តារាចម្រៀងដែលមានសំនៀងស្រដៀង ហួយ មាស សម្រេចបំណងដែលប៉ងជាយូរ
- 2017-11-14 10:40:09
- ចំនួនមតិ 0 | ចំនួនចែករំលែក 0
តារាចម្រៀងដែលមានសំនៀងស្រដៀង ហួយ មាស សម្រេចបំណងដែលប៉ងជាយូរ
ចន្លោះមិនឃើញ
តារាចម្រៀងដែលមានសំនៀងស្រដៀងនឹងអ្នកស្រី ហួយ មាស គឺអ្នកនាង មាស អាលីស បានសម្រេចក្តីស្រមៃដែលប៉ងជាយូរមកហើយ ដោយបានចូលផលិតកម្មមួយ មានឱកាសចេញបទ Original ផ្ទាល់ខ្លួនផង។
តារាចម្រៀងមានសំឡេងក្រអួនក្រអៅរូបនេះបានប្រាប់ Sabay ថា ខ្លួនបានចុះកុងត្រាជាមួយផលិតកម្ម C2GO កាលពីពាក់កណ្ដាលខែវិច្ឆិកានេះ ក្រោមហេតុផលមានឱកាសធ្វើរឿងមនុស្សធម៌បានច្រើន។ ពិធីការិនីវិទ្យុចិនរូបនេះបញ្ជាក់ថា ផលិតកម្មនេះមានកម្មវិធីតន្ត្រីសប្បុរសធម៌នៅតាមបណ្ដាប្រទេសមួយចំនួន ដូចជាប្រទេសថៃ កូរ៉េ អូស្ត្រាលី ជាដើម ដូច្នេះខ្លួនមានឱកាសច្រើនដើម្បីជួយអ្នកក្រីក្រក្នុងប្រទេសកម្ពុជា។
ស្របពេលដែលអ្នកនាងក៏ត្រៀមចេញបទ Original Song នៅពាក់កណ្ដាលខែធ្នូនេះដែរ ដោយត្រៀមចេញ៤បទ ហើយអ្នកនាងសម្ដែងដោយផ្ទាល់ផង។ លើសពីនេះ បទចម្រៀងរបស់អ្នកនាងក៏ត្រូវបានដាក់បញ្ចូលក្នុង call tune ទូរស័ព្ទ ដោយសហការជាមួយក្រុមហ៊ុន Smart ។
“ដោយបងឃើញថា ផលិតកម្មនេះមានកម្មវិធីតន្ត្រីសប្បុរសធម៌ រៃអង្គាសប្រាក់ យកមកជួយចាស់ជរា ជនក្រីក្រ និងកុមារកំព្រា ទើបបានបងចុះកុងត្រាជាមួយ។ បងអាចទៅច្រៀងនៅបណ្ដាប្រទេសមួយចំនួន ដើម្បីយកប្រាក់មកជួយអ្នកក្រីក្រក្នុងប្រទេសយើង ហើយនេះជាបំណងប្រាថ្នារបស់បងយូរហើយ"។
អតីតពិធីការិនីវិទ្យុអាស៊ីអាគ្នេយ៍រូបនេះ ចុះកុងត្រាជាមួយផលិតកម្ម C2GO រយៈពេល៥ឆ្នាំ ហើយបទដែលត្រៀមចេញ៤បទដំបូងនោះ មិនទាន់ដឹងចំណងជើងច្បាស់នៅឡើយ គ្រាន់តែដឹងថាជាបទបែបមនោសញ្ចេតនា និងបទបែបយុវវ័យ។ ទោះជាចូលក្នុងផលិតកម្មក្ដី តែតារាចម្រៀងរូបនេះនៅតែបន្តច្រៀងតាមស្ថានីយទូរទស្សន៍គ្រប់ប៉ុស្តិ៍ដែលអញ្ជើញ និងច្រៀងក្នុងកម្មវិធីមង្គលការ កាត់នំខួបកំណើត ជប់លៀងផ្សេងៗដដែល។
តារាចម្រៀង មាស អាលីស ចាប់ផ្ដើមអាជីពដំបូងជាពិធីករកម្មវិធីវិទ្យុ និងកាន់កម្មវិធីច្រៀងចម្រៀងជាមួយប្រិយមិត្ត។ ដោយសារតែមានទេពកោសល្យ និងទឹកដមសំឡេងស្រដៀងអ្នកស្រី ហួយ មាស កន្លងមកពិធីការិនីរូបនេះត្រូវបានអ្នករៀបចំកម្មវិធីអញ្ជើញទៅច្រៀងក្នុងកម្មវិធីទូរទស្សន៍ធំៗមួយចំនួន ហើយទស្សនិកជនក៏គាំទ្រអ្នកនាងមិនតិចដែរ៕
ចុចអាន៖
ស្ទើរតែដូចម្ចាស់ដើម! ស្តាប់តែសំឡេង ស្មានតែសំនៀងអ្នកស្រី ហួយ មាស (វីដេអូ)