iPhone X មិនតិចគ្រឿង កំពុងជួបបញ្ហាអណ្ដែតខ្សែបៃតងលើអេក្រង់
- 2017-11-11 03:53:33
- ចំនួនមតិ 0 | ចំនួនចែករំលែក 0
iPhone X មិនតិចគ្រឿង កំពុងជួបបញ្ហាអណ្ដែតខ្សែបៃតងលើអេក្រង់
ចន្លោះមិនឃើញ
ចំនួន iPhone X ដែលជួបបញ្ហាលេចចេញខ្សែឆ្នូតពណ៌បៃតងលើផ្ទៃអេក្រង់ OLED កំពុងបន្តកើនឡើងជាបន្តបន្ទាប់ ដោយមកទល់ពេលនេះមានប្រមាណ ២៥ ករណីហើយ។ ចំនួននេះគឺតូចបំផុត បើប្រៀបនឹងចំនួនផលិតសរុបដែលមានដល់រាប់លានគ្រឿង។
អ្នកប្រើប្រាស់មួយចំនួនដែលជួបបញ្ហានេះបានចែករំលែករឿងរ៉ាវរបស់ខ្លួនលើបណ្ដាញសង្គម Facebook, Twitter, Reddit រួមទាំងសហគមន៍ Apple Support ផងដែរ។ អ្នកប្រើប្រាស់ម្នាក់ជាសមាជិក Forum របស់វិបសាយ Mac Rumors ដែលមានឈ្មោះសម្គាល់ tmiles81 លើកឡើងថា ៖ "ខ្ញុំកំពុងតែលេងទូរសព្ទថ្មីរបស់ខ្ញុំ ហើយសុខៗវាក៏លេចចេញឆ្នូតពណ៌បៃតងឡើង។ វាភ្លឺមែនទែន ដោយលេចចេញមួយឆ្នូតវែងនៅផ្នែកខាងស្ដាំនៃអេក្រង់”។
ពេលបើកចេញពីប្រអប់ភ្លាម ឆ្នូតបៃតងនេះមិនទាន់ឃើញមានលើ iPhone X ឡើយ ប៉ុន្តែពេលប្រើបានមួយរយៈស្រាប់តែលេចចេញមក។ បញ្ជាក់ថារាល់ iPhone X ដែលជួបបញ្ហានេះ មិនបានធ្លាក់ ឬ ប៉ះពាល់ត្រង់កន្លែងណានោះទេ។
អ្នកប្រើប្រាស់ជាច្រើនបានឲ្យដឹងថា សាកល្បងបិទរួចបើកទូរសព្ទ រួមទាំងធ្វើការ Reset ដែរ ប៉ុន្តែមិនបានធ្វើឲ្យឆ្នូតបៃតងរលាយបាត់នោះទេ។ ក្រុមហ៊ុន Apple មិនទាន់មានការឆ្លើយតបជុំវិញបញ្ហានេះនៅឡើយទេ។ យ៉ាងណាក្ដី Apple បានប្ដូរទូរសព្ទថ្មីជូនអតិថិជនដែលជួបបញ្ហានេះដោយមិនគិតថ្លៃ នេះបើតាមការឲ្យដឹងពីអតិថិជនដែលបានទាក់ទងទៅក្រុមហ៊ុន Apple។
ឆ្នូតបៃតងនេះទំនងជាបញ្ហាទាក់ទងនឹងអេក្រង់ OLED។ Galaxy S7 ក៏ប្រើអេក្រង់ OLED នេះដែរ ហើយកាលពីឆ្នាំទៅបានជួបប្រទះបញ្ហាស្រដៀងគ្នានេះ ដោយលេចចេញឆ្នូតពណ៌ផ្កាឈូកលើស្មាតហ្វូនមួយចំនួន។ Samsung បានទទួលស្គាល់ថាដោយសារកំហុសលើ Hardware ទើបនាំឲ្យកើតមានបញ្ហានេះ៕