តួឯកល្ខោនយីកេរូបនេះមិនត្រឹមតែស្រស់ស្អាតទេ ថែមទាំងមានជំនាញសិល្បៈច្រើនទៀត

2017-11-10 23:25:00
ចំនួនមតិ 0 | ចំនួនចែករំលែក 0

ចន្លោះមិនឃើញ

យីកេជាសិល្បៈបុរាណដែលសម្តែងឡើងដោយមានការរាំផង ច្រៀងផង ហើយទម្រង់សិល្បៈបុរាណផ្នែកនេះមិនសូវមានអ្នកចេះច្រើនទេ។

ថ្ងៃនេះ Sabay សូមណែនាំឲ្យប្រិយមិត្តស្គាល់តួឯកស្រីល្ខោនយីកេមួយរូប ដែលមានទាំងទេពកោសល្យ និងរូបសម្រស់ស្រស់សោភា មិនចាញ់តារាល្បីឡើយ គឺកញ្ញា កែវ សុផានិត។

ជាកូនពៅនៅក្នុងគ្រួសារ សុផានិត មានបងប្អូន៣នាក់ និងបានឈានជើងចូលហាត់ក្នុងទម្រង់ល្ខោនយីកេ នៅសាលាមធ្យមសិក្សាក្នុងឆ្នាំ ២០១០។ យុវតីដែលមានសំឡេងស្រួយស្រែសរូបនេះ បានគ្រងតំណែងជាតួឯកស្រី តាំងពីចូលហាត់ដំបូង ដោយសារមានរូបសម្បត្តិស្រស់ស្អាត មាននិស្ស័យឆាប់ចាប់បានក្នុងការហ្វឹកហាត់ និងមានសំឡេងល្អពីធម្មជាតិ។

សុផានិត សម្តែងក្នុងរឿងមួយ

ទន្ទឹមនឹងទទួលបានតួនាទីជាតួឯងនេះ សុផានិត ប្រាប់ Sabay ថានាងត្រូវខិតខំហាត់ទ្វេដង ដើម្បីតាមទាន់រៀមច្បង និងព្យាយាមហាត់មេរៀនដែលអ្នកគ្រូដាក់ឲ្យ។ «ខ្ញុំព្យាមហាត់ឲ្យច្រើនបងៗឯកសារដែលគ្រូដាក់ឲ្យខ្ញុំប្រឹងប្រែងហាត់ណាស់។ ការចូលហាត់ល្ខោនយីកេនេះដោយសារខ្ញុំស្រលាញ់ទម្រង់ល្ខោនជាពិសេសល្ខោននេះមិនសូវមានការសម្ដែងទេ វាស្ងាត់ខ្លាំងណាស់។ខ្ញុំមិនចង់ឲ្យវានៅតែស្ងាត់បែបនេះទេ។ ខ្ញុំស្ដាយទម្រង់សិល្បៈដ៏ចំណាស់នេះ»។

ត្បិតជាអ្នកតាកែវ តែនារីញញឹមស្រទន់ រូបនេះគ្មានសាច់ញាតិជាអ្នកសិល្បៈទេ ប៉ុន្តែដោយក្ដីស្រលាញ់សិល្បៈបុរាណនេះ នាងប្រឹងប្រែងហាត់វាដោយគ្មានធ្វេសប្រហែសឡើយ។ ការខិតខំពិតជាមានផលបច្ចុប្បន្ន កែវ សុផានិត កំពុងបម្រើការងារនៅនាយកដ្ឋានទស្សនីភាពសិល្បៈ នៃក្រសួងវប្បធម៌ ជាសិល្បករ ផ្នែកយីកេ។

តួឯកស្រីដែលមានសមត្ថភាពអាចសម្ដែងតួច្រើនយ៉ាងទាំងកូនក្មេង វ័យជំទង់ និងមនុស្សចាស់រូបនេះ ក្រៅប្រើការងារក្នុងក្របខណ្ខរដ្ឋ សុផានិតក៏ជានិស្សិតកំពុងសិក្សាឆ្នាំទី៤នៅសាកលវិទ្យាល័យភូមិន្ទវិចិត្រសិល្បៈ ផ្នែកល្ខោនយីកេ។

ក្រៅពីអាចច្រៀងនិងសម្តែងយីកេ សិល្បករវ័យ ២០ឆ្នាំរូបនេះចេះច្រៀងភ្លេងខ្មែរ ជាពិសេសនាងក៏អាចសម្ដែងល្ខោននិយាយបានទៀតផង។

សុផានិត និយាយថាបើធៀបគ្នារវាងការចេញទៅសម្តែងយីកេ និងសិល្បៈ ២មុខទៀតដែលនាងចេះ ការសម្តែងយីកេមិនសូវមានការអញ្ជើញឲ្យទៅសម្តែងនោះទេ។ បើទោះជាប្រភពចំណូលភាគច្រើន បានមិនបានមកពីការសម្តែងល្ខោនយីកេក៏ដោយក៏នាងនៅរក្សាចិត្តស្រលាញ់សិល្បៈនេះ និងមិនមានគំនិតបោះបង់អាជីពសម្តែងល្ខោនយីកេនេះឡើយ ។ នាងមានបំណងថែសិល្បៈបុរាណនេះ ចង់ឲ្យបរទេសបានស្គាល់ ពីសិល្បៈនេះ និងចង់បង្រៀនដល់ក្មេងជំនាន់ក្រោយ៕