ទេស សុខន មិនបោះបង់សិល្បៈបុរាណ ទោះ១ខែមិនមានការសម្ដែងម្ដងក៏ដោយ

2017-11-16 06:32:11
ចំនួនមតិ 0 | ចំនួនចែករំលែក 0

ចន្លោះមិនឃើញ

តួនាងសេដា ក្នុងរឿងរាមកេរ្តិ៍ លោក ទេព សុខន មិនចុះចាញ់ឬបោះបង់ចោលការសម្ដែងរបាំបុរាណឡើយ តែបែរជាខំពង្រឹងខ្លួនទ្វេដង ដើម្បីបន្តមរកតមួយនេះចែកទៅដល់ក្មេងជំនាន់ក្រោយ។

សិល្បករវ័យក្មេងដែលមានទេពកោសល្យទាំងការសម្ដែង និងការប្រើទឹកមុខ លោក ទេព សុខន ត្រូវបានគេស្គាល់ច្បាស់ថា ដើរតួជានាងសេដា ក្នុងទម្រង់ល្ខោនខោល បានប្រាប់ Sabay ថា បើទោះជាពេលបច្ចុប្បន្ននេះខ្លួនមិនសូវមានគេហៅសម្ដែងលើទម្រង់បុរាណក្ដី តែលោកនៅតែមិនបោះបង់ទម្រង់នេះឡើយ។ សិល្បករមកពីខេត្តប៉ៃលិនរូបនេះបានបញ្ជាក់ថា ក្នុង១ខែជួនកាលគ្មានគេហៅទៅសម្ដែង សូម្បីតែម្ដង តែលោកមិនកើតទុកខ្លាំងពេកទេ ហើយលោកខំប្រឹងប្រែងហាត់រៀនបន្តទៅទៀតសម្រាប់អនាគតទៅមុខ និងដើម្បីក្មេងជំនាន់ក្រោយ។

“បាទបង មិនចោលទេ ពីព្រោះមកពីឆ្ងាយ ដើម្បីសិល្បៈ ចោលស្ដាយណាស់បង៧ឆ្នាំ បើចោលស្ដាយណាស់ ហើយទម្រង់បុរាណនេះខ្ញុំស្រលាញ់តាំងពីតូចម្ល៉េះ។ ខ្ញុំមានបំណងបើកសាលាឯកជននៅខេត្តប៉ៃលិនដើម្បីបង្ហាត់បង្រៀនក្មេងៗនៅទីនោះ ដែលគ្មានលទ្ធភាពម្យ៉ាងវាជាការថែរក្សាសិល្បៈវប្បធម៌ខ្មែរផងបង"។

សិល្បករវ័យ២៤ឆ្នាំរូបនេះ មានបងប្អូន៣នាក់ លោកជាកូនទី២។ លោកបានចូលសិល្បៈដំបូងក្នុងឆ្នាំ២០០៥ បន្ទាប់មកក៏បានឈប់២ឆ្នាំដោយសារមិនអាចទ្រាំនឹងភាពឈឺចាប់បាន។ លោកចូលហាត់សិល្បៈដំបូង ក្នុងសមាគម "មរតកកុមារបាសាក់" ហាត់របាំប្រពៃណី។ លោកបានឡើងមកភ្នំពេញនៅចុងឆ្នាំ២០០៩ ដោយស្នាក់នៅជាមួយម្ដាយមីង។ ចំពោះថវិកាដែលបានពីការសម្ដែងវិញ លោកបញ្ជាក់ថា ផ្គត់ផ្គង់បានត្រឹមការចំណាយផ្ទាល់ខ្លួនមិនទាន់អាចជួយគ្រួសារបានទេ ព្រោះពុំសូវមានអ្នកហៅ។ សិល្បកររូបនេះចេះរបាំ៣ទម្រង់ គឺរបាំបុរាណ របាំប្រពៃណី និងល្ខោនខោល ក្រៅពីការសម្ដែងសិល្បៈ លោកក៏ជាអ្នកតុបតែង សំម្លៀកបំពាក់អោយសិល្បៈការិនីរបាំបុរាណផងដែរ។

ចុចអាន៖

ហង់ ភូមរ៉ា យំមិនតិចដងទេព្រោះល្ខោនខោល

"ជីវិតល្ខោនខោលខ្មែរ" ទទួលបានការគាំទ្រខ្លាំងពីយុវវ័យកម្ពុជា

សិលាចារឹក ២ និយាយពីល្ខោនខោល

អត្ថបទ៖ ប៉ូ សាគុន