រឿងតូច តែប៉ុនភ្នំ! ត្រូវធ្វើធៀបការមុនប៉ុន្មានខែ កុំឲ្យរត់ឆ្លេឆ្លាវល់ៗដល់ថ្ងៃការ

2017-10-26 10:42:50
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកមានពេលវេលាគ្រប់គ្រាន់ប៉ុណ្ណា មានអ្នកជួយសម្របសម្រួលប៉ុណ្ណា មានអ្នកចាំរត់ការផ្នែកផ្សេងៗក្នុងពិធីមង្គលការខ្លួនឯងដែរឬទេ? បើរត់ការតែកូនកម្លោះក្រមុំ ចឹងអ្នកមានរឿងច្រើនដែល គួរចាត់ចែងមុនដូចជា កក់ហាង (បើមិនបានរៀបចំនៅផ្ទះ) ចុងភៅ សម្អាងការ ក្នុងនោះ រឿងបោះពុម្ភធៀបការជាផ្នែកមួយដែលអ្នកមិនគួររំលង។

បើសិនកូនកម្លោះក្រមុំដេញពេលានៅមានរយៈពេលយូរទៀតទើបរៀបការ ជាការងាយស្រួល សម្រាប់ចាត់ចែងពិធីផ្សេងៗ តែបើកៀកថ្ងៃ អ្នកនឹងពិបាក ព្រោះបើនិយាយរឿងធៀបការវិញ ក៏ត្រូវការចំណាយពេលច្រើនផងដែរ ករណីអ្នកមានភ្ញៀវច្រើនពេលវេលាក៏ផ្អែកទៅតាមនោះដែរ។

"កាលខ្ញុំ គ្រប់យ៉ាងគឺប្រថុចញ៉ុចទាំងអស់ ដំបូងឡើយថាការនៅឆ្នាំក្រោយតែ ដេញចុះដេញឡើង អាចារ្យថាចុងឆ្នាំនេះល្អជាង ចឹងសល់តែប៉ុន្មានខែ រត់ឡើងគ្មានពេលសម្រាក ណាមួយគ្មានអ្នកជួយផង។ ចឹងហោចណាស់គួរតែរៀបចំមុនឲ្យបានកន្លះឆ្នាំ កុំឲ្យជិតដល់ថ្ងៃរៀបការរត់ឆ្វាត់ឆ្វែងចែកជើងគ្នាដូចខ្ញុំ។" នេះបើតាមការលើកឡើងពី អ្នកនាង សិលា បុគ្គលិកផ្សារទំនើបអ៊ីអន ប្រាប់ Sabay មុននេះ។

ប៉ុន្តែសំណាងហើយកន្លែងរោងពុម្ពស្គាល់គ្នាគេឆ្លៀតជួយធ្វើបានលឿនចឹងចំណាយពេលតែជាង១ខែ។ ហើយរឿងសំខាន់ក្រោយពេលបានធៀបការនោះ គឺអញ្ជើញភ្ញៀវ ញាតិមិត្ត គឺកាន់តែកៀកខ្លាំងម៉ង ជួនកាលភ្ញៀវខ្លះទៅម្តងអត់ជួប ចឹងទៅ ច្រើនសារ ម្យ៉ាងបងប្អូនខ្លះនៅឆ្ងាយ ចឹងចំណាយពេលហោចណាស់ក៏២ ឬ ៣ថ្ងៃថែមទៀតដែរ។ សិលា បន្ថែម។

បុគ្គលិកផ្សារទំនើបខាងលើបញ្ជាក់ទៀតថា យល់ល្អបើអ្នកមានគម្រោងរៀបការ ហើយសល់ពេលយូរ គួរតែទៅធ្វើធៀបការឲ្យបានមុនយ៉ាងហោចណាស់ក៏៥ខែដែរ ជួយឲ្យមានភពស្រួលទាំងអ្នកបោះពុម្ភ ទាំងម្ចាស់ការផងដែរ។

ងាកមកលោក ចិត្រា បុគ្គលិកផ្នែកទីផ្សារនៅក្រុមហ៊ុនមួយ ដែលទើបរៀបការថ្មោងថ្មីកាលពីថ្ងៃអាទិត្យមុន ឆ្លើយតបមកយ៉ាងលឿននៅពេលក្រុមការងារបានសួរពាក់ព័ន្ធនឹងការរៀបចំសំបុត្រការ លោកថា៤ខែល្មម។

"៤ ឬ ៥ខែល្មម យើងយកមកហើយនៅដើរអញ្ជើញភ្ញៀវទៀត ម្យ៉ាងធៀបហ្នឹងជួនកាលត្រូវការកែច្រើនដង ព្រោះឈ្មោះភ្ញៀវខ្លះអាចនឹងខុស តិចតួច ចឹងត្រូវកែថ្មី ហើយនៅថែមថយឈ្មោះ ភ្ញៀវខ្លះដែលយើងភ្លេចទៀត។" ចិត្រា បញ្ជាក់តាមរយៈបណ្តាញសង្គមមុននេះ។

ជួបជាមួយម្ចាស់រោងពុម្ភ សុខចេង មានទីតាំងក្បែរសាលាបារាំងវិញលោក បានឲ្យដឹងថា ភាគច្រើនភ្ញៀវមានគ្រប់សណ្ឋាន បានន័យថាមានគ្រប់វេលា ជួនកាលមកធ្វើមុន មួយឆ្នាំ ជួនកាលកន្លះឆ្នាំ ហើយជួនកាលយកប្រញាប់មាន២ខែក៏មាន។

យ៉ាងណាមិញ លោកបានឲ្យជាយោបល់ថា យកល្អគួរតែមកធ្វើមុន ៥ខែ ទើបល្អទាំងសង្ខាង។ ក្នុងនោះលោកបានឲ្យដឹងទៀតថា បើសិនភ្ញៀវ កុម្ម៉ង់ តាមពុម្ពដែលមានស្រាប់គឺស្រួល ត្រឹមរយៈពេល២ខែរួច។ បើកុម្ម៉ង់ម៉ូដផ្សេងអាចចំណាយពេលយូរជាងនេះបន្តិច។

ធម្មតាម៉ូដមានច្រើន អ្នកខ្លះមិនសូវសាំញ៉ាំច្រើន ពួកគេអាចយកដូចពុម្ភដែលមានស្រាប់ ភ្ញៀវខ្លះ ផ្ចិតផ្ចង់ ចង់បានស្អាតនិងទាន់សម័យ ពួកគេរកម៉ូដថ្មីៗ មកច្នៃបន្ថែម ចឹងអាចនឹងយូរគួរសមដែរ សូម្បីតែអក្សរក៏មានច្រើនម៉ូដដែរ មានម៉ូដលិប លៀន ជាដើម៕

អត្ថបទ៖ ថា ម៉ាលីដា