ក្រទ្រព្យតែមិនក្រគំនិត! យុវជនខ្មែរ៣រូបតស៊ូពីក្រខ្លាំង រហូតរកបានពាន់ដុល្លារក្នុង១ខែ

2017-11-06 02:47:05
ចំនួនមតិ 0 | ចំនួនចែករំលែក 0

ចន្លោះមិនឃើញ

ដូចពាក្យចាស់តែងពោលថា «តស៊ូគង់បានសម្រេច ឱ្យតែមិនបោះបង់»។ ជាក់ស្ដែងយុវជនខ្មែរ៣រូបនេះធ្លាប់ឆ្លងកាត់ជីវិតលំបាកខ្លាំងមានខ្លះធ្លាប់ជាក្មេងលាងចាង និងខ្លះទៀតធ្លាប់ធ្វើការប្រាក់ខែតិចតួចស្ដួចស្ដើង តែមិនបានអស់សង្ឃឹមនឹងជីវិត តូចចិត្តនឹងវាសនារបស់ខ្លួនឡើយ តស៊ូរហូតទទួលជោគជ័យដ៏ត្រចះត្រចង់។ ដូច្នេះសូមមកស្គាល់យុវជនទាំងបី ថាតស៊ូក្នុងជីវិត និងមានគំនិតល្អៗអ្វីខ្លះទើបអាចរំដោះភាពក្របាន?

១. យុវជន គង់ គីមហេង ពីក្មេងលាងចានក្លាយជាអ្នកជំនាញក្រឡុកស្រាលក់ដ៏ល្បី

ចាប់ផ្ដើមពីបាតដៃទទេ យុវជនកំព្រាម្ដាយម្នាក់ បានសម្រេចក្ដីស្រម៉ៃដំបូងរបស់ខ្លួនទាំងនៅក្មេងវ័យ។ គង់ គីមហេង ជាកូនអ្នកនៅភ្នំពេញម្ដុំក្បាលថ្នល់។ បន្ទាប់ពីធ្វើការតាមហាង និងកាស៊ីណូ បានជិត៥ឆ្នាំ គីមហេង បានបើកអាជីវកម្មខ្នាតតូចមួយ គឺក្រឡុកស្រា មានយីហោ Mob ដែលអាចរកប្រាក់ចំណេញបានជាង ២០ ម៉ឺនរៀលក្នុងមួយថ្ងៃ។ គីមហេងថា នេះជាជោគជ័យដំបូងក្នុងជីវិតរបស់ខ្លួន។

ដោយសារស្ថានភាពទីទាល់ក្រ និងថាជួនកាលដាច់បាយម្ដងម្កាល ផងនោះ ស្ថានភាពនេះគីមហេងថាបានរុញច្រានឲ្យខ្លួនចេញរកប្រាក់ទាំងវ័យ១៦ឆ្នាំ។ គីមហេងឲ្យដឹងថាការងារដំបូងរបស់លោកគឺជាអ្នកលាងចានក្នុងភោជនីយដ្ឋានតូចមួយ និងទទួលបានកម្រៃត្រឹម៦០ដុល្លារក្នុងមួយខែ។ ធ្វើការបានពីរឆ្នាំ ពោលគឺ ពេលលោកមានវ័យ១៨ឆ្នាំលោកក៏បាន ចូលធ្វើការនៅកាស៊ីណូមួយជាមួយបងស្រីបង្កើតនៅភ្នំពេញ។

ហាក់បីដូចជាមាន និស្ស័យជាមួយការងារក្រឡុកស្រា ហើយខ្លួនចូលចិត្តរសជាតិស្រាក្រឡុកផង គីមហេង ថាមេការកាស៊ីណូបានប្ដូរកាងារ លោកឲ្យទៅបម្រើក្នុងផ្នែកក្រឡុកស្រាវិញម្ដង ដែលនេះលោកថា ជាឱកាសសម្រាប់លោក ចាប់ផ្ដើមស្វែងយល់ និងរៀនសូត្រជំនាញក្រឡុកស្រា ពីអ្នកជំនាញនៅទីនោះ។ ដោយដឹងថាខ្លួនមិនបានសិក្សាបន្តទៀត គីមហេង ថាលោកបានប្ដូរមកអានសៀវភៅជាប្រចាំ ហើយសៀវភៅដែលលោកចូលចិត្តអានគឺសៀវភៅនិយាយពីបុគ្គលជោគជ័យ ល្បីៗមានដូចជា លោកបៀលហ្គេត លោកម៉ហ្សកឃើប៊ើក និងលោកចេកម៉ា ជាដើម។ អានសៀវភៅយូរៗទៅ លោកថាធ្វើឲ្យលោក បែកគំនិតចង់ចេញធ្វើជំនួញខ្លួនឯង ដោយចាប់ផ្ដើមសន្សំលុយបន្តិចម្ដងៗ និងគិតគូរយ៉ាងហ្មត់ចត់ពីការចាប់ផ្ដើមជំនួញដំបូងរបស់ខ្លួន។

