មិនធម្មតា! គ្រាន់តែជាង Make up ឲ្យ Miss Global ជាង៣០នាក់ សុទ្ធតែជាងលំដាប់ប្រទេស
- 2017-11-08 09:44:10
- ចំនួនមតិ 0 | ចំនួនចែករំលែក 0
មិនធម្មតា! គ្រាន់តែជាង Make up ឲ្យ Miss Global ជាង៣០នាក់ សុទ្ធតែជាងលំដាប់ប្រទេស
ចន្លោះមិនឃើញ
ស្រីស្អាតទាំង៦៥រូប តំណាងប្រទេសទាំង៦៥ មកពីជុំវិញពិភពលោក ដែលកំពុងតែចូលរួមប្រឡង Miss Global International 2017 ក្នុងទេសកម្ពុជា គ្រាន់តែជាងចាំ Make up ឲ្យមានរហូតដល់ទៅ៣២នាក់ នេះបើតាមការបង្ហើបឲ្យដឹងពី ប៉ុបពី ដែលជាជាងម្នាក់ក្នុងចំណោមជាងទាំងនោះ។
ប៉ុបពី បានបង្ហើបឲ្យដឹងថា ជាង Make up ឲ្យ Miss Global International 2017 ត្រូវបានជ្រើសរើសសុទ្ធតែជាង ដែលមានស្នាដៃល្បីប្រចាំប្រទេសកម្ពុជាទាំងអស់ ក្នុងនោះ មេក្រុម គឺ រំដួលលិចទឹក។
តារាភេទទី៣មានជំនាញខាង Make up ខាងលើបានបន្តឲ្យដឹងថា ក្រុមរបស់នាងត្រូវទទួលរ៉ាប់រងចាប់តាំងពីវត្តមានក្រុម Miss Global International 2017 ចូលមកដល់កម្ពុជា រហូតដល់ត្រលប់ទៅវិញ ដោយត្រូវដើរតាមគ្រប់កម្មវិធីទាំងអស់។ "គាត់ទៅកំពង់ចាម គាត់ទៅសៀមរាប កំពង់សោម បូកគោ កំពត ថតនៅភ្នំពេញ គឺក្រុម Make up ទាំង៣២នាក់នេះ ទៅតាមគាត់ទាំងអស់ " ប៉ុបពី រៀបរាប់ឲ្យដឹង។
ប៉ុបពី មិនបានប្រាប់ពីតម្លៃខ្លួន ដែលក្រុមរបស់នាងទទួលបានពីការ Make up នេះឡើយ ប៉ុន្តែនាងបានប្រាប់ថា គ្រប់ជាងទាំងអស់ គឺជាការស្ម័គ្រចិត្តជួយមុខមាត់ប្រទេស ហើយក្រោយបញ្ចប់ការប្រកួត គ្រប់ជាងទាំងអស់ នឹងទទួលបានប័ណ្ណសរសើរ ដែលមានស្តង់ដារអន្តរជាតិ ម្នាក់មួយផងដែរ។
Miss Global International ជាកម្មវិធីប្រកួតសម្រស់អន្តរជាតិមួយ ដែលមានការបញ្ជ្រាបការយល់ដឹងពីបរិស្ថាន។ តាមការឲ្យដឹងពីអ្នករៀបចំ កម្មវិធីនេះបានធ្វើឡើងចំនួន៥លើកមកហើយនៅប្រទេសមួយចំនួនក្នុងពិភពលោក។ សម្រាប់នៅឆ្នាំ២០១៧នេះ ប្រទេសកម្ពុជា គឺជាម្ចាស់ផ្ទះ ហើយក៏ជាលើកដំបូងរបស់កម្ពុជាផងដែរ។ កម្មវិធីគ្រោងបញ្ចប់នៅថ្ងៃទី១៧ ខែ វិច្ឆិកា ឆ្នាំ២០១៧។
កញ្ញា យស ប៉ូលីណា (Paulina Yos) តំណាងកម្ពុជា ត្រូវបានជ្រើសរើសឲ្យចូលរួមប្រកួតកម្មវិធីបវរកញ្ញាពិភពលោកនេះ។ ប៉ូលីណា មានវ័យ២៥ឆ្នាំ នាងមានឈាមជ័រខ្មែរ-អាមេរិក ដោយសព្វថ្ងៃរស់នៅក្រុង San Francisco រដ្ឋCalifornia សហរដ្ឋអាមេរិក៕