តារាសម្ដែងជើងចាស់ ចាន់ ស៊ីផាន់ ឈឺធ្ងន់ មានបំណងមួយនាដង្ហើមចុងក្រោយ
- 2017-11-05 03:29:28
- ចំនួនមតិ 0 | ចំនួនចែករំលែក 0
តារាសម្ដែងជើងចាស់ ចាន់ ស៊ីផាន់ ឈឺធ្ងន់ មានបំណងមួយនាដង្ហើមចុងក្រោយ
ចន្លោះមិនឃើញ
អ្នកស្រី ចាន់ ស៊ីផាន់ ដែលត្រូវមហាជនស្គាល់ថា ជាតារាសម្ដែងជើងចាស់ និង គ្រូបង្ហាត់សិល្បៈនៅ សាលាវិចិត្រសិល្បៈ ពេលនេះបានធ្លាក់ខ្លួនឈឺ ដេកលើគ្រែងើបមិនរួចឡើយ បំណងចុងក្រោយរបស់អ្នកស្រី គឺចង់ឃើញមុខ អ្នកសិល្បៈរួមជំនាន់ ចង់និយាយលា មុនគាត់ចែកឋានទៅ។ នេះជាការបញ្ជាក់ពី អ្នកស្រី ឡុច សុធី ដែលត្រូវជាកូន។
អ្នកស្រី ឡុច សុធី បានរៀបរបស់ឲ្យដឹងថា ម្ដាយរបស់អ្នកស្រីមានវ័យ៩៣ឆ្នាំ ហើយបានធ្លាក់ខ្លួនឈឺជាង២ឆ្នាំមកហើយ និង ធ្លាក់ខ្លួនឈឺខ្លាំងរហូតដល់ងើបពីកន្ទេលមិនរួចប្រហែល១សប្ដាហ៍មកនេះ។" គាត់ដាច់បាយ២ថ្ងៃហើយអូន មុនៗហូបបានខ្លះ លូវបងនិងក្រុមគ្រួសារ បានសូត្រមន្ត២លើកឲ្យគាត់ហើយ ថ្ងៃស្អែក ធ្វើម្ដងទៀត ឆ្លងឲ្យគាត់ មើលទៅ មិនមានសង្ឃឹមទេ" អ្នកស្រី ឡុច សុធី លើកឡើង។
កូនស្រីអ្នកសិល្បៈជើងចាស់ខាងលើបានរៀបរាប់ឲ្យដឹងទៀតថា ម្ដាយរបស់អ្នកស្រីមានជំងឺថ្លើមជាង២ឆ្នាំ ប៉ុន្តែមិនទាន់ធ្ងន់ធ្ងរទេ ហើយធ្លាប់ទៅព្យាបាលនៅមន្ទីរពេទ្យរុស្សី និង មានពេទ្យប្រចាំខ្លួនផងដែរ។ ដំណាក់ការចុងក្រោយកើតមានជំងឺថ្មីមួយទៀត គឺរលាកពោះវៀនធ្ងន់ធ្ងរ។
ដោយវ័យរហូតដល់៩៣ឆ្នាំ ហើយមានគ្រូពេទ្យជាប្រចាំផង អ្នកស្រី ឡុច សុធី បញ្ជាក់ប្រាប់ថា មិនមានគម្រោងបញ្ជូនម្ដាយរបស់ខ្លួនទៅព្យាបាលនៅមន្ទីរពេទ្យឡើយ គឺក្រុមគ្រួសារសម្រេចព្យាបាលនៅក្នុងផ្ទះ និង ធ្វើពិធីតាមបែបសាសនាប៉ុណ្ណោះ។
អ្នកស្រី ឡុច សុធី មិនបានប្រកាស ស្នើសុំជំនួយពីអ្នកសិល្បៈឬ សប្បុរសជនណាមួយ យកប្រាក់មកព្យាបាលអ្នកស្រីឡើយ ប៉ុន្តែអ្នកស្រីចង់បំពេញបំណងម្ដាយរបស់ខ្លួនដែលចង់ឃើញមុខអ្នកសិល្បៈរួមជំនាន់ ដូចជា នាយកុយ នាយក្រឹម និងអ្នកសិល្បៈជាច្រើនទៀត ដែលធ្លាប់មានអនុស្សាវរីយ៍ជាមួយគាត់តែប៉ុណ្ណោះ។
តាមការលើកឡើងរស់កូនគាត់ តារាសម្ដែងជើងចាស់ ចាន់ ស៊ីផាន់ បានប្រើពេលស្ទើរមួយជីវិតរបស់គាត់ ប្រលូកលើវិថីសិល្បៈនេះ ទាំងតារាសម្ដែង គ្រូបង្ហាត់សិល្បៈស្ទើរគ្រប់ទម្រង់ ដូចជា ល្ខោន យីកេ របាំជាដើម។ អ្នកស្រីមានកូនតែ២នាក់ប៉ុណ្ណោះ ប្រុស១ ស្រី១។ ផ្ទះរបស់អ្នកស្រី ចាន់ ស៊ីផាន់ ស្ថិតនៅ ខាងក្រោយទូតចិន ក្នុងសង្កាត់ទូលទំពូង២។ ទំនាក់ទំនងទូរសព្ទលេខកូនអ្នកស្រី0716533362 ៕