មានលុយបន្តិចបន្តួចក្នុងហោប៉ៅ គីមហេង ថាខ្លួនបានប្រថុយយកកាតគ្រីម៉ូតូ ទៅបញ្ចាំដើម្បីសម្រេចបំណង ដែលបានគិតទុកជាយូរមកហើយ។

យុវជនវ័យក្មេងរូបនេះ ថាខ្លួនបានឈានជើងចេញរកស៊ីក្រឡុកស្រាលក់ តាមចញ្ចើមផ្លូវដំបូងនៅលើចញ្ចើមផ្លូវខាងលិចសួនមុខវត្តបទុមវត្តី ដោយមានយីហោ ថាMob ហើយទទួលការគាំទ្រពីអតិថិជនជាច្រើន ជាពិសេសយុវវ័យ និងជនបរទេស ដែលចូលចិត្តដើរម្សាន្តតាមសួន និងអង្គុយជជែកគ្នាលេងជាលក្ខណៈលំហែកាយ។

គង់ គីមហេង បានសម្ដែងក្ដីសង្ឃឹមថា នៅចន្លោះអាយុ ២៥ ទៅ ៣០ឆ្នាំ លោកនឹងក្លាយជាថៅកែ រង្គសាលមួយ ហើយសង្ឃឹមថាអាចពង្រីសាខាឲ្យបានច្រើន។

២. លោកស្រី ឃី មុនី ពីអ្នកធ្វើការប្រាក់ខែ៥០ដុល្លារក្លាយជាម្ចាស់ក្រុមហ៊ុននាំចេញអង្ករ

ជាកូនស្រីកំព្រាឪពុក លោកស្រី ឃី មុនី សុខចិត្តចាកចេញពីគ្រួសារ មកបន្តការសិក្សា និងស្វែងរកការងារនៅភ្នំពេញ ក្រោយបញ្ចប់ថ្នាក់វិទ្យាល័យ។ ការចាកចេញនោះដោយសារ ចង់រំដោះខ្លួនចេញពីបន្ទុកចំណាយគ្រួសារ ដើម្បីសម្រាលការលំបាករបស់ម្ដាយ ដែលដើរតួជាម្ដាយផង ឪពុកផង រួមទាំងរ៉ាប់រងបន្ទុកកូនៗជាច្រើននាក់។ ភាពក្រីក្របានក្លាយជាកម្លាំងចិត្តដ៏រឹងមាំ រហូតទទួលពានរង្វាន់សហគ្រិនស្ត្រីវ័យក្មេងដ៏ឆ្នើមប្រចាំឆ្នាំ ២០១៧ កាលពីពេលថ្មីៗនេះ។

លោកស្រី ឃី មុនី ជាអ្នកខេត្តកំពង់ចាម ដែលមានបងប្អូនចំនួន ៧នាក់ និងជាកូនស្រីពៅ មានតែម្ដាយជាមេគ្រួសារ។ បន្ទាប់ពីលោកស្រីប្រឡងជាប់បាក់ឌុប ក៏សម្រេចចាកចេញពីស្រុកកំណើត មកបន្តការសិក្សាជំនាញផ្នែកសេដ្ឋកិច្ច នៅរាជធានីភ្នំពេញ នៅសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច។ លោកស្រីរៀបរាប់ថា ៖ "ពេលនោះជាលើកដំបូងដែលត្រូវបែកពីម្ដាយ អារម្មណ៍ពិតជាពិបាក"។ លោកស្រីថា អ្វីដែលលោកស្រីប្រាប់ខ្លួនឯងឲ្យប្រឹងបន្តឡើងនោះ គឺដោយសារភាពក្រីក្រ បានជំរុញទឹកចិត្តលោកស្រីត្រូវតែតស៊ូសម្រេចគោលដៅឲ្យបាន។

ចូលដល់ឆ្នាំទី២ភា្លម លោកស្រីទទួលបានការងារដំបូងផ្នែករដ្ឋបាល ជាការងារហាត់ការ ឬហៅថា Internship រយៈពេល ០៦ខែ លោកស្រីទទួលបានប្រាក់ឈ្នួល៥០ដុល្លារក្នុង១ខែ ត្រឹមបង្គ្រប់ថ្លៃសាំងប៉ុណ្ណោះ។ ប៉ុន្តែលោកស្រីពេញចិត្តនឹងធ្វើ ព្រោះជាកន្លែងដែលលោកស្រីបានរៀនសូត្រពីមនុស្សជំនាញជាច្រើន និងអនុវត្តជាក់ស្តែង ធ្វើឲ្យលោកស្រីលែងខ្លាច និងបានស្គាល់ពីសង្គមកាន់តែច្បាស់។ ទន្ទឹមនឹងការងារលំបាកៗជាច្រើន បានចូលក្នុងជីវិតស្ត្រីវ័យក្មេងរូបនេះ បានប្រាប់ខ្លួនឯងនូវពាក្យចាស់បុរាណតែងពោលថា " ស៊ូនឿយមុនស្រណុកក្រោយ" ហេតុដូច្នេះ លោកស្រីមិនដែលទុកខ្លួនឲ្យទំនេរឡើយ។

