ស៊ូ យ៉ាទី ជាប់ជា Man of The Match យប់មិញ ក្រោយសង្គ្រោះបាល់ជិត២០ជើង

2017-11-15 01:59:20
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកចាំទី ស៊ូ យ៉ាទី បានជាប់ជា Man of The Match ក្នុងការប្រកួតដែលកម្ពុជាចាញ់ហ្សកដានីដោយលទ្ធផល ១-០ ក្នុងពានរង្វាន់ AFC Asian Cup ។

ក្រោមក្រសែភ្នែកអ្នកគាំទ្រ ១៨ ៣៦៩នាក់នៅពហុកីឡដ្ឋានជាតិ ក្រុមកម្ពុជាព្យាយាមលេងទប់ខ្លាំងមែនទែន ព្រោះថាប៉ះក្រុមខ្លាំងហ្សកដានី ពិតជាមិនធម្មតានោះទេ។ យ៉ាងណាមិញ ក្រុមហ្សកដានីមានឱកាសច្រើនមែនទែន នៅតំបន់គ្រោះថ្នាក់ និងការទាត់បាល់ពីចម្ងាយ ប៉ុន្តែមិនអាចទម្លាយសំណាញ់ទីខាងកម្ពុជាបានឡើយ ព្រោះមានរនាំងយ៉ាងម៉ាំចាំទប់។

ស៊ូ យ៉ាទី ដែលជាអ្នកចាំទីដៃស្អិតម្នាក់របស់កម្ពុជា សង្គ្រោះបាល់បានច្រើនចេញពីជើងរបស់ក្រុមហ្សកដានី បានរហូតដល់ទៅ១៥ជើងឯណោះ។ ខណៈដែលខាងក្រុមហ្សកដានីនោះវិញ លេងតាមចង្វាក់នៃការគ្រប់គ្រងបាល់មួយៗ មានឱកាសទើបទៅមុខ ហើយអាចស៊ុតចេញបាន២៨ជើងដែរ ប៉ុន្តែឱកាសទាំងអស់នោះ អាចចូលទីខាងកម្ពុជាបានតែ១គ្រាប់ប៉ុណ្ណោះ។

ក្រោយពីចប់ការប្រកួតនោះដែរ អ្នកចាំទី ស៊ូ យ៉ាទី បានជាប់ជាកីឡាករឆ្នើមប្រចាំការប្រកួត និងបាននិយាយដូច្នេះថា៖ “នេះជាការប្រកួតស្វិតស្វាញមួយ ដែលកម្ពុជាប៉ះក្រុមខ្លាំង។ យើងបានព្យាយាមអស់ពីសមត្ថភាពដើម្បីលេង ប៉ុន្តែសោកស្ដាយដែលធ្លាយគ្រាប់បាល់១គ្រាប់”។

បរាជ័យ១ប្រកួតនេះទៀតរបស់កម្ពុជា គឺមានន័យថាពួកគេអស់ឱកាសក្នុងការឡើងវគ្គបន្ដពានរង្វាន់ធំប្រចាំទ្វីបអាស៊ី AFC Asian Cup ទៀតហើយ បើទោះជាសល់១ប្រកួតចុងក្រោយទៀតក៏ដោយ៕