អ្នករត់ស៊ីក្លូ៖ ស៊ីក្លូតម្លៃពីរជី កន្លះ ជាឆ្នាំងបាយរបស់ខ្ញុំ
- 2017-11-08 06:42:48
- ចំនួនមតិ 0 | ចំនួនចែករំលែក 0
អ្នករត់ស៊ីក្លូ៖ ស៊ីក្លូតម្លៃពីរជី កន្លះ ជាឆ្នាំងបាយរបស់ខ្ញុំ
ចន្លោះមិនឃើញ
នៅអំឡុងទសវត្សឆ្នាំ១៩៨០ លោក យឹម តន ថាខ្លួន បានទិញស៊ីក្លូមួយនេះ ក្នុងតម្លៃជាមាស ពីរជីកន្លះ ហើយថាវាជាទ្រព្យសម្បត្តិ ដ៏មានតម្លៃរបស់លោកនាសម័យនោះ។ មកដល់បច្ចុប្បន្ន បុរសវ័យ៧០ឆ្នាំ និងពិការភ្នែកម្ខាងរូបនេះ ពន្យល់ថា ស៊ីក្លូពីរជីកន្លះនេះ នៅតែដើរតួយ៉ាងចម្បងក្នុងការទ្រទ្រង់ជីវភាពគ្រួសារ យ៉ាងចាំបាច់មិនអាចខ្វះបាន។
មានទីលំនៅ នៅសង្កាត់ចាក់អង្រែ ខណ្ឌមានជ័យ រាជធានីភ្នំពេញ អ្នកធាក់ស៊ីឆ្លងសម័យ រៀបរាប់ថា លោកផ្ញើជីវភាពលើស៊ីក្លូ ស្ទើរពេញមួយជីវិត តាំងពីសម័យសង្គមរាស្ត្រនិយម មកម៉្លេះ។ ទោះភ្នែកពិការ វ័យចាស់ ក៏លោក យឹម តន អះអាងថា លោកទំនងពុំអាចបោះបង់អាជីពនេះឡើយ ដើម្បីការរស់រាន ដរាបណាលោកតា នៅធាក់កើត។
លោកបន្ថែមថាៈ «បើនិយាយឲ្យចំទៅបើយើងអត់រកងាប់...ខ្ញុំរាប់រងទាំងអស់ និយាយទៅខ្ញុំខ្វះខាតច្រើនណាស់...អ្នកណាមិនចង់មានបាន តែគេថាជាព្រហ្មលិខិត ខំម៉េចក៏ទៅអត់រួចដែរ»។
ទោះជាមេឃចាប់ផ្តើមងងឹតហើយក្តី លោក យឹម តន នៅមិនទាន់វិលទៅលំនៅដ្ឋាននៅឡើងនោះ ឆ្លៀតប្រាប់អ្នកព័ត៌មាន Sabay បន្តថា លោកមានកូនៗ៤នាក់ ដែលស្ទើរទាំងអស់ ជាកម្មកររោងចក្រ។
លោកថាកូនៗរបស់លោកពុំមានលទ្ធភាពច្រើន ទំនុកបម្រុងដល់ជីវិតវ័យចំណាស់លោកឡើយ។ ដូច្នេះហើយ លោកថាជីវិតលោកនៅតែពឹងអាស្រ័យលើស៊ីក្លូតម្លៃពីរជីកន្លះនេះ មិនអាចអត់បាន។ ជារៀងរាល់ព្រឹក លោក យឹម តន ធាក់ស៊ីក្លូពីចាក់អង្រែ មករកឌុបម៉ូយ នៅផ្សារអូឡាំពិក រហូតដល់យប់ ទើបធាក់ទៅផ្ទះនៅ ចាក់អង្រែងវិញ។ ក្នុងមួយថ្ងៃៗលោកអាចរកប្រាក់បានជាង២ម៉ឺនរៀល ពីរបរដែលលោកប្រកបតាំងពីវ័យជំទង់មួយនេះ៕
ចុចទស្សនា៖