បងប្រុស វីរៈសិទ្ធ មិនបញ្ឈប់ត្រឹមវីដេអូ Audio ឥឡូវប្រកាសចេញ MV ទៀត
- 2017-10-26 04:47:14
- ចំនួនមតិ 0 | ចំនួនចែករំលែក 0
បងប្រុស វីរៈសិទ្ធ មិនបញ្ឈប់ត្រឹមវីដេអូ Audio ឥឡូវប្រកាសចេញ MV ទៀត
ចន្លោះមិនឃើញ
លោក ម៉ម សំនៀង បងប្រុសបង្កើតរបស់តារាចម្រៀង ដួង វីរៈសិទ្ធ បានប្រាប់ Sabay ឲ្យដឹងថា លោកត្រៀមនឹងចេញវីដេអូចម្រៀង “អូនឧកញ៉ាតី” ឆាប់ៗ ក្រោយបទ Original Song ប្រភេទមនោសញ្ចេតនា ជាស្នាដៃខ្លួនផ្ទាល់មួយនេះ បានធ្វើឲ្យមានការចាប់អារម្មណ៍ពីទស្សនិកជនខ្លាំង។
ប្រសិនបើមិនមានអ្វីប្រែប្រួល វីដេអូចម្រៀងបទមនោសញ្ចេតនាលន្លង់លន្លោចមួយនេះ អាចនឹងចេញនៅសប្ដាហ៍ក្រោយតាមគម្រោង។ លោក ម៉ម សំនៀង ប្រាប់ថា មកទល់នឹងពេលនេះ ការថតបទចម្រៀងខាងលើ បានបញ្ចប់រួចរាល់ហើយ ដោយលោកបានដឹកនាំទៅថតនៅកោះឧកញ៉ាតីផ្ទាល់តែម្ដង ដូចទៅនឹងចំណងជើងបទចម្រៀងដែលនិយាយរៀបរាប់ពីកំណើតស្នេហ៍នៅលើដីកោះ ខណៈតួស្រីក្នុងបទនេះ គឺកញ្ញា ម៉េង យៀកលី។ ការងារដែលនៅសល់ សម្រាប់ការផលិត គឺត្រឹមតែការកាត់តកែសម្រួលផ្នែកបច្ចេកទេសប៉ុណ្ណោះ។
“បទហ្នឹង ខ្ញុំនិពន្ធខ្លួនឯងទាំងទំនុកភ្លេង និងទំនុកច្រៀង ហើយការថត MV គឺខ្ញុំសម្ដែងខ្លួនឯង ខ្ញុំដឹកនាំថតខ្លួនឯងទាំងអស់ ដោយបានទៅថតនៅលើកោះឧកញ៉ាតីផ្ទាល់តែម្ដង ហើយខ្ញុំគ្រោងចេញនៅសប្ដាហ៍ក្រោយនេះហើយបង”។ ម៉ម សំនៀង បន្ថែម។
បទ “អូនឧកញ៉ាតី” គឺជាស្នាដៃ Original Song ដំបូងរបស់លោក សំនៀង ដែលផលិតរួមគ្នាដោយបងប្អូនរួមត្រកូល “ម៉ម” គឺ ម៉ម សំនៀង ម៉ម វាសនា(ដួង វីរៈសិទ្ធ) និងម៉ម ពេជ្ជរិទ្ធ សុទ្ធជាបុគ្គលកំពុងល្បីក្នុងសង្គមសិល្បៈ។ បទនេះដែរ គឺកើតឡើងក្រោយលោកបានចូលរួមប្រឡងចម្រៀងក្នុងកម្មវិធី “សំនៀងឯក”។
អ្នកអត្ថាធិប្បាយទូរទស្សន៍ ដែលកំពុងវិវត្តខ្លួនទៅជាតារាចម្រៀងរូបនេះ ថ្លែងថា “នៅក្នុងការប្រឡង “សំនៀងឯក” ជុំមុននេះ ខ្ញុំបានច្រៀងបទ “កោះឧកញ៉ាតី” ដែលដាក់ឲ្យដោយលោកគ្រូ ណូយ វ៉ាន់ណេត។ ក្រោយច្រៀងបទហ្នឹងហើយ ខ្ញុំមានអារម្មណ៍ថាស្រលាញ់បទហ្នឹង អីចឹងហើយចង់មានអនុស្សាវរីយ៍ជាមួយបទហ្នឹង ទើបសរសេរបទ “អូនឧកញ៉ាតី” នេះឡើងតែម្ដង”។
លោក ម៉ម សំនៀង បច្ចុប្បន្ន គឺជាអ្នកអត្ថាធិប្បាយរបស់ទូរទស្សន៍បាយ័ន ដោយលោកកាន់កម្មវិធីអធិប្បាយពីព្រឹត្តិការណ៍ពិភពលោក។ ដោយមាននិស្ស័យ និងឈាមជ័រជាអ្នកសិល្បៈ លោកក៏បានព្យាយាមវិវត្តខ្លួនមកជាតារាចម្រៀងតាមរយៈការចូលរួមប្រឡងក្នុងកម្មវិធីខាងលើ។ មានសំឡេងផ្អែមស្រទន់ លោក សំនៀង បានយកឈ្នះចិត្តគណៈកម្មការឈានមកក្នុងចំណោមបេក្ខជនសម្រាំង១២នាក់ចុងក្រោយ និងបេក្ខជនសរុបជាង១ពាន់នាក់។
លោក សំនៀង ត្រៀមនឹងប្រកួតប្រជែងសមត្ថភាពជាមួយបេក្ខភាព១១នាក់ផ្សេងទៀត ចំនួន២វគ្គទៀត ដើម្បីដឹងថា នរណាជាម្ចាស់ជយលាភី “សំនៀងឯក” រដូវកាលទី១៕
បទចម្រៀង “អូនឧកញ៉ាតី” របស់លោក ម៉ម សំនៀង