ទូកត្នោតស្រុកស្រែ កេរពីដូនតា មិនអាចបំភ្លេចបាន

2017-11-07 06:45:57
ចំនួនមតិ 0 | ចំនួនចែករំលែក 0

ចន្លោះមិនឃើញ

បើនិយាយពីដើមត្នោត ប្រជាពលរដ្ឋខ្មែរ ជាពិសេសអ្នកនៅស្រែចម្ការ ច្បាស់ណាស់ដឹងពីអត្ថប្រយោជន៍ច្រើនយ៉ាងរបស់ដើមឈើប្រឈើមួយប្រភេទ។ អត្ថប្រយោជន៍មួយក្នុងចំណោមអត្ថប្រយោជន៍ផ្សេងទៀត កសិករខ្មែរបានយកគល់ត្នោតចាស់ៗ មក ធ្វើជាទូក ជិះចម្លង និងប្រើប្រាស់ក្នុងការនេសាទ ដកប្រលឹត បេះត្រកួន និង កិច្ចការលើទឹក ក្នុងជីវភាពប្រចាំថ្ងៃផ្សេងៗទៀត។

រាងតូចច្រឡឹង អ្នកខ្លះប្រហែលគិតថា មិនអាចទ្រទម្ងន់មនុស្សបានទេ ប៉ុន្តែតាមពិតវាអាចផ្ទុកមនុស្សបានពី២ ទៅ ៤ នាក់ដែរ ទៅតាមទំហំទូកតូចធំ។ ឡើងជិះដំបូងដូចជាឃ្លោងបន្តិច តែពេលជិះយូរទៅ ទើបដឹងថាទំនងស្រួលម្យ៉ាងដែរ។

អ្នកស្រី សុខ រិន ម្ចាស់ខ្យូសអង្គុយលំហែនៅទំនប់ព្រៃផ្ដៅ ក្នុងភូមិព្រៃវែង ឃុំស្រែក្នុង ស្រុកជុំគិរី ខេត្តកំពត មានទូកត្នោតមួយ ទុកឲ្យភ្ញៀវជិះកម្សាន្ត និងប្រើសម្រាប់ឆ្លងទៅមក ឬដាក់មងចងសន្ទូចម្ដងម្កាលដែរ។ អ្នកស្រីថា គាត់កំពុងធ្វើទូក ២ បន្ថែមទៀត ទុកឲ្យភ្ញៀវជិះកម្សាន្តលេង។

«គេអាចជិះបង់សំណាញ់ ដាក់មង...ទូកជ្រៅដាក់បាន៣ទៅបួននាក់ បើ ទូករាក់ដាក់បានពីរនាក់»។ អ្នកស្រីបន្ថែម។

(បុរសម្នាក់កំពុងប្រើឫស្សីដោលទូកត្នោតដើម្បីដកព្រលឹតក្នុងបឹងមួយ)

អ្នកភូមិម្នាក់ទៀត គឺលោក ហៀប និយាយថា ទូកត្នោតមួយ លោកធ្វើរយៈពេលបីថ្ងៃ ដោយយកគល់ត្នោតចាស់ល្មមមកចាំង ចោះឲ្យក្លាយជាទូក។ លោកបញ្ជាក់ថាៈ «ទូកមួយធ្វើបីថ្ងៃអីហ្នឹង គាស់ យើងចាំង...ប្រើដាក់មង ដកព្រលឹត»

ចំណែកបុរសម្នាក់ ដែលឧស្សាហ៍ចែវទូកលេង បានរៀបរាប់ថា ជាធម្មតាអ្នកស្រុកនៅទីនោះ មិនប្រើច្រវាសម្រាប់ចែវទេ គេប្រើឬស្សីសម្រាប់ដោលវិញ ព្រោះថាទឹករាក់ល្មម ហើយបើទឹកជ្រៅ គ្រាន់តែយកឫស្សីដោលគាស់ទឹកតិចៗក៏ទូកទៅមុខដែរ៕

ចុចទស្សនា៖

អត្ថបទដោយ៖ ឈិន ធារ៉ាត់

ប្រភព៖ ៣០ដេលី