ការងារ និងជីវិតឯកជនត្រូវបានផ្លាស់ប្ដូរ ក្រោយពីបញ្ចប់ការងារហាត់ការ លោកស្រីបានធ្វើការជាគណនេយ្យក្នុងក្រុមហ៊ុនអចលទ្រព្យមួយ និងឆ្លៀតពេលរកម៉ូយជួយជាលក់ផ្ទះឲ្យគេបន្ថែម។ លក់ផ្ទះដំបូងលោកស្រី រកប្រាក់បាន ៣ពាន់ដុល្លារ ជាកម្រៃជើងសា (Commission) រួចក៏មានបែកគំនិតរកស៊ីនាំចូលសំបកកៅស៊ូម៉ូតូ។ អាជីពជាពេលវេលាមួយដែលលោកស្រីភ័យខ្លាច តែដោយមានចំណេះដឹងភាពជាសហគ្រិន គឺត្រូវតែហ៊ានប្រថុយ។

មកដល់ឆ្នាំ ២០១១ លោកស្រី បានងាកមកចាប់របររកស៊ីស្រូវអង្ករមានឈ្មោះថា Amru Rice និង ឆ្នាំ ២០១៣ ដឹកនាំកសិករ ផលិតអង្ករសរីរាង្គរបស់ខ្មែរនាំចេញទៅក្រៅជាង ៤០ប្រទេស និងជួយកសិករខ្មែរប្រមាណ ៥ពាន់គ្រួសារ ប្ដូរមកធ្វើស្រូវបែបសរីរាង្គទល់បច្ចុប្បន្ន។

៣. លោក ញឿក ភារុម្យ តស៊ូពីប្រាក់ខែ ៨០ដុល្លារក្លាយជាម្ចាស់កសិដ្ឋានចិញ្ចឹមចង្រិត

ដោយសារធ្វើការទទួលបានប្រាក់ខែតិចពេកគឺត្រឹមតែ៨០ដុល្លារក្នុងមួយខែ លោក ញឿក ភារុម្យ ក៏មានគំនិតមួយ គឺបើកកសិដ្ឋានចិញ្ចឹមចង្រិត។ ដំបូងឡើយលោករៀននៅវិទ្យាស្ថានជាតិពាណិជ្ជសាស្ត្រ ផ្នែកអក្សរសាស្ត្រអង់គ្លេស ហើយឆ្លៀតពេលធ្វើការបានប្រាក់ខែតែ៨០ដុល្លារតែប៉ុណ្ណោះ។

ថ្ងៃមួយលោកបានឃើញវីដេអូមួយតាមអ៊ីនធើណេត ដែលបង្ហាញពីកសិដ្ឋានចិញ្ចឹមចង្រិត ពេលនោះបានចាប់អារម្មណ៍ខ្លាំងលើមុខរបរនោះ។ បន្ទាប់មកលោកក៏ទៅរៀនសូត្របច្ចេកទេសបន្ថែមទៀតនៅប្រទេសថៃ និង វៀតណាម ព្រមទាំងបាននាំយកពូជចង្រិតដែលល្អមកពីប្រទេសថៃដើម្បីមកចិញ្ចឹមសាកល្បងទៀតផង។

ចាប់ផ្ដើមដំបូង លោក មានដើមទុនត្រឹមមួយពាន់ដុល្លារទេ សម្រាប់ការសាងសង់កសិដ្ឋាននៅឯស្រុកកំណើតក្នុងខេត្តតាកែវ។ ការចាប់ផ្ដើមលោកត្រូវឆ្លងកាត់ឧបសគ្គ និងការខាតបង់ជាច្រើន តែលោកមិនដែលគិតចង់បោះបង់នោះឡើយ។

ការតស៊ូពិតជាមិនអត់ប្រយោជន៍ អាជីវកម្មរបស់លោកក៏ចាប់ផ្ដើមទទួលបានចំណូលកើនឡើងបន្តិចម្ដងៗចាប់ពីខែទី៤នៃការចិញ្ចឹម ហើយរហូតមកទល់សព្វថ្ងៃគឺមានរយៈពេល៧ឆ្នាំហើយ។ បច្ចុប្បន្នកសិដ្ឋានការចិញ្ចឹមចង្រិតរបស់លោក អាចប្រមូលផលបាន ប្រមាណ១តោនក្នុងរយៈពេល៤៥ថ្ងៃ។ លើសពីនេះលោកបានបង្រៀនកសិករដទៃទៀតមួយចេះ យកតែ១០ម៉ឺនរៀលប៉ុណ្ណោះ។

យុវជនតស៊ូក្នុងជីវិតរូបនេះ ប្រាប់ថា ក្នុងមួយខែៗ លោកបានផ្គត់ផ្គង់ចង្រិតប្រមាណជាង១០តោនដែរ ទៅអោយទីផ្សារក្នុងប្រទេសកម្ពុជា៕

ចុចអាន៖

អត្ថបទ៖ វឌ្ឍនៈ