Bill Gates គិត​ចង់​បង្កើតទីក្រុង​​បច្ចេកវិទ្យា នៅ​ពេល​អនាគត

  • 2017-11-14 03:39:52
  • ចំនួនមតិ

ចន្លោះមិនឃើញ

ក្រុមហ៊ុន​វិនិយោគ​អចលនទ្រព្យ​របស់​សេដ្ឋី​លោក Bill Gates កាល​ពី​ពេល​ថ្មីៗ​នេះ បាន​ទិញ​ដី​មួយ​កន្លែង​នៅ​រដ្ឋ Arizona សហរដ្ឋអាមេរិក ថ្លៃ​ខ្ទង់ ៨០ លាន​ដុល្លារ ក្នុង​គោលដៅ​អភិវឌ្ឍ​ទៅ​ជា​ទីក្រុង​ឆ្លាតវៃ។

ក្រុមហ៊ុន​វិនិយោគ​ជា​ដៃគូ​របស់ Gates មាន​ឈ្មោះ Belmont Partners មាន​មូលដ្ឋាន​ក្នុង​តំបន់​នោះ​ស្រាប់ បាន​ឲ្យ​ដឹង​ថា​ដី​ដែល​ក្រុមហ៊ុន​ទិញ មាន​ទំហំ​ ២៥,០០០ Arces (១ Arce = ០,៤ ហិចតា) បង្កើត​ទីក្រុង​ឆ្លាតវៃ​មាន​ឈ្មោះ Belmont។ នេះ​បើ​យោង​តាម​របាយការណ៍​ចុះ​ផ្សាយ​ពី KPNX។

ហេដ្ឋារចនាសម្ព័ន្ធ​ក្នុង​ទីក្រុង នឹង​គ្រប​ដណ្ដប់​ដោយ​ប្រព័ន្ធ​បច្ចេកវិទ្យា​ទំនើប, ត​ភ្ជាប់​បណ្ដាញ​ឌីជីថល​ល្បឿន​លឿន, មជ្ឈមណ្ឌល​ផ្ទុក​ទិន្នន័យ, ប្រមូល​ផ្ដុំ​រថយន្ត​បើក​ដោយ​ស្វ័យប្រវត្តិ និង​ផលិតកម្ម​ថ្មីៗ​ជា​ច្រើន​ទាក់ទង​បច្ចេកវិទ្យា​សុទ្ធ​សាធ។

ប្រភព​ខាង​លើ​បន្ត​ទៀត​ថា ​ទំហំ​ផ្ទៃដី​ទាំង​មូល​នឹង​អាច​ផ្ទុក​ប្រជាជន​បាន​ប្រហែល ៨ ម៉ឺន​នាក់ ដោយ​ដី ៤៧០ Acres សម្រាប់​បង្កើត​សាលា​រដ្ឋ និង​ដី ៣,៨០០ Arces សម្រាប់​បង្កើត​ការិយាល័យ, អគារ​ពាណិជ្ជកម្ម និង​ហាង​លក់​ចែកចាយ។

Gates បាន​បញ្ជាក់​ថា Smart City នឹង​ដើរ​តាម​គន្លង​នៃ​ការ​អភិវឌ្ឍ​ស្រដៀង​គ្នា​មាន​ក្នុង​ទីក្រុង Columbus រដ្ឋ Ohio។​

អាន​អត្ថបទ​បន្ទាប់


ប្រភព៖ Foxnews ប្រែសម្រួល៖ កៅ រក្សា