អណ្តើកហ្លួងជាង២០ក្បាល បានលែងឲ្យរស់តាមធម្មជាតិ ដោយភ្ជាប់ជាមួយឧបករណ៍តាមដាន
- 2017-11-13 08:07:39
- ចំនួនមតិ 0 | ចំនួនចែករំលែក 0
អណ្តើកហ្លួងជាង២០ក្បាល បានលែងឲ្យរស់តាមធម្មជាតិ ដោយភ្ជាប់ជាមួយឧបករណ៍តាមដាន
ចន្លោះមិនឃើញ
ក្រុមអ្នកជំនាញសត្វអណ្តើកអន្តរជាតិ បានលែងសត្វអណ្តើកហ្លួងពេញវ័យចំនួន២៥ក្បាលដែលកន្លងមកបានថែរក្សានៅក្នុងមជ្ឈមណ្ឌលអភិរក្សប្រភេទសត្វល្មូនខេត្តកោះកុងឲ្យរស់នៅក្នុងព្រែកធម្មជាតិវិញ ដោយមានភ្ជាប់ឧបករណ៍តាមដាននៅលើសត្វអណ្តើកទាំងនោះផងដើម្បីបានដឹងពីការរស់នៅរបស់ពួកវា។
សត្វអណ្តើកទាំងនេះបានលែងនៅក្នុងដែនទឹកធម្មជាតិនៅតាមដងព្រែកស្រែអំបិលខេត្តកោះកុង នាថ្ងៃទី១៣ ខែវិច្ឆិកា ឆ្នាំ២០១៧ នេះ ដែលជាទីជម្រកធម្មជាតិតែមួយគត់សម្រាប់អណ្តើកហ្លួងនៅកម្ពុជា។
សត្វអណ្តើកហ្លួង ស្ថិតនៅក្នុងបញ្ជីក្រហមរបស់អង្គការIUCN ជាប្រភេទរងគ្រោះជិតផុតពូជបំផុតនៅលើសកលលោក និងជាអណ្តើកមួយប្រភេទក្នុងចំណោមអណ្តើកទាំង២៥ប្រភេទដែលកំពុងរងគ្រោះថ្នាក់ខ្លាំងជាងគេបំផុតផងដែរ។ ពួកវាមានវត្តមានរស់នៅតែក្នុងប្រទេសកម្ពុជា ឥណ្ឌូនេស៊ី ម៉ាឡេស៊ី និងថៃ ហើយចំនួនរបស់ពួកវានៅលើសកលលោកមានតិចជាង៥០០ក្បាល។
នៅក្នុងប្រទេសកម្ពុជា ប្រភេទសត្វអណ្តើកនេះក៍បានចាត់ជាប្រភេទកំពុងរងគ្រោះថ្នាក់ផងដែរហើយត្រូវបានដាក់បញ្ចូលជាប្រភេទសត្វល្មូនតំណាងឲ្យប្រទេសកម្ពុជា ដោយព្រះរាជក្រឹត្យនស/រកត/០៣០៥/១៤៩ ចុះថ្ងៃទី២១ ខែមីនា ឆ្នាំ២០០៥។
បន្ទាប់ពីទទួលបានការត្រួតពិនិត្យសុខភាពដោយក្រុមគ្រូពេទ្យសត្វមកពីសួនសត្វប្រន់នៅសហរដ្ឋអាមេរិក របស់អង្គការWCS សត្វអណ្តើកហ្លួងទាំង២៥ក្បាលនេះ ត្រូវបានបំពាក់ជាមួយនូវឧបករណ៍តាមដានដែលអាចឲ្យក្រុមអ្នកស្រាវជ្រាវធ្វើការត្រួតពិនិត្យ និងតាមដានការរស់រាន និងបម្លាស់ទីរបស់ពួកវាបានជាច្រើនឆ្នាំ ព្រមទាំងអាចស្វែងយល់អំពីប្រភេទទីជម្រកធម្មជាតិដែលពួកវាប្រើប្រាស់នៅក្នុងប្រព័ន្ធព្រែកនេះទៀតផង។
លោក សោម ស៊ីថា ទីប្រឹក្សាបច្ចេកទេសគម្រោងអភិរក្សខេត្តកោះកុងនៃអង្គការWCS បានថ្លែងថា ការហាមឃាត់មិនឲ្យមានការបូមខ្សាច់នៅក្នុងព្រែកស្រែអំបិលជាកត្តាអំណោយផលដល់ការរស់នៅរបស់សត្វអណ្តើកហ្លួងនេះ។
លោកបន្ថែមថា៖ «កាលពីពេលថ្មីៗនេះ រាជរដ្ឋាភិបាលកម្ពុជាបានហាមឃាត់សកម្មភាពបូមខ្សាច់នៅតាមប្រព័ន្ធព្រែកស្រែអំបិលដែលជាដំណឹងដ៏ល្អបំផុតសម្រាប់ការងារអភិរក្សសត្វអណ្តើកហ្លួង ពីព្រោះវាបានជួយ ការពារ និងថែរក្សាប្រព័ន្ធព្រែកស្រែអំបិលដែលជាទីធម្មជាតិ និងជាកន្លែងពងកូនតែមួយគត់របស់អណ្តើកហ្លួងនៅកម្ពុជា»
លោកបន្តថា អ្នកជំនាញអាចតាមដានបម្លាស់ទី ស្វែងយល់អំពីទីជម្រក និងការរស់រាននៃអណ្តើកហ្លួង ដែលលែងទៅក្នុងធម្មជាតិនេះតាមរយៈឧបករណ៍ដែលភ្ជាប់នៅនឹងអណ្តើក។ រាល់ព័ត៌មានដែលប្រមូលបានលោកថាជួយក្រុមអភិរក្សរបស់រដ្ឋបាលជលផល និងអង្គការWCS រៀបចំផែនការ និងគ្រប់គ្រងប្រភេទសត្វនេះល្អប្រសើរជាងមុន។
គួរបញ្ជាក់ថាការដាក់ឈ្មោះអណ្តើកហ្លួងយ៉ាងដូច្នេះ ពីព្រោះកាលពីមុនមានតែគ្រួសាររាជ្យវង្សប៉ុណ្ណោះទេដែលអាចសោយពងរបស់អណ្តើននេះបាន៕