រំភើប! កំពូលតារាចម្រៀង Rain ជិតចេញបទថ្មីហើយ

2017-11-07 03:11:28
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រោយពីបាត់មុខមួយរយៈពីវិថីសិល្បៈ ដោយត្រូវមើលថែទាំប្រពន្ធទើបតែសម្រាលបានកូនស្រីដ៏ស្រស់ស្អាតមួយនោះ តារាចម្រៀងដ៏ល្បីប្រចាំប្រទេសកូរ៉េ Rain កំពុងរៀបចំចេញអាល់ប៊ុមបទចម្រៀងថ្មីរបស់ខ្លួននៅខែធ្នូខាងមុខនេះ។

យោងទៅតាមអ្នកគ្រប់គ្រងរបស់តារាចម្រៀង Rain បានឲ្យដឹងថា លោក Rain នឹងត្រលប់មកវិញជាមួយនឹងបទចម្រៀងថ្មីនៅថ្ងៃទី ១ ខែធ្នូខាងមុខនេះ៖ "Rain បានព្យាយាមបញ្ចប់ ការងាររៀបចំអាល់ប៊ុមចម្រៀងរបស់លោក ដើម្បីចេញជាផ្លូវការឲ្យបាននៅថ្ងៃទី ១ខែធ្នូនេះ"។

អស់រយៈពេល ៤ឆ្នាំហើយ តាំងពីអាល់ប៊ុមបទចម្រៀង 'Rain Effect' របស់លោកបានចេញកាលពីឆ្នាំ ២០១៤។ តាំងពីពេលនោះមក តារាប្រុសរូបនេះក៏បានចេញបទចម្រៀងខ្លះដែរ តែលើកនេះជាអាល់ប៊ុមបទចម្រៀងផ្លូវការថ្មីមួយទៀត ដែលលោកខកខានមិនបានធ្វើជាយូរមកហើយ។

អាល់ប៊ុមបទចម្រៀងថ្មីនេះ ជាអាល់ប៊ុមតូចជាមួយនឹងបទចម្រៀងតែ ៥បទប៉ុណ្ណោះ ហើយលោកបានបញ្ជាក់ទៀតថាសាច់ភ្លេងនៅក្នុងអាល់ប៊ុមថ្មីនេះ ជាប្រភេទ Hip Hop លាយគ្នានឹងចង្វាក់ Rock ខ្លះៗ។

មិនយូរប៉ុន្មានអ្នកគាំទ្ររបស់ Rain ទាំងអស់នឹងបានឃើញការសម្ដែងថ្មីមួយទៀតរបស់លោក ហើយតើស្នាដៃថ្មីនេះអស្ចារ្យយ៉ាងណា? សូមរង់ចាំតាមដានទាំងអស់គ្នា៕

ចុចអាន៖

ប្រភព៖ Allkpop ប្រែសម្រួល៖ អន សុភក្ត្រា