កូរ៉េខាងត្បូងរងគ្រោះរញ្ជួយដីធំទី២ កម្រិត ៥,៤ រ៉ិចទ័រ
- 2017-11-15 09:08:57
- ចំនួនមតិ 0 | ចំនួនចែករំលែក 0
កូរ៉េខាងត្បូងរងគ្រោះរញ្ជួយដីធំទី២ កម្រិត ៥,៤ រ៉ិចទ័រ
ចន្លោះមិនឃើញ
ភ្នាក់ងារអាកាសធាតុក្នុងប្រទេស បានអោយដឹងថាកូរ៉េខាងត្បូងបានទទួលរងការវាយប្រហារពីគ្រោះរញ្ជួយដីដ៏ធំទី២របស់ប្រទេសកម្រិត ៥,៤ វ៉ិចទ័រនៅថ្ងៃពុធនេះ។
គ្រោះរញ្ជួយដីកម្រិត ៥,៤ វ៉ិចទ័របានវាយប្រហារតំបន់មួយមានចម្ងាយ ៩គីឡូម៉ែត្រភាគខាងជើងទីក្រុង Pohang ក្នុងខេត្ត Gyeongsang កាលពេលវេលាម៉ោង ២:២៩ រសៀល (ម៉ោងក្នុងតំបន់ 0529 GMT) នេះបើតាមការឲ្យដឹងពីរដ្ឋបាលឧតុនិយមកូរ៉េ។
កម្រិតនៃការរញ្ជួយដីលើកនេះគឺជាការរញ្ជួយដីធំបំផុតទី ២ នៅក្នុងប្រវត្ដិសាស្ដ្ររបស់ប្រទេសបន្ទាប់ពីការរញ្ជួយដីដ៏ធំបំផុតមិនធ្លាប់មានទំហំ ៥,៨ រ៉ិចទ័រ បានវាយប្រហារទីក្រុងGyeoungjuស្ថិតនៅភាគខាងត្បូងទីក្រុង Pohang កាលពីខែកញ្ញាឆ្នាំមុន។
ដំបូងឡើយការរញ្ជួយដីមានត្រឹមកម្រិត ២,២ និង ២,៦ រ៉ិចទ័រប៉ុណ្ណោះដែលបានវាយប្រហារតំបន់ក្បែរទីក្រុង Pohang បន្ទាប់មកក៏កើនឡើងដល់កម្រិត ៣,៦ រ៊ិចទ័រ ហើយវាយប្រហារនៅក្នុងតំបន់មួយដែលមានចម្ងាយ ៧គីឡូម៉ែត្រភាគខាងជើងទីក្រុង Pohang។ ការរញ្ជួយដីនេះក៏បានបញ្ជូនរំញ័រទូទាំងប្រទេសរួមទាំងទីក្រុងសេអ៊ូលដែលមានចម្ងាយប្រហែល ២៧០ គីឡូម៉ែត្រពីទីក្រុង Pohang និងតំបន់ភាគខាងត្បូងកោះ Jeju ផងដែរ។
យោងតាមទូរទស្សន៍ក្នុងស្រុកមួយបានបង្ហាញថា ជញ្ជាំងនៃអាគារមួយចំនួនមានស្នាមប្រេះ រួមទាំងបង្អួច និងចង្កៀងអគ្គិសនីបានខូចខាតនិងបែកបាក់ផងដែរ។ រថយន្តនៅតាមដងផ្លូវមួយចំនួនបានខូចខាតដោយសារជញ្ជាំងបាក់សង្កត់លើ រីឯសិស្សសាលានិងប្រជាជនត្រូវបានជម្លៀសចេញពីអាគារនិងសាលារៀន។
គិតត្រឹមម៉ោង ៣រសៀលនេះ មិនទាន់មានសេចក្ដីរាយការណ៍ណាមួយពីការស្លាប់នៅឡើយទេ។ យោងតាមភ្នាក់ងារពន្លត់អគ្គីភ័យបានឲ្យដឹងថាមានត្រឹមតែ ៤ករណីនៃការរងរបួសស្រាលប៉ុណ្ណោះត្រូវបានរាយការណ៍។
ប្រធានាធិបតីកូរ៉េខាងត្បូង លោក Moon Jea-in បានកោះប្រជុំបន្ទាន់ជាមួយលេខារបស់លោក បន្ទាប់ពីទទួលបានដំណឹងអំពីការរញ្ជួយដី ក្នុងកំឡុងពេលដែលលោកកំពុងស្ថិតក្នុងជើងហោះហើរទៅកាន់ទីក្រុងសេអ៊ូល បន្ទាប់ពីបានបញ្ចប់ដំណើរកម្សាន្តរយៈពេលមួយសប្ដាហ៍ក្នុងប្រទេស វៀតណាម ឥណ្ឌូណេស៊ី និងហ្វីលីពីន៕