មើលស្ថិតិរបស់អ្នកស្រី កែ ឡេង មុនមកដល់កម្ពុជាយប់នេះ

2017-11-13 03:55:23
ចំនួនមតិ 0 | ចំនួនចែករំលែក 0

ចន្លោះមិនឃើញ

វីរនារីកម្ពុជា អ្នកស្រី កែ ឡេង នឹងមកដល់កម្ពុជាយប់នេះហើយ បន្ទាប់ពីធ្វើបានល្អដោយការពារមេដាយមាសពិភពលោករបស់ខ្លួនសម្រេចក្នុងការប្រកួតជើងឯកប៉េតង់ពិភពលោកប្រចាំឆ្នាំ២០១៧នៅប្រទេសចិន។

ពិធីដង្ហែកែ ឡេង កាលពីលើកមុន

តាមការឲ្យដឹងពីគណៈកម្មាធិការជាតិអូឡាំពិកកម្ពុជាថា នឹងមានពិធីទទួលស្វាគមន៍យ៉ាងអធិកអធមចំពោះវត្តមានមកដល់របស់ម្ចាស់មេដាយមាសពិភពលោកឆ្នាំ២០១៧គឺអ្នកស្រី កែ ឡេង និងគណៈប្រតិភូនៅអាកាសយានដ្ឋានភ្នំពេញអន្តរជាតិវេលាម៉ោង១១:១៥នាទីយប់នេះ។

នេះជាការឈ្នះមេដាយមាសពិភពលោកជាលើកទី៣របស់អ្នកស្រី បន្ទាប់ពីឈ្នះលើកទី១កាលពីឆ្នាំ២០១៣នៅប្រទេសបារាំង និងលើកទីកាលពីឆ្នាំ២០១៥នៅប្រទេសថៃ។ សម្រាប់ឆ្នាំ២០១៧នេះអ្នកស្រី កែ ឡេងរកបានពិន្ទុខ្ពស់ជាងគេពោលគឺ៤៦ពិន្ទុក្នុងវគ្គសន្សំដើម្បីឈរលើកំពូលតារាងក្នុងចំណោមបេក្ខនារី៤៣នាក់ដើម្បីឡើងវគ្គបន្ត។

ពិធីដង្ហែកែ ឡេង កាលពីលើកមុន

វគ្គ៨នាក់ចុងក្រោយ វីនារីកម្ពុជាបានទម្លាក់កីឡាការិនី Randrianbahiny Cicine របស់ប្រទេសម៉ាដាស្ការាដោយលទ្ធផល ៤៧-២៦ ឡើងទៅកាន់វគ្គពាក់កណ្តាលផ្តាច់ព្រ័ត្រ។ វគ្គពាក់កណ្តាលផ្តាច់ព្រ័ត្រលោកស្រីបានយកឈ្នះកីឡាការិនី Beil Luzia របស់ប្រទេសអាល្លឺម៉ង់ដោយលទ្ធផល ៣២-២១ ឡើងទៅវគ្គផ្តាច់ព្រ័ត្រ។ នៅវគ្គផ្តាច់ព្រ័ត្រអ្នកស្រី កែ ឡេង បានយកឈ្នះកីឡាការិនីថៃ Wongchuvij Phantipha ដោយពិន្ទុ ៤៣-៣៨។ ដូច្នេះកីឡាការិនីកម្ពុជាឈ្នះមេដាយមាស កីឡាការិនីថៃឈ្នះមេដាយប្រាក់ ខណៈកីឡាការិនីអាល្លឺម៉ង់ និងទួរគីទទួលបានមេដាយសំរឹទ្ធ។

ក្រឡេកមើលតារាងស្ថិតិម្ចាស់មេដាយមាសគិតចាប់តាំងពីឆ្នាំ១៩៨៨មក អ្នកស្រី កែ ឡេង ឈ្នះបាន៣ដងហើយស្មើកីឡាការិនីបារាំង Angelique Papon ដែលធ្លាប់ឈ្នះមេដាយមាសពិភពលោក៣ដងដែរគឺឆ្នាំ២០០៥ ឆ្នាំ២០០៧ និងឆ្នាំ២០០៩។ អ្វីដែលគួរឲ្យចាប់អារម្មណ៍គឺថា វីរនារីកម្ពុជារូបនេះកំពុងឈរលើគេ៣សម័យកាលជាប់គ្នាដែលនៅមានឱកាសប្រកួតការពារមេដាយមាសរបស់ខ្លួនបន្តទៀត ខណៈកីឡាការិនីបារាំងអស់ឱកាសបំបែកកំណត់ត្រាហើយ៕