ប្រាក់ សុវណ្ណារ៉ា ពន្យល់ហេតុផលងាយៗក្នុងការមិនយក ធារី និង បូរ៉ាវី

2017-11-06 23:50:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែបម្រើឆ្នើមរបស់កម្ពុជា ធារី ចន្ថាប៊ីន និងអតីតប្រធានក្រុមជម្រើសជាតិ ឃួន ឡាបូរ៉ាវី មិនបានជាប់ក្នុងបញ្ជីឈ្មោះកីឡាករ ២៥ នាក់ចុងក្រោយ សម្រាប់ការប្រកួតមិត្តភាពជាមួយមីយ៉ាន់ម៉ា និងការប្រកួតជម្រុះ AFC Asian Cup ជាមួយហ្សកដានីថ្ងៃទី១៤ ខែវិច្ឆិកា ឆ្នាំ២០១៧ នៅពហុកីឡដ្ឋានជាតិឡើយ។

លោក ប្រាក់ សុវណ្ណារ៉ា

ទាក់ទងបញ្ហានេះលោក ប្រាក់ សុវណ្ណារ៉ា គ្រូបង្វឹកក្រុមជម្រើសជាតិកម្ពុជាពន្យល់ថា គ្រូបង្វឹកនៅលើពិភពលោកមានរបៀបនៃការលេងខុសៗគ្នា។ សម្រាប់ការមិនរើសយក ធារី និង បូរ៉ាវី ដោយសារអ្នកទាំងពីរលេងមិនត្រូវតាមការចង់បានរបស់លោក។

អតីតគ្រូបង្វឹកបឹងកេតរូបនេះបញ្ជាក់ថា ការជ្រើសរើសរបស់លោកមើលទៅលើស្ថានភាពជាក់ស្ដែងក្នុងការជួយក្រុមរបស់គេផ្ទាល់។ ពិសេសគឺកីឡាករទាំងពីរមានកម្រិតសមត្ថភាពមិនល្អគ្រប់គ្រាន់ ដើម្បីទទួលបានឱកាសជាប់ឈ្មោះមកលេងជាកូនក្រុមរបស់លោក។

លោក ប្រាក់ សុវណ្ណារ៉ា ទើបតែចូលដឹកនាំជំនួសលោក Leonardo Vitorino ដែលត្រូវបានសហព័ន្ធកីឡាបាល់ទាត់កម្ពុជាបណ្ដេញចេញពីតំណែង ក្រោយដឹកនាំកម្ពុជាចាញ់វៀតណាម ៥-០ នៅទឹកដីវៀតណាម កាលពីខែតុលា ឆ្នាំ២០១៧៕