អ្នកភូមិពីរគ្រួសារអភិរក្ស សត្វក្រសាជិត៤០ឆ្នាំ
- 2017-11-01 07:00:38
- ចំនួនមតិ 0 | ចំនួនចែករំលែក 0
អ្នកភូមិពីរគ្រួសារអភិរក្ស សត្វក្រសាជិត៤០ឆ្នាំ
ចន្លោះមិនឃើញ
ប្រជាពលរដ្ឋចំនួនពីរគ្រួសារនៅភូមិមួយក្នុងខេត្តតាកែវបានអភិរក្សសត្វក្រសារជាងជិត៤០ឆ្នាំ មកហើយនៅក្នុងដីភូមិរបស់ពួកគាត់ ដោយថាការអភិរក្សនេះកើតចេញពីចិត្តស្រឡាញ់សត្វ និងម្យ៉ាងថាប្រភេទសត្វទាំងនេះធ្លាប់បានរស់នៅក្នុងដីភូមិរបស់ពួគគាត់តាំងពីសម័យសង្គមរាស្រ្តនិយម។
អ្នកស្រី យី ណាំ វ័យ៦៤ឆ្នាំ រស់នៅភូមិវល្លិ ឃុំស្រែរនោង ស្រុកត្រាំកក់ ថ្លែងឲ្យSabay ដឹងថាសត្វដែលរស់នៅក្នុងដីភូមិអ្នកស្រី និងអ្នកជិតខាងម្នាក់ទៀតនេះមានប្រហែលជា៥០ទៅ៦០ក្បាល។
អ្នកស្រីថាអ្នកស្រីមិនអនុញ្ញាតឲ្យមានការបរបាញ់សត្វកម្រនេះទេ ដោយថាអ្នកស្រីចាត់ទុកសត្វទាំងនេះបីដូចជាសមាជិកគ្រួសារអ៊ីចឹងដែរ។
អ្នកស្រីបន្តថាៈ « ជាញឹកញយនៅពេលមានខ្យល់ខ្លាំងម្តងៗកូនសត្វតូចៗបានធ្លាក់ពីសំបុកលើចុងត្នោតមកខ្ញុំអាណិតណាស់ហើយក៏រើសវាមកចិញ្ចឹមទិញត្រីបញ្ចុកចំណីឲ្យវាស៊ីរហូតដល់ធំក៏លែងវាទៅវិញ»។
ចំណែកអ្នកស្រី លី ស៊ាវ វ័យ៥៥ឆ្នាំ ដែលមានលំនៅដ្ឋានជាប់គ្នានោះឲ្យដឹងថាកាលពីអ្នកស្រីនៅក្មេងៗក្នុងដីភូមិនេះមានដើមឈើទាលធំមួយដើមដែលថាជាជម្រករបស់សត្វក្រសា និងសត្វមួយចំនួនទៀត។ អ្នកស្រីបន្តថាលុះក្រោយរបបខ្មែរក្រហមដួលរលំ អ្នកស្រីមករស់នៅក្នុងភូមិកំណើតវិញ ហើយនៅតែឃើញសត្វទាំងនេះរស់នៅដដែលបើទោះជាដើមឈើទាលនោះបានបាត់បង់ជីវិតទៅហើយក្តី។
អ្នកស្រីបញ្ជាក់ថាបច្ចុប្បន្ន សត្វក្រសាបានរស់នៅលើដើមត្នោត និងដើមឈើទាលក្នុងភូមិនេះ និងបានទៅរកចំណីនៅបឹងស្រែរនោងនៅខាងត្បូងភូមិនេះ។
អ្នកស្រីបន្ថែមថាៈ «កន្លងមកមានអ្នកលួចមកប្រមាញ់ថ្ងៃក៏មានយប់ក៏មានតែខ្ញុំមិនខ្លាចនិងស្តីថាឲ្យអ្នកទាំងនោះទេព្រោះខ្ញុំអាណិតស្រលាញ់សត្វទាំងនេះប្រៀបដូចកូនយើងកូនគេអញ្ចឹង»។
អ្នកស្រីទាំងពីរចង់ឲ្យអាជ្ញាធរនិងភាគីពាក់ព័ន្ធជាពិសេសប្រជាពលរដ្ឋយកចិត្តទុកដាក់រួមគ្នាអភិរក្សបក្សីប្រភេទនេះដើម្បីឲ្យនៅគង់វង្សជាប្រយោជន៍ឲ្យក្មេងៗជំនាន់ក្រោយបានស្គាល់៕
ចុចអាន៖