុងបាត់បង់បន្តិចម្តងៗដោយហេតុផលថាការងារនេះទទួលបានប្រាក់កម្រៃទាប និងម្យ៉ាងអ្នកប្រើប្រាស់មិនសូវពេញនិយមដូចកន្រ្តកជ័រដែលនាំចូលពីបរទេស។

អ្នកភូមិកំពង់ត្រាច ឃុំលាយបូរ ស្រុកត្រាំកក់ ខេត្តតាកែវម្នាក់ដែលបានបោះបង់របរនេះប្រហែល១០ឆ្នាំមកហើយនោះគឺអ្នកស្រី សុខ សុខុន ប្រាប់Sabay ថាជាង១០ឆ្នាំមុនអ្នកភូមិជាច្រើននាក់បានប្រកបរបរនេះ។ ទោះយ៉ាងណាអ្នកស្រីថាពេលនេះ នៅមានប្រហែលជាបីគ្រួសារប៉ុណ្ណោះ។

(កន្រ្តកផលិតពីធាងត្នោតដែលទើបផលិតរូច)

អ្នកស្រីឲ្យដឹងថាមូលហេតុដែលអ្នកស្រីបោះបង់របរនេះគឺ ដោយសារការផលិតកន្រ្តកត្រូវចំណាយពេលយូរ និងទទួលបានកម្រៃតិច និងម្យ៉ាងអ្នកប្រើប្រាស់មិនសូវពេញនិយម។

អ្នកស្រីបន្ថែមៈ «ពិបាកប្រកួតប្រជែងជាមួយកន្រ្តកនាំចូលពីវៀតណាម...ហើយកូនៗគេគ្មានចំណូលចិត្ត គេងាកទៅធ្វើការងារសំណង់ផ្សេងៗវិញ»។

ចំណែកអ្នកស្រី មុំ រ៉េម វ័យ៤៧ឆ្នាំ និងបានប្រកបរបរនេះមិនតិចជាង២០ឆ្នាំមកហើយនោះលើកឡើងថាកូនៗអ្នកស្រីមិនចាប់អារម្មណ៍នឹងការងារធ្វើកន្រ្តកនេះទេ ហើយងាកទៅធ្វើការងាររោងចក្រជំនួសវិញ។

អ្នកស្រីបន្ថែមថាៈ « កូនៗគ្មានអ្នកណាចង់បន្តមុខរបរនេះទេព្រោះវាលំបាកទាំងគ្រួសារតែម្តងជួនកាលត្រូវត្បាញកន្ត្រកទាំងយប់ក៏មានដែរតែចំណូលតិចណាស់ហើយក្នុង១ខែអាចធ្វើកន្រ្តកបានចន្លោះពី៥០ទៅ១០០ប៉ុណ្ណោះ...កូនៗរបស់ខ្ញុំនិយាយថាសុខចិត្តទៅធ្វើការរោងចក្រកាត់ដេរវិញបានចំណូលច្រើនជាង»។

(អ្នកស្រី ហែម គៅ វ័យ៨៣ឆ្នាំ កំពុងអង្គុយត្បាញកន្ត្រងពីធាងត្នោត អ្នកស្រីប្រកបរបរនេះតាំងពីឆ្នាំ១៩៧៩)

ចំណែកអ្នកធ្វើកន្រ្តកម្នាក់ទៀតគឺអ្នកស្រី ហែម គៅ វ័យ៨៣ឆ្នាំ អះអាងថាអ្នកស្រីបានប្រកបរបរនេះតាំងពីឆ្នាំ១៩៧៩មកម្លេះ និងថាដោយមិនចេះជំនាញផ្សេង អ្នកស្រីក៏នៅតែប្រកបបរនេះ។ អ្នកស្រីថាកន្ត្រកមួយលក់បានតម្លៃពី២៥០០រៀល ទៅ៣០០០រៀលប៉ុណ្ណោះខណៈមួយខែអ្នកស្រីធ្វើបានយ៉ាងច្រើន១០០កន្រ្តក។ អ្នកស្រីបញ្ជាក់ថាពេលផលិតបានមានម៉ូយមកទិញដល់ផ្ទះដើម្បីយកទៅលក់បន្តនៅឯផ្សារខេត្ត។

អ្នកស្រីបន្តថាៈ «បើមិនធ្វើពិតជាដាច់បាយមិនខាន»។ អ្នកឲ្យដឹងដែរថាដោយសារតែបានកម្រៃតិចបែបនេះហើយបានជាអ្នកភូមិផ្សេងទៀតឈប់ប្រកបរបរនេះ។

អត្ថបទដោយ៖ ជិន វេន