រិន សារ័ត្ន នឹងចូលប្រឡូកប្រដាល់ MMA វិញនៅពេលឆាប់ៗខាងមុខនេះ

2017-11-14 08:31:25
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកលេងគុនខ្មែរ រិន សារ័ត្ន ថានៅពេលខាងមុខនឹងហ្វឹកហាត់គុនចម្រុះឡើងវិញ ដើម្បីស្វាគមន៍សង្វៀន MMA មិនថានៅក្នុង ឬក្រៅប្រទេសនោះទេ ព្រោះបច្ចុប្បន្នកីឡាករមួយចំនួននៅកម្ពុជាមានឱកាសចេញទៅប្រកួតនៅបរទេសបានច្រើន។

កីឡាករ រិន សារ័ត្ន

កីឡាករ រិន សារ័ត្ន បង្ហើបពីគម្រោងវិលចូលសង្វៀន MMA បន្ទាប់ពីឃើញមិត្តរួមអាជីពដទៃទៀតមានឱកាសចេញទៅនៅឯក្រៅប្រទេស សាងកេរ្តិឈ្មោះល្បីនាពេលកន្លងមកនេះ។ បច្ចុប្បន្ននេះគេកំពុងតែឡើងសង្វៀនគុនខ្មែរតាមបណ្ដាស្ថានីយផ្សេងៗ ហើយក្រៅពីនេះក៏ឆ្លៀតហាត់ក្បាច់គុនចម្រុះជាបណ្ដើរៗហើយ ជាការរំលឹកឡើងវិញខ្លះ។

កីឡាករកម្ពុជាវ៉ៃនៅសង្វៀន One Championship

អ្នកប្រដាល់រូបនេះនិយាយឲ្យដឹងទៀតថា ឥលូវនេះគេសុំឲ្យលោក ហ៊ុន ចាន់រាជ ជួយដាក់ឈ្មោះចាប់គូនៅតាមសង្វៀនក្នុងទ្រុងនៅក្រៅប្រទេសណាក៏បានដែរ ដើម្បីឲ្យបានឡើងប្រកួតបន្ថែមពីលើសង្វៀនគុនខ្មែរសព្វថ្ងៃ។ បានជា «សារ័ត្ន» ចង់ប្រកួតក្នុងទ្រុងឡើងវិញដូចនេះ ព្រោះពីមុនរូបគេជាអតីតកីឡាករវ៉ៃគុនចម្រុះរបស់សង្វៀន MYTV និងជាជើងឯករងនៅនោះទៀតផង បើនិយាយពីបទពិសោធវិញក៏មិនតិចឆ្នាំដែរ ដូច្នេះពេលឃើញកីឡាករដទៃគេឡើងវ៉ៃម្ដងៗ ហាក់ដូចដាស់ចិត្តខ្លួនឲ្យចង់ឡើងប្រកួតវិញតែម្ដង។

សង្វៀន One Championship

រិន សារ័ត្ន បច្ចុប្បន្នកំពុងហ្វឹកហាត់ជាមួយលោកគ្រូ ហ៊ុន ចាន់រាជ ថ្មីៗនេះគេទើបតែវិលត្រលប់មកពីប្រកួតនៅឯប្រទេសមីយ៉ាន់ម៉ា ហើយសប្ដាហ៍មុននេះរងបរាជ័យក្រោយថ្មីដៃ គឹម វាសនា នៅសង្វៀនប៉ុស្តិ៍លេខ៥។ សារ័ត្ន ជាអតីតជើងខ្លាំងមួយរូបនៅសង្វៀន MYTV ផងដែរ៕

អត្ថបទ៖ នួន ស៊ីណា