លម្អិតជុំវិញនាវាអាស៊ានចតនៅកម្ពុជា ហើយទើបចេញវិញម្សិលមិញ
- 2017-11-14 09:01:44
- ចំនួនមតិ 0 | ចំនួនចែករំលែក 0
លម្អិតជុំវិញនាវាអាស៊ានចតនៅកម្ពុជា ហើយទើបចេញវិញម្សិលមិញ
ចន្លោះមិនឃើញ
ម្សិលមិញនេះ នាវាយុវជនអាស៊ាន ទើបតែចេញពីកំពង់ផែព្រះសីហនុ បន្តឆ្ពោះទៅទីក្រុងបាងកក ប្រទេសថៃ បន្ទាប់ពីចូលចតនៅកម្ពុជា កាលពីថ្ងៃទី១០ វិច្ឆិកា ដោយធ្វើដំណើរផ្ទាល់ពីជប៉ុន។
នាវាយុវជនអាស៊ាន និងជប៉ុន (SSEAYP) ដែលបង្កើតតាំងពីឆ្នាំ ១៩៧៤ មក ជាកម្មវិធីផ្លាស់ប្ដូរយុវជនប្រចាំឆ្នាំ រៀបចំដោយរដ្ឋាភិបាលជប៉ុន និងបណ្ដាប្រទេសអាស៊ាន ដើម្បីលើកកម្ពស់មិត្តភាព សហប្រតិបត្តិការ និងការយល់ដឹងពីគ្នាទៅវិញទៅមក នៅក្នុងចំណោមយុវជនអាស៊ានទាំង ១០ ប្រទេស និងជប៉ុន។ មានកម្មវិធីច្រើន ដើម្បីផ្សព្វផ្សាយវប្បធម៌ រឹតចំណងមិត្តភាព ទាំងលើនាវាផ្ទាល់ និងតាមប្រទេសសំចតនីមួយៗ។
ជាក់ស្ដែង គ្រាន់មកដល់កម្ពុជាភ្លាម យុវជនអាស៊ានសរុប ៣៧០ នាក់ បានចូលជួបសំណេះសំណាលសម្ដេចតេជោ ហ៊ុន សែន នាយករដ្ឋមន្ត្រីកម្ពុជា ឯកឧត្ដមបណ្ឌិត ហង់ ជួនណារ៉ុន រដ្ឋមន្ត្រីក្រសួងអប់រំ ឯកឧត្ដម ហ៊ុន ម៉ានី ប្រធានសហព័ន្ធសហភាពយុវជនកម្ពុជា និងថ្នាក់ដឹកនាំផ្សេងៗទៀត។ ក្រៅនេះ ពួកគេក៏បានស្នាក់នៅជាមួយគ្រួសារកម្ពុជាតាមផ្ទះ និងមានសកម្មភាពផ្សេងៗជាច្រើន មុននឹងចេញដំណើរតាមនាវាបន្តទៀត។
នាវា Nippon Maru ត្រូវធ្វើដំណើររយៈពេល ៥២ ថ្ងៃ (២៣ តុលា-១៣ ធ្នូ ២០១៧) ដោយផ្ដើមចេញដំណើរពីជប៉ុន ឆ្លងកាត់ និងចូលចតនៅ កម្ពុជា ថៃ ឥណ្ឌូណេស៊ី ម៉ាឡេស៊ី និងចុងក្រោយត្រលប់មកដល់ជប៉ុនវិញ។
កម្ពុជា បញ្ជូនក្រុមនិស្សិត ២៩ នាក់ រៀងរាល់ឆ្នាំ ចូលរួមក្នុងកម្មវិធីនាវានេះ តាំងពីឆ្នាំ២០០០ មកម្ល៉េះ មួយឆ្នាំក្រោយកម្ពុជាបានចូលជាសមាជិកអាស៊ាន ខណៈដែលឆ្នាំនេះ Phnom Penh City Center ក៏បានចូលរួមគាំទ្រដល់កម្មវិធីនាវានេះផងដែរ។ គិតត្រឹម២០១៧ កម្ពុជា បាននិស្សិតចូលរួមលើនាវាយុវជនអាស៊ានសរុប ៥៤២ នាក់។ រាល់ឆ្នាំ កម្ពុជា តែងរៀបចំការប្រឡងជ្រើសរើសនិស្សិតតំណាង ឲ្យចូលរួមនាវាយុវជនអាស៊ាន៕