អត់លុយសងធនាគារ ទូរសព្ទទៅប៉ូលិសថាមានគេបង្កៃគ្រាប់បែក ដើម្បីឲ្យធនាគារបិទទ្វារអត់ធ្វើការ
- 2017-11-18 06:19:04
- ចំនួនមតិ 0 | ចំនួនចែករំលែក 0
អត់លុយសងធនាគារ ទូរសព្ទទៅប៉ូលិសថាមានគេបង្កៃគ្រាប់បែក ដើម្បីឲ្យធនាគារបិទទ្វារអត់ធ្វើការ
ចន្លោះមិនឃើញ
ស្ត្រីម្នាក់បានទូរសព្ទទៅប៉ូលិសដោយនិយាយកុហកថា មានគ្រាប់បែកបង្កប់នៅសាខាធនាគារ HSBCក្នុងសង្កាត់Walthamstow ក្នុងទីក្រុងឡុង ប្រទេសអង់គ្លេស ដោយសង្ឃឹមថានឹងអាចគេចពីបំណុលដែលនាងត្រូវដល់ថ្ងៃសងធនាគារ នូវទឹកប្រាក់ ២០ ០០០ ផោន (ប្រហែល ២៦ ០០០ ដុល្លារ)។
ស្ត្រីវ័យ ៥១ ឆ្នាំ ឈ្មោះ Roseane Craig បានទូរសព្ទទៅប៉ូលិសពីការិយាល័យធ្វើការរបស់នាង អំពីហេតុការណ៍បំផ្ទុះគ្រាប់បែកនេះ។ បន្ទាប់ពីធ្វើការឆែកឆេរអស់ជាង២០នាទី ប៉ូលិសសន្និដ្ឋានថា វាជាការប្រាប់ព័ត៌មានកុហក។ អ្នកគ្រប់គ្រងធនាគារបានប្រាប់ប៉ូលិសថា លោកបានឲ្យបុគ្គលិកដាក់ការប្រុងប្រយ័ត្នខ្ពស់បំផុត និង សម្រាកពេញមួយថ្ងៃ។
ការហៅនេះត្រូវបានប៉ូលិសរកឃើញថាចេញមកពីកន្លែងធ្វើការរបស់ Craig ហើយប៉ូលិសបានទៅដល់ទីនោះ។ រាល់សំនួរទាំងអស់របស់ប៉ូលិស នាងឆ្លើយថា "គ្មានយោបល់"។ ហេតុការណ៍បានកើតឡើងតាំងពីខែមករា ឆ្នាំ២០១៦ ហើយតុលាការទើបកាត់ទោសនាងនៅឆ្នាំ២០១៧ នេះ។
មេធាវីការពារក្តីរបស់ Craig ឈ្មោះ Michael Smith បាននិយាយថាតាមរយៈសកម្មភាពនេះ កូនក្ដីរបស់គាត់ត្រូវតែកាត់ទោសភ្លាមៗនឹងបញ្ជូនទៅពន្ធនាគារ ប៉ុន្តែដោយផ្អែកលើមូលដ្ឋានផលវិបាកខាងផ្លូវចិត្តមិនអាចរកលុយភ្លាមៗដើម្បីសងធនាគារ មេធាវីរូបនោះបានសុំឲ្យចៅក្រមចាត់ទុកថាវាជាករណីពិសេស។
អ្នកស្រី Craig ជាមនុស្សឆ្លាតវៃម្នាក់ បានបញ្ចប់សញ្ញាប័ត្រពីសាលា ហើយគាត់ដឹងថា ធ្វើបែបនេះក៏វាគ្មានផលចំណេញអ្វីដែរ ព្រោះថាបើធនាគារបិទទ្វារថ្ងៃ ស្អែកគេនៅតែធ្វើការធម្មតា អ្នកស្រីនៅតែមានកាតព្វកិច្ចសងលុយជំពាក់ ប៉ុន្តែពេលនោះអ្នកស្រីគិតមិនដល់ចំណុចនេះទេ។ មេធាវីបន្ត។
យ៉ាងណាក្តី តុលាការបានសម្រេចចិត្តដាក់ពន្ធនាគារអ្នកស្រីរយៈពេល៨ខែ ប៉ុន្តែអនុញ្ញាតឲ្យព្យួរទោស (មានទោសប៉ុន្តែអនុញ្ញាតឲ្យនៅក្រៅឃុំ) ដោយយោលលើសំបុត្រពេទ្យដែលបញ្ជាក់ថាអ្នកស្រីពិតជាមានបញ្ហាផ្លូវចិត្តមែន។ ប៉ុន្តែអ្នកស្រី Craig ត្រូវធ្វើការសហគមន៍រយៈពេល៦០ថ្ងៃ ហើយបើអ្នកស្រីមិនរាងចាល ហើយប្រព្រឹត្តបទល្មើសណាមួយ នោះតុលាការនឹងបញ្ជូនទៅពន្ធនាគារភ្លាម ព្រោះកន្លងមកអ្នកស្រីបានប្រព្រឹត្តខុស ៤៩ លើក និង ត្រូវបានកាត់ទោស ១១លើក។ ប្រភពខាងលើបន្ត៕