Pep ជាប់ឈ្មោះជាអ្នកចាត់ការ PL ល្អបំផុតប្រចាំខែតុលា
- 2017-11-17 12:08:04
- ចំនួនមតិ 0 | ចំនួនចែករំលែក 0
Pep ជាប់ឈ្មោះជាអ្នកចាត់ការ PL ល្អបំផុតប្រចាំខែតុលា
ចន្លោះមិនឃើញ
អម្បាញ់មិញនេះ គណនី Twitter ផ្លូវការរបស់លីគកំពូលអង់គ្លេសបានប្រកាសថា អ្នកចាត់ការក្លឹប Manchester City លោក Pep Guardiola បានជាប់ឈ្មោះជាអ្នកចាត់ការល្អបំផុតក្នុងលីគប្រចាំខែតុលាកន្លងទៅនេះ។
នេះជាលើកទី ៣ហើយ ដែលលោក Pep បានឈ្នះរង្វាន់មួយនេះ តាំងពីមកដឹកនាំក្លឹប Manchester City កាលពីរដូវកាលមុន ដោយក្នុងនោះលើកទី ១ លោកបានឈ្នះកាលពីខែកុម្ភៈ និងមួយទៀតកាលពីខែកញ្ញាឆ្នាំនេះ។ ក្នុងខែតុលាកន្លងទៅនេះ អ្នកចាត់ការសញ្ជាតិអេស្ប៉ាញរូបនេះ បានដឹកនាំក្លឹបយក្សផ្ទៃមេឃអង់គ្លេសមួយនេះឲ្យឈ្នះទាំង ៣ប្រកួតដែលខ្លួនលេង និងស៊ុតចូលសរុប ១៣គ្រាប់។ លទ្ធផលទាំងនេះជួយបង្កើនការនាំមុខរបស់ Manchester City នៅក្នុងតារាងលីគ ដោយសព្វថ្ងៃក្លឹបមួយនេះ កំពុងឈរលេខ ១ មាន ៣១ ពិន្ទុ ពោលគឺ ៨ពិន្ទុលើក្លឹប Manchester United ដែលឈរចំណាត់ថ្នាក់បន្ទាប់។ ក្នុងចំណោម ៣ប្រកួតដែលលេងក្នុងខែតុលា Manchester City សុទ្ធតែស៊ុតចូលយ៉ាងតិចចំនួន ៣គ្រាប់ ដោយក្នុងនោះ បំបាក់ Stoke ៧ ទល់ ២, ឈ្នះ Burnley ៣-០ និងទទួលជ័យជំនះលើ West Brom ក្នុងលទ្ធផល ៣ទល់នឹង ២។ សូមបញ្ជាក់ផងដែរថា ក្លឹប Manchester City បានបង្ហាញទម្រង់លេងយ៉ាងល្អតាំងពីចាប់ផ្ដើមរដូវកាលថ្មីមក ដោយមិនទាន់ពាក្យថាចាញ់នៅឡើយទេ ក្នុងលីគកំពូលអង់គ្លេស ក្នុងនោះឈ្នះរហូតដល់ទៅ ១០ដង និងស្មើតែមួយដងប៉ុណ្ណោះនៅក្នុងលីគ។ មិនត្រឹមតែមានទម្រង់លេងល្អនៅអង់គ្លេសនោះទេ ក្លឹបមួយនេះបានពាំនាំយកទម្រង់ខ្លាំងនេះទៅ UCL ថែមទៀត ដោយលេងឈ្នះទាំង ៤ប្រកួតក្នុងក្របខ័ណ្ឌមួយនេះ ហើយកំពុងឈរលេខ ១ក្នុងពូលរបស់ខ្លួន៕