ភ្ញាក់ផ្អើល! ម្ចាស់បទ "PPAP" និង Donald Trump ជួបគ្នានៅជប៉ុន

2017-11-07 02:26:42
ចំនួនមតិ 0 | ចំនួនចែករំលែក 0

ចន្លោះមិនឃើញ

រូបថតមួយសន្លឹករបស់តារាចម្រៀងជប៉ុនម្ចាស់បទ "PPAP” បានធ្វើឲ្យបណ្ដាញអ៊ីនធឺណិតកំពុងមានការភ្ញាក់ផ្អើល និងបានចែករំលែកតៗគ្នា នៅពេលឃើញវត្តមានប្រធានាធិបតីសហរដ្ឋអាមេរិក Donald Trump និងប្រធានាធិបតីជប៉ុន Shinzō Abe ឈរជាប់នោះ។

តារាជប៉ុន Piko-Taro បានក្លាយជាបុគ្គលល្បី មានអ្នកស្គាល់ជាច្រើនជុំវិញពិភពលោក តាមរយៈវីដេអូបទចម្រៀងខ្លី មានចំណងជើងថា "Pen-Pineapple-Apple-Pen” ឫ "PPAP” កាលពីឆ្នាំមុន។ ដោយឡែក ថ្ងៃទី ០៦ ខែវិច្ឆិកា ម្សិលមិញនេះ លោកបង្កភាពភ្ញាក់ផ្អើលម្ដងទៀតហើយ ក្រោយពេលបង្ហោះរូបជំនួបរបស់ខ្លួនជាមួយប្រធានាធិបតីសហរដ្ឋអាមេរិក Donald Trump និង នាយករដ្ឋមន្ត្រីជប៉ុន Shinzō Abe លើបណ្ដាញសង្គមហ្វេសប៊ុក។

តាមរយៈជំនួបនេះដែរ បើតាមទីភ្នាក់ងារព័ត៌មាន Kyodo បានឲ្យដឹងថាកាលពីខែតុលាថា លោកនាយករដ្ឋមន្ត្រីជប៉ុន បានរៀបចំពិធីជប់លៀងអាហារពេលល្ងាចយ៉ាងពិសេសមួយ អំឡុងពេលនៃដំណើរទស្សនកិច្ចរបស់លោក Trump មកកាន់ប្រទេសជប៉ុន។ អ្វីដែលកាន់តែពិសេស លោកក៏បានអញ្ជើញ តារាល្បីមួយរូបប្រចាំប្រទេស Piko-Taro ឲ្យមកចូលរួមដែរ។

ដោយឡែក បើតាមប្រភពមួយមកពីខាងមន្ត្រីរដ្ឋាភិបាល ក៏បានបង្ហើបដែរថា លោក Shinzō Abe បានជួបពិភាក្សាជាមួយលោក Donald Trump កាលពី នៅក្នុងទីក្រុង New York ហើយពេលនោះ ប្រធានាធិបតីអាមេរិករូបនេះ ក៏បានប្រាប់ទៅនាយករដ្ឋមន្ត្រីជប៉ុនថា ខ្លួនមានអារម្មណ៍ស្រស់ស្រាយ ពេលបានទស្សនាវីដេអូរបស់ Piko-Taro។

មិនត្រឹមតែ Trump ទេ ដែលពេញចិត្តការសម្ដែងរបស់ម្ចាស់បទ "PPAP" សូម្បីចៅស្រីដែលមានឈ្មោះថា Arabella ក៏ជាអ្នកគាំទ្រផ្កាប់មុខរបស់ តារាកំប្លែងរូបនេះដែរ។ ជាក់ស្ដែង កាលពីខែវិច្ឆិកា ឆ្នាំមុន លោកស្រី Ivanka Trump ដែលត្រូវជាម្ដាយក្មេងតូចរូបនេះ បានបង្ហោះវីដេអូនាង រាំច្រៀងត្រាប់ ម្ចាស់បទយ៉ាងរស់រវើក។

ទស្សនាវីដេអូខាងក្រោម៖

A post shared by Ivanka Trump (@ivankatrump) on Nov 15, 2016 at 5:32am PST

ដោយឡែក ការមកកាន់ប្រទេសជប៉ុនរបស់ ប្រធានាធិបតីសហរដ្ឋអាមេរិក គឺជាផ្នែកមួយនៃដំណើរទស្សនកិច្ចរបស់លោកក្នុងតំបន់អាស៊ី។ ក្រៅពីនោះ លោកក៏មានគម្រោងធ្វើដំណើរទៅកាន់ប្រទេសកូរ៉េខាងត្បូង, ចិន, វៀតណាម និងហ្វីលីពីន។ ដំណើរទស្សនកិច្ចនោះ នឹងបញ្ចប់នៅថ្ងៃ ១៤ ខែវិច្ឆិកាខាងមុខ៕

អត្ថបទ៖ យី សុធារី