Prudential នាំបុគ្គលិកជាង ១០០នាក់ ជួយជួសជុល និងលាបថ្នាំសាលានៅព្រៃវែង
- 2017-11-17 08:40:42
- ចំនួនមតិ 0 | ចំនួនចែករំលែក 0
Prudential នាំបុគ្គលិកជាង ១០០នាក់ ជួយជួសជុល និងលាបថ្នាំសាលានៅព្រៃវែង
ចន្លោះមិនឃើញ
បុគ្គលិកព្រូដិនសលកម្ពុជា (Prudential) ប្រមាណជាង ១០០នាក់ បានចុះជួយជួសជុល និងលាបថ្នាំអគារសាលារៀន ៣ខ្នងរបស់សាលាបឋមសិក្សាព្រៃតាម៉ុក ក្នុងខេត្តព្រៃវែង កាលពីថ្ងៃទី១១ វិច្ឆិកា ដែលនឹងជួយសម្រួលដល់ការសិក្សារបស់សិស្សជាង ៥០០នាក់ ដោយនេះជាសាលារៀនទី៥ ហើយ ដែលទទួលបានការគាំទ្រតាមរយៈគម្រោង "ញញឹមជាមួយគ្នាទី២"។
លោកស្រី ហួត សាន់នី នាយកគ្រប់គ្រងជាន់ខ្ពស់ផ្នែកធនធានមនុស្ស Prudential បាននិយាយថា៖ "គម្រោងញញឹមជាមួយគ្នា ជាការផ្ដួចផ្ដើមរបស់បុគ្គលិក Prudential តាំងពី ២០១៥ ក្នុងគោលបំណងដើម្បីលើកស្ទួយការអប់រំកុមារតាមជនបទ ដោយធ្វើឱ្យបរិស្ថានសាលារៀនមានភាពល្អប្រសើរ និងបង្កើនបរិយាកាសកុមារមេត្រីដល់ពួកគេ"។
លោក ខែក រដ្ឋា នាយកសាលាបឋមសិក្សាព្រៃតាម៉ុក បានឲ្យដឹងថា៖ "ខ្ញុំមានចិត្តត្រេកអរណាស់ ចំពោះ Prudential ដែលមកជួយសាលាយើងខ្ញុំអស់ពីចិត្តពីថ្លើម ហើយក៏ជាលើកទីមួយសម្រាប់សាលាយើងខ្ញុំ ដែលមានក្រុមហ៊ុនក្នុងស្រុកមកជួយ"។
"ញញឹមជាមួយគ្នា" ជាគម្រោងអភិវឌ្ឍន៍សហគមន៍មួយរបស់ Prudential ដែលក្រុមហ៊ុនបានកំណត់យកសាលារៀនមួយចំនួនដើម្បីជួយគាំទ្រផ្អែកលើលក្ខណៈវិនិច្ឆ័យផ្ទាល់ពីក្រុមហ៊ុន និងតាមការណែនាំពីដៃគូរបស់ខ្លួនគឺអង្គការ Save the Children ក្នុងការជួយកែលម្អអគារសិក្សា និងហេដ្ឋារចនាសម្ព័ន្ធជាមូលដ្ឋាន ដើម្បីផ្ដល់បរិយាកាសសិក្សាប្រសើរជាងមុនសម្រាប់កុមារ៕