បាត់មុខជិត២ឆ្នាំ ឈាន ហុង ទៅធ្វើកម្មកររោងចក្រនៅប្រទេសថៃ
- 2017-11-01 03:42:44
- ចំនួនមតិ 0 | ចំនួនចែករំលែក 0
បាត់មុខជិត២ឆ្នាំ ឈាន ហុង ទៅធ្វើកម្មកររោងចក្រនៅប្រទេសថៃ
ចន្លោះមិនឃើញ
អតីតកីឡាករជើងខ្លាំង ឈាន ហុង បាត់មុខជិត២ឆ្នាំកន្លងទៅនេះ គឺធ្វើការជាកម្មករនៅឯប្រទេសថៃនោះទេ តែឥលូវវិលមករកសង្វៀនគុនខ្មែរវិញហើយ ព្រោះនៅជាប់ចិត្តនិងវិស័យមួយនេះ។
កីឡាករ ឈាន ហុង បានឲ្យដឹងថា បន្ទាប់ពីរៀបការរួចមក ប្រពន្ធឃើញខ្លួនឡើងសង្វៀនម្ដងៗពិបាកខ្លាំងពេក មានចិត្តអាណិតប្ដីទើបសម្រេចសុំឲ្យឈប់ឡើងសង្វៀនតែម្ដង ហើយក៏នាំគ្នាទៅធ្វើកម្មកររោងចក្រធុងបាសឯប្រទេសថៃ។ បើបូកសរុបប្រាក់ខែទាំងពីរនាក់ប្ដីប្រពន្ធ ពួកគេអាចទទួលបានរហូតដល់ទៅជាង៣ម៉ឺនបាតផងដែរ។
កូនសិស្សលោកគ្រូ ធន់ សុភា រូបនេះបន្តថា ដោយឃើញរាល់ការប្រកូកតាមហ្វេសបុកកន្លងមក ធ្វើឲ្យអ្នកប្រដាល់របស់កម្ពុជាម្នាក់នេះហាក់ចង់ឡើងសង្វៀនជាថ្មី ទើបសុំប្រពន្ធចូលប្រឡូកនិងអាជីពមួយនេះឡើងវិញតែម្ដង ណាមួយបច្ចុប្បន្ននេះក៏ទទួលបានប្រាក់ចំណូលច្រើនគួរសមដែរ។ ការវិលចូលសង្វៀនជាថ្មី ឈាន ហុង ប្ដេជ្ញាចិត្តនឹងខំប្រឹងហ្វឹកហាត់ ដើម្បីស្ដារមុខមាត់ឡើងវិញក្នុងអាជីពឈឺខ្លួនមួយនេះ។
កីឡាករ ឈាន ហុង ទើបតែឡើងសង្វៀនបានពីរប្រកួតប៉ុណ្ណោះ បន្ទាប់ពីឈប់ជិត ២ឆ្នាំកន្លងទៅនេះ ការប្រកួតលើកទី១ ឈ្នះពិន្ទុ ឈិន ក្វាន់ងុយ និងទី២ ចាញ់ពិន្ទុកីឡាករថៃ កាលពីថ្ងៃអាទិត្យ ទី២៩ ខែតុលា ឆ្នាំ២០១៧ នៅសង្វៀនបាយ័នស្ទឹងមានជ័យ៕