ថ្នាក់ដឹកនាំ Toyota ថា វិស័យបាល់ទាត់កម្ពុជានៅក្មេងខ្ចី

2017-11-15 02:16:56
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក Hao Quoc Tien អនុប្រធានប្រតិបត្តិក្រុមហ៊ុន Toyota ថា វិស័យបាល់ទាត់នៅកម្ពុជានៅក្មេងខ្ចីនៅឡើយ ការលើកឡើងនេះក្រោយធ្វើសន្និសីទកាសែតព្រឹត្តិការណ៍ Toyota Mekong Club Championship 2017 ដែលបានរៀបចំកាលពី១៣ ខែវិច្ឆិកា ឆ្នាំ២០១៧ នៅប្រទេសថៃ ។

លោក Hao Quoc Tien

ថ្នាក់ដឹកនាំរូបនេះបានបាននិយាយថា ៖ « សម្រាប់ទស្សនៈរបស់ខ្ញុំ...វិស័យបាល់ទាត់នៅកម្ពុជានៅក្មេងខ្ចី។ ខ្ញុំគិតថា កម្ពុជាត្រូវការអភិវឌ្ឍន៍ខ្លួនបន្ថែមទៀតឲ្យបានខ្ពស់ជាងនេះ ពិសេសបង្កើនបទពិសោធន៍ដល់កីឡាករឲ្យបានកាន់តែច្រើន»។ ការឆ្លើយនេះក្រោយអ្នកសារព័ត៌មានកម្ពុជាសួរថា តើលោកមានគម្រោងចង់ចូលរួមជួយឧបត្ថម្ភដល់ក្លឹបក្នុងលីគកំពូលកម្ពុជាដែរឬទេ?

ព្រឹត្តិការណ៍ Toyota Mekong Club 2017 នឹងចាប់ផ្ដើមដំណើរការប្រកួតចាប់ពីថ្ងៃទី៩ ធ្នូ ឆ្នាំ២០១៧ ដោយមានក្រុមលេខ ១ មកលីគកំពូលវៀតណាមប៉ះក្រុមកំពូលមកពីលីគកំពូលកម្ពុជា ដោយលេងចំនួនពីរជើង។ ខណៈ ក្រុមឈ្នះវគ្គដំបូង នឹងឡើងទៅប៉ះក្រុម Lao Toyota FC របស់ឡាវនាថ្ងៃទី១៧ ខែធ្នូ ឆ្នាំ២០១៧ វគ្គពាក់កណ្ដាលផ្ដាច់ព្រ័ត្រ (លេងមួយជើង) ដើម្បីឡើងទៅប៉ះក្រុមតំណាងមកពី Toyota League Cup របស់ថៃ នៅវគ្គផ្ដាច់ព្រ័ត្រ ដែលលេងពីជើងថ្ងៃទី២៣ ធ្នូ ឆ្នាំ២០១៧ និង ថ្ងៃទី៦ មករា ឆ្នាំ២០១៨ ។

ការប្រកួត Toyota Mekong Club បានបង្កើតឡើងកាលពីឆ្នាំ២០១៤ ដោយមានក្រុមចូលរួមចំនួន ៥ ក្នុងនោះគឺក្រុមមកពីមីយ៉ាន់ម៉ា កម្ពុជា ឡាវ វៀតណាម និងថៃ (ប្រទេសនៅតាមបណ្ដោយទន្លេមេគង្គ) ដោយឡែកឆ្នាំនេះ មីយ៉ាន់ម៉ា មិនបានចូលរួមឡើយ ដោយសារពួកគេមានកម្មវិធីប្រកួតជាន់គ្នាច្រើនពេកមិនអាចចូលរួមក៏សុំធ្វើការដកខ្លួនតែម្ដង។