មេធាវី នី មុន្នីនាថ រំពឹងកូនក្ដីរបស់ខ្លួនឈ្នះក្តីលើបណ្ដឹងឆបោក
- 2017-11-20 05:08:28
- ចំនួនមតិ 0 | ចំនួនចែករំលែក 0
មេធាវី នី មុន្នីនាថ រំពឹងកូនក្ដីរបស់ខ្លួនឈ្នះក្តីលើបណ្ដឹងឆបោក
ចន្លោះមិនឃើញ
លោក រ៉ូ ប៊ីនណៃ មេធាវីការពារក្ដីឱ្យកញ្ញា នី មុនីនាថ លើបណ្ដឹងឆបោកពីសំណាក់អតីតគូដណ្ដឹងលោក អ៊ឹង សូឡាង រំពឹងកូនក្ដីរបស់លោក នឹងឈ្នះក្ដី ហើយទទួលបានយុត្តិធម៌ ដែលតុលាការគ្រោងកោះហៅចូលបំភ្លឺ ថ្ងៃទី ២២ ខែ វិច្ឆិកា ខាងមុខ។
លោកមេធាវីអះអាងដូច្នេះ ដោយសារលោកមានភស្តុតាងគ្រប់គ្រាន់ អាចបញ្ជាក់បានថាកូនក្ដីខ្លួន មិនបានឆបោកដូចការចោទប្រកាន់ ពីសំណាក់អតីតគូដណ្ដឹងលោក អ៊ឹង សូឡាង នោះទេ។ មេធាវីរូបនេះអះអាងថា កូនក្ដីរបស់លោកមានតែរងភាពអាម៉ាស់ និងក្លាយជាមេម៉ាយឥតខាន់ស្លាទៅវិញ ចំពោះបណ្ដឹងនេះ ព្រោះបានធ្វើឱ្យប៉ះពាល់ដល់ជីវភាពប្រចាំថ្ងៃ ក៏ដូចជាកេរ្តិ៍ឈ្មោះនៅក្នុងសង្គម។
ចំពោះពាក្យបណ្ដឹងពីសំណាក់លោក អ៊ឹង សូឡាង ដែលប្ដឹងទាមទារសំណងពីកូនក្ដីរបស់លោករហូតដល់ ១២ម៉ឺនដុល្លារនោះ គឺជារឿងមួយមិនអាចទៅរួច។
យ៉ាងណាលោក មេធាវី រ៉ូ ប៊ីនណៃ ទទួលស្គាល់ថា រយៈ ៤ឆ្នាំក្នុងនាមជាគូដណ្ដឹងពិតជាមានផ្ដល់ឱ្យគ្នាតិចតួចរឿងលុយកាក់នេះ តែមិនដល់ថ្នាក់ជាង ១២ម៉ឺនដុល្លារដូចការចោទ និងដាក់ពាក្យប្ដឹងឡើយ។ មេធាវីរូបនេះ ជឿជាក់លើតុលាការថា នឹងផ្ដល់ភាពយុត្តិធម៌ជូនកូនក្ដីរបស់ខ្លួន ហើយប្រសិនបើតុលាការសម្រេចឱ្យកូនក្ដីលោកឈ្នះពិតមែន លោកនឹងប្ដឹងបកទៅកាន់អតីតគូដណ្ដឹងវិញ ពីបទធ្វើឱ្យប៉ះពាល់ និងខូចកេរ្តិ៍ឈ្មោះកូនក្ដីរបស់ខ្លួន។
តារាស្រីកញ្ញា នី មុនីនាថ ត្រូវបានចៅក្រមឈ្មោះ អ៊ុក សុវណ្ណារិទ្ធ ចេញដីកាកោះហៅឲ្យចូលខ្លួនបំភ្លឺនៅសាលាដំបូងរាជធានីភ្នំពេញ នាថ្ងៃទី ២២ ខែវិច្ឆិកា ឆ្នាំ២០១៧ លើករណីបណ្តឹងអតីតគូដណ្តឹងលោក អ៊ឹង សូឡាង។
លោក អ៊ឹង សូឡាង បានប្តឹងទាមទារសំណងសរុបមានចំនួន ១២ម៉ឺនដុល្លារ ពីកញ្ញា នី មុនីនាថ។ ដោយក្នុងនោះលោកបានទាមទារឲ្យ នី មុនីនាថ សងប្រាក់ចំនួន ៧ម៉ឺនដុល្លារ និងសំណងជំងឺចិត្តចំនួន ៥ម៉ឺនដុល្លារ៕