ទូរទស្សន៍ក្នុងស្រុកប្រតិកម្មចំពោះការបន្ថែមពន្ធលើការនាំចូលភាពយន្តបរទេស
- 2017-11-17 02:58:52
- ចំនួនមតិ 0 | ចំនួនចែករំលែក 0
ទូរទស្សន៍ក្នុងស្រុកប្រតិកម្មចំពោះការបន្ថែមពន្ធលើការនាំចូលភាពយន្តបរទេស
ចន្លោះមិនឃើញ
បន្ថែមពីលើពន្ធដែលមានស្រាប់ សម្រាប់ខ្សែភាពយន្តភាគនាំចូលពីបរទេស ក្រសួងសេដ្ឋកិច្ច និងហរញ្ញវត្តុ តាមរយៈ ក្រសួងវប្បធម៌ និងវិចិត្រសិល្បៈ តម្រូវឱ្យគ្រប់បណ្ដាស្ថានីយទូរទស្សន៍ក្នុងស្រុកទាំងអស់ បង់ពន្ធជូនរដ្ឋថែមទៀត លើការនាំចូលភាពយន្តពីបរទេស ដោយក្នុងមួយភាគ ត្រូវបង់ពន្ធ ៤០ម៉ឺនរៀលបន្ថែមទៀត ចាប់ពីឆ្នាំ ២០១៨តទៅ។
បញ្ហានេះបានធ្វើឱ្យតំណាងស្ថានីយទូរទស្សន៍ក្នុងស្រុកនានា ដែលមានជាង ២០ស្ថានីយប្រតិកម្មជាខ្លាំង។ ពួកគេអះអាងថាការធ្វើនេះ នឹងធ្វើឱ្យចំណាយកាន់តែខ្លាំងថែមទៀត ខណៈបច្ចុប្បន្នពួកគេអះអាងថា ស្ថានីយភាគតិចប៉ុណ្ណោះអាចរកបានប្រាក់ចំណេញ។
កញ្ញា ទូច បុប្ផា តំណាងមកពីស្ថានីយទូរទស្សន៍ PNN បាននិយាយថា ការកំណត់ពន្ធបន្ថែមលើការនាំចូលរឿងភាគពីបរទេសបែបនេះ អាចនឹងធ្វើឱ្យស្ថានីយទូរទស្សន៍កញ្ញាកាន់តែមានបន្ទុកធ្ងន់ថែមទៀត ខណៈស្ថានីយបានបង់ពន្ធជាច្រើនរួចមកហើយ ចំណែកការរកចំណូលត្រលប់មកវិញហាក់មិនមានសមាមាត្រគ្នា។
កញ្ញាបញ្ជាក់ថា ប្រសិនបើច្បាប់នេះតម្រូវឱ្យអនុវត្តន៍ចាប់ពីឆ្នាំ២០១៨ ទៅមែន ស្ថានីយទូរទស្សន៍របស់ខ្លួន នឹងត្រូវចំណាយពន្ធបន្ថែមលើរឿងភាគនេះមិនក្រោម ១៤ ០០០ ដុល្លារទៅ ១៥ ០០០ដុល្លារ បន្ថែមទៀតក្នុងមមួយខែ ព្រោះបច្ចុប្បន្ន PNN បានចាក់រឿងបរទេស មិនក្រោម ៧ទៅ ៨ម៉ោងនោះទេក្នុងមួយថ្ងៃៗ។
ដោយឡែកលោក អ៊ឹង ឆៃងួន អគ្គនាយកទូរទស្សន៍ ហង្សមាស ក៏បានលើកឡើងថា ការយកពន្ធដ៏ច្រើនបែបនេះ ធ្វើឱ្យគ្រប់ស្ថានីយទូរទស្សន៍ក្នុងស្រុកទាំងអស់ កាន់តែមានលំបាក ព្រោះបច្ចុប្បន្នស្ទើរគ្រប់ស្ថានីយបាក់ពឹងពាក់ខ្លាំងលើការនាំចូលភាពយន្តបរទេសនេះ ដើម្បីរកចំណូល ខណៈការរកចំណូលពីរឿងភាគក្នុងស្រុកហាក់ខុសគ្នាឆ្ងាយ។
លោកស្នើក្រសួងអាចពន្យារ ឬក៏បន្ថយការយកពន្ធនេះ ឱ្យថោកជាងនេះ ដើម្បីឱ្យគ្រប់ស្ថានីយទាំងអស់មានទឹកចិត្តបន្ត និងផ្សព្វផ្សាយកម្មវិធី និងរឿងភាគទាំងក្នុងស្រុក និងក្រៅស្រុក។
ទីប្រឹក្សាក្រសួងវប្បធម៌ និងវិចិត្រសិល្បៈឯកឧត្ដម ស៊ិន ចន្ទសាយ៉ា និយាយថា ការដាក់ចេញកោលការណ៍ ដោយតម្រូវឱ្យគ្រប់ស្ថានីយទូរទស្សន៍ត្រូវបង់ពន្ធបន្ថែម ៤០ម៉ឺនរៀល លើរឿងភាគនាំចូលពីបរទេស គឺជាគោលការណ៍របស់ក្រសួងសេដ្ឋកិច្ច និងរាជរដ្ឋាភិបាល ដើម្បីប្រមូលពន្ធតាមផែនការ។
ឯកឧត្ដមបញ្ជាក់ថា ប្រសិនបើតំណាងស្ថានីយទាំងអស់ប្រតិកម្មបែបនេះ លោកនឹងយកសំណើទាំងនេះដាក់ជូនរដ្ឋមន្ត្រី ដើម្បីពិចារណាថែម។ ក៏ប៉ុន្តែឯកឧត្តមអះអាងថា លទ្ធផលយ៉ាងនោះ អាស្រ័យលើការសម្រេចរបស់អន្តរក្រសួង ដែលបានសម្រេចនាពេលកន្លងមក។
ប្រសិនបើគ្មានការប្រែប្រួលទេ ចាប់ពីដើមឆ្នាំ២០១៨ តទៅ គ្រប់បណ្ដាស្ថានីយទូរទស្សន៍ទាំងអស់ នឹងត្រូវបង់ពន្ធលើការនាំចូលរឿងភាគមកពីបរទេស ចំនួន ៤០ម៉ឺនរៀលថែមទៀត ក្នុងមួយភាគ ដែលមានរយៈពេល មួយម៉ោង៕