មកស្គាល់ ម៉ាស៊ីនចាក់សំឡេងដ៏ចាស់ប្រើលែងកើត តែម្ចាស់ចាត់ទុកថាមានតម្លៃដូចមាស

2017-11-20 10:22:47
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពី១៤០ឆ្នាំមុន ម៉ាស៊ីនថត និងចាក់សំឡេងដំបូងគេបង្អស់ ត្រូវបានបង្កើតឡើង ដោយជនជាតិអាមេរិកាំងម្នាក់ឈ្មោះ ថូម៉ាស អាល់វ៉ា អេឌីសុន។ ម៉ាស៊ីនចាក់សំឡេងនេះ ដំណើរការសំឡេងដោយបំពង់ស៊ីឡាំង និងការរវៃដោយដៃ។ លោក ថូម៉ាស បានដាក់ឈ្មោះម៉ាស៊ីននេះថា អ៊ីឌីសុន (EDISON) ហើយវាជាបុព្វបុរសនៃឧបករណ៍ថត និងចាក់សំឡេងនាសម័យទំនើបនេះឯង។

(ឧបករណ៍ចាក់សំឡេងដែលដាក់តាំងក្នុងហាង/រូបភាព៖ សុធារ៉ាត់)

នៅលើពិភពលោកសព្វថ្ងៃ ម៉ាស៊ីនចាក់សំឡេង អ៊ីឌីសុន មានមិនច្រើនទេ ហើយគេបានចាត់ទុកឧបករណ៍នេះ ជារបស់បុរាណមានតម្លៃដូចដុំមាស ត្បិតគេលែងប្រើការក៏ដោយ។ ដោយសារស្រលាញ់ ចូលចិត្តសន្សំទុកវត្ថុចាស់ៗ និងមើលឃើញពីតម្លៃនៃឧបករណ៍បុរាណលំដាប់សាកលផង លោក លី ប៉េងហេង អ្នកគ្រប់គ្រងនៅហាង ពិព័រណ៍កាហ្វេ បានព្យាយាមដណ្ដើមទិញពីទីផ្សារអន្តរជាតិ ក្នុងឱកាសដាក់ដេញថ្លៃ ដោយមានការប្រកួតប្រជែងក្នុងតម្លៃកប់ពពក។

(ម៉ាស៊ីនចាក់សំឡេង EDISON កំពុងស្ថិតក្នុងហាងកាហ្វេ/រូបភាព៖ សុធារ៉ាត់)

កាលនោះលោក ប៉េងហេង ថា មិនទាន់ដេញថ្លៃបានផង តែលោកមានអារម្មណ៍របស់ដ៏មានតម្លៃនេះ បានមកលើដៃលោក ដែលជាកូនខ្មែរម្នាក់ទៅហើយ។

បច្ចុប្បន្នឧបករណ៍ចាក់សំឡេងចាស់បុរាណជាងគេបង្អស់នេះ កំពុងដាក់តាំងនៅក្នុងហាង ពិព័រណ៍កាហ្វេ ឬ MUSUEM CAFÉ ជាមួយវត្ថុចាស់ៗ ដែលមានអាយុកាលរាប់ទសវត្ស ជាច្រើនទៀត។ លោក លី ប៉េងហេង បញ្ជាក់ប្រាប់។

គួរជម្រាបថា ឧបករណ៍ចាក់សំឡេង និងថតសំឡេងអ៊ីឌីសុនមួយនេះ បានរចនាឡើងនៅឆ្នាំ ១៨៧៧។ ឧបករណ៍នេះត្រូវបានគេយកទៅថត និងចាក់ចម្រៀងនៅឆ្នាំ ១៨៨៨ ក្នុងសន្និសីទកាសែតមួយ នៅទីក្រុងឡុងដ៍ ហើយសម័យកាលដែល អ៊ីឌីសុន មានប្រជាប្រិយខ្លាំង ចន្លោះឆ្នាំ ១៨៩៦ ដល់ ១៩១៥៕

ចុចទស្សនាវីដេអូ៖

អត្ថបទដោយ៖ ឈិន សុធារ៉ាត់