ត្រាំ មកទស្សនកិច្ចជប៉ុន ត្រូវគេរិះគន់ ពេលឲ្យចំណីត្រី (វីដេអូ)

2017-11-07 02:51:35
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រធានាធិបតីអាមេរិក លោក ដូណាល់ ត្រាំ បានបង្កឲ្យមានការជជែកវែកញែកគ្នា នៅលើបណ្ដាញសង្គម Twitter ចំពោះការឲ្យចំណីត្រីរបស់លោក កាលពីថ្ងៃច័ន្ទ ម្សិលមិញនេះ ក្នុងអំឡុងពេលទស្សនកិច្ចប្រទេសជប៉ុន។

លោក ត្រាំ និងប្រធានាធិបតីជប៉ុន លោក ស៊ីនហ្សូ អាបេ បានចាប់ផ្ដើមឲ្យចំណីត្រី (ពូជ Koi) នៅក្នុងវិមានអាកាសាកា (Akasaka) ពោរពេញទៅដោយស្នាមញញឹម យ៉ាងសប្បាយរីករាយ។ ប៉ុន្តែ មួយរំពេចក្រោយមក ស្រាប់តែ លោក អាបេ បោះចំណីពីក្នុងប្រអប់ ចូលទៅក្នុងទឹកស្រះទាំងអស់តែម្ដង។ មិនរង់ចាំយូរ លោក ត្រាំ ដែលជាភ្ញៀវ ក៏បានធ្វើតាមម្ចាស់ផ្ទះ ដោយចាក់ចំណីត្រី ចូលទៅក្នុងទឹកស្រះទាំងអស់ដែរ។

ដោយសារតែទង្វើនេះ ប្រធានាធិបតីអាមេរិក វ័យ៧១ឆ្នាំរូបនេះ បានធ្វើឲ្យអ្នកនិយមប្រើប្រាស់បណ្ដាញសង្គម Twitter មិនពេញចិត្ត និងបញ្ចេញពាក្យរិះគន់ ដោយអះអាងថា វាជាកំហុសឆ្គងមួយក្នុងការឲ្យចំណីត្រីបែបនេះ។

បើយោងតាមលោកវេជ្ជបណ្ឌិត Erik Johnson បានឲ្យដឹងថា ការឲ្យចំណីត្រី Koi ច្រើនហួសហេតុ គឺជាកំហុសមួយ ដែលជាទូទៅអាចធ្វើឲ្យត្រីឈឺ។ មិនតែប៉ុណ្ណោះ វាក៏អាចបង្កើតកាកសំណល់ហួសកម្រិត និងធ្វើឲ្យខូចគុណភាពទឹកទៀតផង។

គួរបញ្ជាក់ថា ជប៉ុន បានរៀបចំការស្វាគមន៍ជាផ្លូវការមួយ សម្រាប់លោក ត្រាំ ដោយការផ្ដល់កិត្តិយសពីកងយោធា និងការឲ្យចំណីសត្វត្រីតាមប្រពៃណីនេះ។ លោក ត្រាំ និងជំទាវទី១ លោកស្រី Melania ក៏បានធ្វើដំណើរទស្សនកិច្ចជាផ្លូវការ ទៅជួបអធិរាជជប៉ុន Akihito និងមហាក្សត្រី Michiko ផងដែរ៕

ចង់ដឹងយ៉ាងណា សូមទស្សនាវីដេអូទាំងអស់គ្នា៖

ខាងក្រោមនេះគឺជាការបញ្ចេញមតិមួយចំនួនរបស់អ្នកនិយមប្រើប្រាស់បណ្ដាញសង្គម Twitter

ចុចអាន៖

ប្រភព៖ Dailymail ប្រែសម្រួល៖ សេង ឡុង