សុខ ទូ អ៊ឹង បូរ៉ា បង្ហាញមុខក្នុងកម្មវិធី CFC គុនខ្មែរអន្តរជាតិ របស់ CNC ខែវិច្ឆិកា

2017-10-31 08:02:49
ចំនួនមតិ 0 | ចំនួនចែករំលែក 0

ចន្លោះមិនឃើញ

ម្ចាស់មេដាយប្រាក់ស៊ីហ្គេម សុខ ទូ(វ៉ាន់ វឿន) នឹងចាប់ដៃ អ៊ឹង បូរ៉ា ដើម្បីប្រជែងយកជ័យជម្នះជាមួយជើងខ្លាំងមកពី៤ប្រទេសផ្សេងគ្នាក្នុងកម្មវិធីប្រដាល់ «CFC គុនខ្មែរអន្តរជាតិ» របស់សង្វៀន CNC នៅថ្ងៃទី៥ ខែវិច្ឆិកា ឆ្នាំ២០១៧ ខាងមុខនេះ។

លោក ហួរ រតនៈ

លោក ហួរ រតនៈ ប្រធានទីផ្សាររបស់ទូរទស្សន៍ CNC បានឲ្យដឹងក្នុងកម្មវិធីសន្និសីទសារព័ត៌មានថា បន្ថែមទៅលើការប្រកួតរាល់សប្ដាហ៍នាពេលបច្ចុប្បន្ននេះ លោកក៏ដូចជាក្រុមការងារតែងតែព្យាយាមបង្កើតកម្មវិធីថ្មីៗ លើកស្ទួយវិស័យប្រដាល់ឲ្យកាន់តែរីកសុះសាយ និងប្លែកអារម្មណ៍សម្រាប់អ្នកនិយមប្រដាល់ផងដែរ។ «CFC គុនខ្មែរអន្តរជាតិ» ជាកម្មវិធីថ្មីមួយទៀត ដែលមានជើងខ្លាំងរបស់កម្ពុជា ២រូប រួមនិងជើងឯកមកពីប្រទេស ថៃ ចិន ប្រេស៊ីល និង ជប៉ុន ត្រូវប្រកួតមិត្តភាពអន្តរជាតិផ្លាស់ប្ដូរបទពិសោធគ្នាទៅវិញទៅមកផងដែរ។

លោក តែម ម៉ឺន ប្រធានសហព័ន្ធគុនខ្មែរ

ប្រធានទីផ្សាររូបនេះ ក៏សូមឲ្យអ្នកនិយមវិស័យប្រដាល់ទាំងអស់កុំភ្លេចចូលរួមទស្សនា ក៏ដូចជាគាំទ្រលើកទឹកចិត្តកីឡាករកម្ពុជាដើម្បីទទួលបានជ័យជម្នះនាជំនួបមិត្តភាពនាដើមខែវិច្ឆិកានេះ។ លោក ហួរ រតនៈ ក៏ថ្លែងអំណរគុណដល់ភោជនីយដ្ឋាន Samba Steak ដែលមានលក់ម្ហូបដ៏មានរសជាតិឆ្ងាញ់ ព្រមទាំងសាច់គោស្រស់ៗចម្អិនបែបលក្ខណៈពិសេសតាមក្បួនប្រេស៊ីល ដែលបានរួមសហការបង្កើតកម្មវិធីប្រដាល់នេះឡើង។

លោក តែម ម៉ឺន ប្រធានសហព័ន្ធគុនខ្មែរបានលើកឡើងនាឱកាសនោះដែរថា សម្រាប់សហព័ន្ធរបស់លោកបានរៀបចំសហការរួចរាល់ហើយចំពោះការប្រកួតមិត្តភាពអន្តរជាតិមួយនេះ កីឡាករបានកំពុងហ្វឹកហាត់ត្រៀមបានយ៉ាងល្អ រីឯមន្ត្រីបច្ចេកទេស ឬចៅក្រមអាជ្ញាកណ្ដាលក៏គ្នានេះដែរ។

លោក ស៊ីថូ ណាថាន់

កម្មវិធីប្រដាល់ CFC គុនខ្មែរអន្តរជាតិនេះមានកីឡាករ៨រូបចូលរួមក្នុងនោះកម្ពុជា ២រូប ថៃ២រូប និង ជប៉ុន ចិន ប្រេស៊ីល ម្នាក់១រូប។ កម្មវិធីប្រកួតនេះធ្វើឡើងនៅសង្វៀន CNC ឫស្សីកែវ ចាប់ពីម៉ោង ៧យប់តទៅ នាថ្ងៃទី៥ ខែវិច្ឆិកា ឆ្នាំ២០១៧នេះ ហើយសំបុត្រចូលទស្សនា ៥ដុល្លារអាមេរិក កន្ទុយសំបុត្រអាចដូរយកម្ហូបបរិភោគពេលប្រកួតនោះបាន៕

អត្ថបទ៖ នួន ស៊ីណា