សិល្បករចម្រៀងអាយ៉ៃជើងចាស់ ២រូបធ្លាប់មានឈ្មោះល្បី កំពុងឈឺធ្ងន់

2017-11-16 01:53:32
ចំនួនមតិ 0 | ចំនួនចែករំលែក 0

ចន្លោះមិនឃើញ

សិល្បករច្រៀងអាយ៉ៃជើងចាស់ពីរូបកំពុងមានជំងឺធ្ងន់ជាប់កាយ គឺលោក លោក ឈិន ឈាង និង លោក ផ្លុក មឿក។ លោក លោក ឈិន ឈាង មានជំងឺត្បៀតសរសៃឈាមក្នុងខួរក្បាល ពេលនេះដើរមិនរួច ចំណែក លោកតា ផ្លុក មឿក រលាកសួតទាំងសងខាង និងស្វិតខួរក្បាលមួយចំហៀង ដែលពេលនេះត្រូវនិមន្តព្រះសង្ឃឲ្យធម៌ទៅហើយ ។

១.លោក ឈិនឈង

លោក ឈិន ឈាន មិនត្រឹមអ្នកច្រៀងអាយ៉ៃពូកែវោហារ មានសំឡេងពីរោះមិនងាយស្អកស្អាទេ ថែមជាអ្នកបញ្ចូលសំឡេងល្ខោនរឿងឲ្យវិទ្យុជាតិយ៉ាងប៉ិនប្រសប់ទៀតផង។ សិល្បករដ៏មានទេពកោសល្យនេះកំពុងតែធ្លាក់ខ្លួនឈឺរយៈពេលជាង១០ឆ្នាំមកហើយ។ ក្រោយពីក្រុមគ្រួសារព្យាយាមព្យាបាលអស់រយៈពេលជាច្រើនឆ្នាំមក ស្ថានភាពជំងឺត្បៀតសរសៃរឈាមក្នុងខួរក្បាល ក៏ល្អប្រសើរជាងមុន ហើយបច្ចុប្បន្នលោកសម្រាក ព្យាបាលនៅក្នុងផ្ទះ។

ចាប់ពីឆ្នាំ២០០២ មកលោកលែងមានសកម្មភាពសម្តែង ហើយពេលថ្មីៗស្ថានភាពជំងឺមានការវិវត្តន៍ អ្នកស្រីអ៊ុក សុផា ភរិយាលោកស្មៀនឈាង ប្រាប់ Sabay ថា ១មួយខែនេះលោក ឈិន ឈៀង មិនអាចដើរបានដូចមុនទេ គឺដើរបានបន្តិចបន្តួចប៉ុណ្ណោះ និងលើសជាតិស្ករថែមមួយមុខទៀត អ្នកស្រីបានត្រឹមឲ្យហូបថ្នាំប៉ុណ្ណោះ ។

អ្នកស្រីអ៊ុក សុផាថា «មើលគាត់ឡើងអស់រលីងហើយ ទៅវៀតណាមផង ទៅថៃផង ពេទ្យគេមានលទ្ធភាពមើល តែយើងអស់សមត្ថភាពមើលគាត់ ពេលនេះមានតែតាមយថាកម្ម ប្រហែលកម្មយើងជាតិមុនក៏មិនដឹងពេលតាឈឺ មានផ្សំថ្នាំឲ្យគាត់ហូប ពេលខ្លះក៏បាត់ ពេលខ្លះក៏អន់ទៅ។»

សិល្បករអាយ៉ៃវ័យ ៧៣ឆ្នាំ ឈិន ឈៀង ល្បីឈ្មោះតាំងពីសម័យសង្គមរាស្រ្ដនិយម ពេលនេះកំពុងរស់នៅក្នុងផ្ទះល្វែងមួយ នៅជិតវត្ថនាគវន្តរាជនីភ្នំពេញ ជាមួយភរិយា និងកូនៗ៕

២.លោក ផ្លុង មឿក

លោក ផ្លុង មឿក សិល្បករ អាយ៉ៃពូកែវោហារ ដែលធ្លាប់មានប្រជាប្រិយភាព ពេលនេះកំពុងធ្លាក់ខ្លួនឈឺ ដែលមានអាការៈធ្ងន់ធ្ងន់គួរឲ្យបារម្ភ។ អ្វីដែលគួរឲ្យសង្វេគ គឺភរិយារបស់លោកតា ទើបតែទទួលមរណភាពមិនទាន់បាន៣ខែផង ស្រាប់តែអាការៈជំងឺចាស់លោកស្មៀនមឿក ក៏ចុះដុនដាបខ្លាំង រហូតដល់បញ្ជូនទៅ មន្ទីរពេទ្យកាល់ម៉ែតដើម្បីព្យាបាល។ ក្រោយមកដោយសារស្ថានភាពជំងឺរបស់លោកបានធូរបន្តិច ម្យ៉ាងក្រុមគ្រួសារអស់លទ្ធភាពចំណាយក្នុងព្យាបាលផង ក៏សម្រេចយកលោកមកផ្ទះវិញ។

កូន ស្រី លោកផ្លុងមឿក អ្នកនាង ផ្លុង រចនា បានប្រាប់ Sabay ថាពេលនេះក្រុមគ្រួសារតែងតែនិមន្តព្រះសង្ឃមកសូត្រធម៌ជូនលោករយៈពេលជិតជាង១០ថ្ងៃមកហើយ ព្រោះលោកស្មៀនមឿក ពិសាមិនសូវបាន សម្រាន្តមិនសូវលក់។ ផ្លុងរចនាបន្តថា «ពួកខ្ញុំគ្មានលទ្ធភាពមើលទេ ហើយគាត់ហូបមិនសូវបានពួកខ្ញុំក៏និមន្តព្រះសង្ឃសូត្រធម៌ជូនគាត់ ប្រាប់គាត់ឲ្យតាំងចិត្តស្ដាប់ព្រះធម៌ ពេលនេះគាត់អាចហូបបាយបានខ្លះហើយ»។

នៅក្នុងឆ្នាំនេះលោកផ្លុង មឿកដែលជាអ្នកអាយ៉ៃតាំងពីសម័យរសាធាររដ្ឋប្រជាមានិតកម្ពុជា មានអាយុ៨១ឆ្នាំ កំពុងស្នាក់នៅក្នុងផ្ទះជួលមួយកន្លែងជិតវត្តស្វាយពពែ៕

អត្ថបទៈ ស្រីអូន