ពលរដ្ឋខ្លះខ្វះការប្រុងប្រយ័ត្នរឿងទុកដាក់សំរាម ខណៈអាជ្ញាធរប្រឹងសំអាត

2017-11-03 06:44:22
ចំនួនមតិ 0 | ចំនួនចែករំលែក 0

ចន្លោះមិនឃើញ

នៅពេលមានកម្មវិធីបុណ្យទានធំៗម្ដង ជាពិសេសថ្ងៃបុណ្យអុំទូក ប្រជាពលរដ្ឋស្ទើរគ្រប់បណ្ដាខេត្តឡើងមកកាន់រាជធានីភ្នំពេញដើម្បីដើរកម្សាន្ត និងចូលអបអរសាទរពិធីបុណ្យជាតិមួយនេះ។

ម្យ៉ាងការទុកដាក់សំរាមបានក្លាយជាក្ដីបារម្ភរបស់អាជ្ញាធររាជធានីភ្នំពេញ និងបានដាក់វិធានការសម្អាតយ៉ាងម៉ឺងម៉ាត់ ពោលគឺសម្អាតទាំងយប់ទាំងថ្ងៃតែម្ដង។

(ប្រជាពលរដ្ឋមួយចំនួនបានទុកសំរាមចោលនៅតាមច្រាំងទន្លេមុខព្រះបរមរាជវាំង)

ទោះជាមន្ត្រីសណ្តាប់ធ្នាប់បានខិតខំសំអាតសំរាម និងដាក់ពង្រាយធុងសំរាបជាច្រើនតាមសួនក្តី នៅយប់ថ្ងៃទីមួយនៃ ពិធីបុណ្យអុំទូកនេះ សំរាមជាច្រើនត្រូវបានប្រជាពលរដ្ឋមួយចំនួណបោះចោលពាសវាលពាសកាល និងខ្លះដាក់ពង្រាយចោលនៅក្បែរធុងសំរាមដែរម្តង។

ទោះយ៉ាងណាមន្ត្រីសណ្តាប់ធ្នាប់របស់សាលារាជធានីបានសម្អាតសំរាមទាំងនេះរួចរាល់នៅព្រឹកមិញរួចហើយដែរ។ ទង្វើនេះបានទទួលការស្វាគមន៍ពីប្រជាពលរដ្ឋ។

(ធុងសំរាមដែលពេញដោយសំរាម)

បើតាមលើកឡើងរបស់លោក ខេវីន អ្នកដំណើរនៅមុខព្រះបរមរាជវាំង បានរៀបរាប់ប្រាប់ Sabay ថាៈ «កាលពីឆ្នាំមុនៗ នៅពេលមានបុណ្យទានធំៗ ដូចជាបុណ្យអុំទូកជាដើម... ឃើញសំរាមចោលគរតាមផ្លូវ ណាមួយកាលនោះការផ្សព្វផ្សាយ មិនទាន់ទូលំទូលាយផង ប្រជាជនក៏គាត់ញ៉ាំហើយបោះចោល»។

(ធុងសំរាមដែលអាជ្ញាធរត្រៀមសម្រាប់ពលរដ្ឋទុកដាក់សំរាម)

លោកបន្ថែមថាៈ «ដោយឡែកនៅឆ្នាំនេះ មើលឃើញថាល្អមែនទែន ទាំងអាជ្ញាធរ និងប្រជាជនសហការគ្នាបានល្អ យើងមើលទៅល្អ ថ្ងៃទី២ហើយ មិនមានសម្រាមនៅវាំង ហើយបើយើងចូលរួមសម្អាតទាំងអស់គ្នានឹងធ្វើឲ្យទីក្រុងយើងស្អាត និងយើងមានសុខភាពល្អ»។ លោក ក៏ពេញចិត្តគាំទ្រចំណាត់ការរបស់សាលាក្រុងដែលបានយកចិត្តទុកដាក់ចំពោះសំរាមនេះ។

រីឯកញ្ញា វ៉ុន ដា អ្នកលក់ភេសជ្ជៈនៅមុខវាំង បង្ហាញអារម្មណ៍រីករាយចំពោះសកម្មភាពរបស់អាជ្ញាធរ ដែលបានយកចិត្តទុកគ្រប់មធ្យោបាយដើម្បីសម្អាត និងប្រមូលសម្អាតសំរាម។ កញ្ញាថាៈ «ខ្ញុំសប្បាយចិត្តពេលឃើញអាជ្ញាធរមានសកម្មភាពសម្អាតទីធ្លាកន្លែងកម្សាន្តបែបនេះ ធ្វើឲ្យខ្ញុំជាពលរដ្ឋមានសុខភាពល្អ ព្រោះគ្មានក្លិនឆ្អាបតាមផ្លូវ»។

ទន្ទឹមគ្នានេះ កញ្ញាក៏ឲ្យដឹងថាដែរ នៅពេលកញ្ញាដើរលក់ភេសជ្ជៈ ក៏សង្កេតឃើញបងប្អូនប្រជាពលរដ្ឋចោលសំរាមមានសណ្ដាប់ធ្នាប់ជាងមុនផងដែរ៕

ចុចអាន៖

អត្ថបទដោយ៖ ស៊ិន សាវ៉េត