រកឃើញប្រាសាទកសាងសម័យអង្គរ និងមុនអង្គរចំនួន ២ នៅខេត្តរតនៈគិរី
- 2017-11-20 13:49:25
- ចំនួនមតិ 0 | ចំនួនចែករំលែក 0
រកឃើញប្រាសាទកសាងសម័យអង្គរ និងមុនអង្គរចំនួន ២ នៅខេត្តរតនៈគិរី
ចន្លោះមិនឃើញ
បើតាមទំព័រ Facebook ផ្លូវការរបស់ក្រសួងបរិស្ថាន ដែលទើបតែបានចុះផ្សាយអម្បាញ់មិញនេះ បានឲ្យដឹងថា ប្រាសាទបុរាណចំនួន ២ កសាងក្នុងសម័យអង្គរ និងមុនអង្គរ ត្រូវបានរកឃើញនៅខេត្តរតនៈគិរី។
ក្នុងចំណោមប្រាសាទទាំងពីរនេះ មួយមានឈ្មោះ ប្រាសាទអូរព្រះ និងមួយទៀតមានឈ្មោះ ប្រាសាទយ៉ាកណាំង ដែលមានទីតាំងស្ថិតនៅឧទ្យានជាតិអូរយ៉ាដាវ និងដែនជម្រកសត្វព្រៃលំផាត់ ខេត្តរតនៈគិរី។
បើតាមលោក លឹម វណ្ណច័ន្ទ អនុប្រធានការិយាល័យព័ត៌មាន អប់រំ ផ្សព្វផ្សាយនៃក្រសួងបរិស្ថាន ដែលជាអ្នកចុះទៅសិក្សាស្រាវជ្រាវ បានឲ្យដឹងថា ប្រាសាទអូរព្រះទំនងជាបានកសាងឡើងក្នុង សតវត្សទី ១០-១១ នៃគ.ស ហើយមានខឿនជាថ្មបាយក្រៀម និងបំណែកឥដ្ឋ ហើយបែរមុខទៅទិសខាងកើត ស្ថិតនៅខាងលិចទន្លេស្រែពក ប្រមាណ ៤០០ម៉ែត្រ។
លោកក៏បានបញ្ជាក់ទៀតដែរថា៖ "យើងប្រទះឃើញបំណែកជើងទម្ររូប២ បាក់បែក។ ជើងទម្ររូបមួយមានរន្ធ២ បែកសងខាងសម្រាប់ដាក់រូបចម្លាក់ទេវណាមួយ។ យើងក៏បានប្រទះឃើញបំណែកក្រឡផ្នែកខាងក្រោម ដែលជាប្រភេទកុលាលភាជន៍រឹង ខ្មែរសម័យអង្គរ។ តែក្រឡនេះធ្លាយគូទ បើតាមប្រពៃណីទំនៀមទម្លាប់ជនជាតិភាគតិចនៅតំបន់នោះ ពីដើមមកពាងដាក់ស្រាជាវត្ថុមានតម្លៃសម្រាប់ពួកគាត់ គេដូរជាមួយគោ ក្របី ពេលដែលក្នុងគ្រួសារមានអ្នកស្លាប់ គេយកសពទៅបញ្ចុះ ដោយដាក់ពាង រួចចោះគូទអោយធ្លាយ ដាក់កប់នៅខាងលើក្បាល និងមានដាំដើមរកាមួយដើម"។
ចំណែកឯប្រាសាទយ៉ាកណាំង វិញ គឺត្រូវបានកសាងឡើងអំពីឥដ្ឋ បែរមុខទៅទិសខាងកើត ហើយទំនងជាសាងសង់ក្នុងសម័យមុនអង្គរ ឬដើមសម័យអង្គរ។ ប្រាសាទនេះរងការបែកបាក់ ដោយបានបាក់បែកត្រឹមមេទ្វារ ខណៈផ្នែកខាងលិចបាក់ទាំងស្រុង ហើយផ្នែកកណ្ដាលមានការជីកគាស់កកាយ។ នេះបើតាមការបញ្ជាក់របស់មន្ត្រីដដែល៕
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
