សម្រុកទៅទទួលជំនួយមានតម្លៃ ១៦ដុល្លារ ជាន់គ្នាស្លាប់ ១៥នាក់នៅម៉ារ៉ុក
- 2017-11-20 02:39:50
- ចំនួនមតិ 0 | ចំនួនចែករំលែក 0
សម្រុកទៅទទួលជំនួយមានតម្លៃ ១៦ដុល្លារ ជាន់គ្នាស្លាប់ ១៥នាក់នៅម៉ារ៉ុក
ចន្លោះមិនឃើញ
យ៉ាងហោចណាស់មានមនុស្ស ១៥បានស្លាប់ និង១០នាក់បានរងរបួសដោយសារហេតុការណ៍ជាន់គ្នាក្នុងភូមិមួយនៅប្រទេស ម៉ារ៉ុក កាលពីថ្ងៃអាទិត្យ ដោយសារសម្រុកទៅទទួលជំនួយអាហារដែលមានតម្លៃ ១៦ដុល្លារ។
តាមអាជ្ញាធរក្នុងស្រុកបានឲ្យដឹងថាហេតុការណ៍នេះកើតឡើងនៅទីក្រុង Sidi Boulalam ក្នុងខេត្ត Essaouira ខណៈពេលដែលអ្នកស្រុកទៅទទួលជំនួយអាហារពីមូលនិធិសប្បុរសធម៌ឯកជនក្នុងស្រុក។ គេហទំព័រព័ត៌មានក្នុងស្រុកគួរឲ្យទុកចិត្ត Alyaoum24.com ក៏បានឲ្យដឹងដែរថាមនុស្សទាំងនោះកំពុងប្រញាប់ប្រញាល់ទៅទទួលជំនួយអាហារដែលមានតម្លៃ ១៦ដុល្លារក្នុងម្នាក់។
ព្រះមហាក្សត្រ Mohammad VI បានបញ្ជាឲ្យអាជ្ញាធរទាំងអស់ជួយជនរងគ្រោះ និងគ្រួសាររបស់ពួកគេ ហើយព្រះអង្គធានារ៉ាប់រងលើការចំណាយទាំងអស់សម្រាប់ការព្យាបាល និងពិធីបុណ្យសពរបស់ជនរងគ្រោះ។
នាយកសុខភាពប្រចាំតំបន់ លោក Khalid Zenjari បានប្រាប់កាសែត The Associated ថាអ្នករងរបួស ៦នាក់ត្រូវបានបញ្ជូនទៅកាន់ទីក្រុងនៃ Essaouira ចម្ងាយប្រហែល ៦០គីឡូម៉ែត្រ និង ៤នាក់ទៀតត្រូវបានព្យាបាលក្នុងតំបន់។
ថ្មីៗនេះគ្រោះរាំងស្ងួតបានធ្វើឲ្យប៉ះពាល់យ៉ាងខ្លាំងដល់វិស័យកសិកម្មរបស់ប្រទេស ម៉ារ៉ុក ដែលជាហេតុធ្វើឲ្យតម្លៃនៃម្ហូបអាហារកើនឡើងខ្ពស់ និងធ្វើអោយប្រជាជនក្នុងតំបន់ដាច់ស្រយាលទាំងនោះត្រូវការជំនួយជាបន្ទាន់៕